Mardoqueo chu Ester

UMA tuku nalichuwinanaw tilalh akxni Esdras ni axʼan kJerusalén. Mardoqueo chu Ester li Israel chu lu laklanka xlakatsukutkan anta kxtamapakgsin Persia. Ester xpuskat mapakgsina chu xtapuxnimat Mardoqueo xlichatiy mapakgsina anta kxtamapakgsin. Naʼakxilhaw la tilalh uma.

Xnatlatni Ester nikgolh akxni aktsinajku xwanit wa xlakata Mardoqueo makgastakli. Asuero xmapakgsina Persia, kgalhiy akgtum chiki anta kachikin wanikan Susa chu Mardoqueo kskujni mapakgsina. Akgtum kilhtamaku xpuskat mapakgsina, Vasti nikgalhakaxmatnilh, wa xlakata mapakgsina lakgpalilh xpuskat. ¿Katsiya wix tiku laksakli? Wa Ester xastlan tsumat.

¿Akxilhpat kdibujo uma chixku tiku lanka makgkatsikan nema takilhputanimaka? Wa Hamán chatum chixku tiku lu lanka xlakatsukut anta kPersia. Hamán lakaskin pi Mardoqueo wantiku akxilhpat kdibujo chu kaj wi na katakilhputanilh. Pero Mardoqueo nitakilhputaniy. Xla nitlan akxilha natakilhputaniy chatum chixku tiku lu lixkajni likatsiy. Chu Hamán snun lisitsiy. Naʼakxilhaw tuku tlawalh.

Hamán lhuwa taʼakgsanin wanilh mapakgsina xlakata li Israel. Wan: Lu lixkajni likatsikgoy chu ni kgalhakgaxmatkgoy milimapakgsin. Xlinitkan. Asuero nikatsiy pi xpuskat na li Israel. Wa xlakata tlawanilh kuenta Hamán chu tsokgli limapakgsin xlakata akgtum kilhtamaku kakamakgnika li Israel.

Akxni Mardoqueo katsilh xlakata uma nitlan limapakgsin, lu lilakagaputsalh. Chu malakgachanilh tamakatsin Ester, waniy: Kawani mapakgsina pi kakinkalakgmaxtun. Komo nitu tasanikanit chatum nila lakgan mapakgsina chuna wi limapakgsin xla li Persia. Pero Ester an maski nitu wanikanit naʼan. Mapakgsina limakalh xlixtokgo nema xlitatlawanit oro, chuna limasiyalh pi ni katimakgnika. Ester kawanilh mapakgsina chu Hamán pi kaʼankgolh tawayankgoy. Anta mapakgsina kgalhskilh Ester tukuya litlan xlakaskin. Chu Ester wa pi komo naʼanparakgoy wayankgoy amakgtum lichali nawaniy tuku lakaskin.

Akxni xwayamakgolh Ester wanilh mapakgsina: Nakamakgnikan kinkachikin chu akit na nakimakgnikan. Chu mapakgsina snun lisitsilh. ¿Tiku lakpuwan chuna natlaway? Kgalhskininan Asuero.

¡Wa tiku nikinkaʼakxilhputunan wa uma chixku Hamán! Wan Ester.

Akxni chuna wa, tlakg snun lisitsilh mapakgsina. Wa pi kamakgnika Hamán. Chu wililh Mardoqueo xlichatiy mapakgsina anta kxtamapakgsin. Mardoqueo tlawalh pi katlawaka akgtum limapakgsin anta niku wan pi ni natamastakgoy akxni li Israel nakamakgniputunkan. Chu xlakata Mardoqueo lu lanka xlakatsukut uku, lhuwa kristianos kamakgtayay li Israel chu katalatlajakgolh tiku nixkaʼakxilhputun.