Aktalamakgnimaka Esteban

UMA chixku tiku tatsokgostanit xtukuwani Esteban. Esteban xakgstitum kskujni Jesús. ¡Pero kaʼakxilhti tuku akgspulama! Uma lakchixkuwin tiku wilakgolh kdibujo liʼaktalamimakgolh laklanka chiwix. ¿Tuku xlakata ni akxilhputunkgoy Esteban asta aktalamimakgolh? Kaʼakxilhwi.

Dios makgtayama Esteban xlakata katuwa tlawama tuku laklanka nilay tamakanajla. Chu uma lakchixkuwin sitsikgoy, nilakgatikgoy chu tataʼakglhuwatnankgoy Esteban xlakata kawani kristianos wantuku xaxlikana. Pero Dios maxki lanka liskgalala Esteban, chu masiyay pi uma lakchixkuwin nixaxlikana tuku masiyamakgolh. Chu uma tuku Esteban kawani lu kalimakgasitsilh. Wa xlakata chipakgolh Esteban chu kaputsaka tiku nawankgoy tuku nixalixkana xlakata Esteban.

Xapuxku sacerdote kgalhskilh Esteban: ¿Xlikana tuku wankgoy? Akxni Esteban kgalhtinan, Biblia limaklakaskin. Chu kawaniy: Makgasa makgpitsi lakchixkuwin ni xʼakxilhputunkgoy xpalakachuwinanin Jehová. Chu na kawanipa: Wixin nachuna mintayatkan, wixin makgnitit Jesús kskujni Dios chu nitu kgalhakgaxpatnipatit xlimapakgsin.

¡Uma snun lisitsikgolh pulalinanin xla takanajla! Xlakata snun sitsikgonit malakxkanikgoy xtatsankan. Pero akxni Esteban talakayawalh kʼakgapun wan: ¡Kaʼakxilhtit! Kʼakxilhma Jesús kxpaxtun Dios kʼakgapun chu uma lakchixkuwin kaʼakgachipaka xlakata ni nakgaxmatkgoy chu chipakgolh chu xwatalinkgolh kxkilhpan kachikin.

Anta unu maktaktakgolh xlhakgatkan chu maxkikgolh uma kgawasa xtukuwani Saulo xlakata nakakuentajtlawaniy. ¿Akxilhpat Saulo? Chu akxni makgapitsi lakchixkuwin tsukukgolh aktalamikgoy Esteban. Esteban tatsokgostalh chuna la akxilhpat kdibujo chu tsukulh tlawaniy Dios oración chu waniy: Jehová ni kakamaxokge xlakata uma tuku nitlan tlawamakgolh. Xla katsiy pi pulalinanin xla takanajla kaʼakgskgawimikgonit makgapitsi lakchixkuwin. Chu akxni Esteban chuna wankgolh nilh.

Akxni wi tiku tlawaniyan tuku nitlan, ¿nachuna makgaxokgoputuna o waniya Jehová pi ni kakatlawanilh tuku nitlan? Esteban chu Jesús ni skinkgolh pi wantiku katlawanikgolh tuku nitlan wintuku kalanikgolh. Xlakan lu tlan kalikatsinikgolh maski witiku lu snun nitlan tuku katlawanilh. Nachuna katlawaw.