Jesús malakastakwanika

¿KATSIYA wix tiku uma puskat chu tiku uma chatiy lakchixkuwin nema wilakgolh unu kdibujo? Uma puskat wa María Magdalena, xtalalina Jesús. Chu lakchixkuwin tiku xasnapapa lhakganankgonit ángeles. María talakanuma anta niku xwilikanit Jesús, pero ni anta tanuma. ¿Tiku lilh? Kaʼakxilhwi.

Akxni xninitta Jesús sacerdotes wanikgoy Pilato: Akxni Jesús xlama wa pi xlituxama xʼamaka malakastakwanikan. Wa xlakata kamalakgacha tiku nakuentatlawakgoy niku xtamaknukanit Jesús. ¡Chuna xtamakgalhtawakgen ni katikgalhankgolh chu alistalh nawankgoy pi lakastakwanalh! Pilato kawaniy pi kamalakgachakgolh soldados.

Pero lu tsisa xlituxama akxni xninitta Jesús, xalan milh chatum xʼángel Jehová. Makgololh chiwix nema xlitalakgatalanit niku xtamaknukanit Jesús. Soldados lu pekuankgolh nipara la tatsuwikgoy. ¡Pero akxni soldados tlantiya tatsuwikgolh talakanukgolh anta niku xwilikanit Jesús chu ni anta wi! Makgapitsi soldados ankgolh kkachikin chu wanikgoy sacerdotes tuku lanit. ¿Katsiya wix tuku tlawagolh sacerdotes tiku laklixkajni xlikatsikgoy? Kaxokgonikgoy soldados xlakata naʼakgsaninankgoy. Kawanikgoy: Kawantit pi xtamakgalhtawakgen Jesús kgalhankgolh akxni wixin klhtatapatit.

Akxni tama kilhtamaku makgapitsi lakpuskatin tiku xtalalinkgoy, ankgolh niku xwilikanit Jesús. ¡Talakanukgolh chu nitu xtanuma! Xalan chatiy ángeles nema kskgoy xlhakgatkan anta tanumakgolh. Ángeles kgalhskininankgoy: ¿Tuku xlakata putsapatit Jesús? Jesús malakastakwanika. Lakapara kapitit chu kakawanitit xtamakgalhtawakgen. Xlakan lakapara ankgolh. Pero anta ktiji chatum chixku kamachokgolh. ¡Uma chixku wa Jesús! Kawani: Kapitit chu kakawanitit kintamakgalhtawakgen.

Akxni uma lakpuskatin kawanikgoy xtamakgalhtawakgen pi Jesús lakastakwananit chu akxilhkgolh, xlakan nila makanajlakgoy. ¡Pero Pedro chu Juan lakapara ankgolh niku xwilikanit Jesús pero niti xtanuma! Akxni xputumkan ankgolh, María Magdalena tamakgxtakgcha. Akxni chu talakanulh kxpulakni chu kaʼakxilhli chatiy ángeles.

¿Katsiya wix tuku lanilh xtiyatliwa? Dios tlawalh pi kalakgsputli xtiyatliwa. Dios nilimalakastakwanilh xtiyatliwa nema pulana xkgalhiy. Maxkilh xmakni xaespíritu la xla chatum ángel. Pero xlakata nakalimasiyaniy xtamakgalhtawakgen pi lakastakwananit, Jesús tlan tlaway pi kaʼakxilhka la chatum chixku.