Kgalhkgalhimakgolh kJerusalén

UMAKGOLH kristianos tiku wilakgolh kdibujo kstalaninanin Jesús. Kgalhakgaxmatkgonit Jesús chu kJerusalén tamakgxtakgkgonit. Chu akxni makxtum wilakgolh wintuku palha makawa la un, nema litatsamalh chiki. Chu akxni tama kilhtamaku kaʼakgstiputawi lhkuyat chatunu chatunu. ¿Akxilhpat lhkuyat kxakgxakga chatunu apóstol? ¿Tuku wamputun uma?

¡Uma tuku lama wa nema nilay tamakanajlay xla Dios! Jesús tawilaparacha xtlat kʼakgapun chu kamakaminima espíritu santo kstalaninanin. ¿Katsiya wix tuku kamatlawilh espíritu santo? Putum tsukukgolh chuwinankgoy tanu tanu tachuwin.

Lhuwa kristianos xalak Jerusalén kgaxmatkgolh uma un, chu minkgolh akxilhkgoy tuku lama. Makgapitsi kristianos xala ktanu tanu kachikinin minkgonit kJerusalén kfiesta xla Pentecostés. ¡Kaks lilakawankgolh umakgolh tiku kaj xminkgonit paxialhnankgoy! Xlakata xtamakgalhtawakgen Jesús kalixakgatlikgoy kristianos kxtachuwinkan wantuku Dios katuwa xtlawama lu xatlan.

Tiku kaj minkgonit paxialhnankgoy wankgoy, umakgolh kristianos li Galilea. ¿Tuku xlakata tlan chuwinankgoy tanu tanu tachuwin xalak kkachikinin nema akinin minitanchaw? Pedro tayalh xlakata nakalixakgatliy tuku xlakata chuna lama. Chu pixlanka kawani kristianos la xmakgnikanit Jesús pero Jehová malakastakwanilh. Chu uku, anta wilacha kxpaxtun Dios. Chu makaminit espíritu santo nema xwanit pi xʼama makamin. Wa xlakata chuna lama.

Akxni Pedro kawanilh uma, lu nitlan limakgkatsikgoy tuku tlawanika Jesús. Xlakan kgalhskininankgoy ¿Tuku kilitlawatkan? Pedro kawaniy: Mililakgpalitkan la lilapatit chu militamunutkan. Chu akxni tama kilhtamaku tamunukgolh max 3,000 kristianos chu kstalaninanin Jesús wankgolh.