Anta kxtiji Damasco

¿KATSIYA wix tiku uma chixku tiku ma kkatiyatni? Uma chixku Saulo. Wantiku kakuentajtlawanilh xlhakgatkan tiku makgnikgolh Esteban. ¡Kaʼakxilhti uma makgxkgakganat! ¿Tuku lama?

Akxni xninitta Esteban Saulo alh kaputsa wantiku kstalaninanin Jesús xlakata nakatlawaniy tuku nitlan. Xtanu kxchikkan, xkatamakxtuy chu xkalin kpulachin. Lhuwa wantiku kstalaninanin Jesús tsalakgolh alakatanu kachikinin chu anta niku chankgolh na lichuwinankgolh xalaksasti xalakwan. Pero Saulo alh alakatanu kachikin kaputsastalaniy kstalaninanin Jesús. Chu uku ama kDamasco. Pero anta ktiji wintuku lalh nema nilay tamakanajlay.

Xalan litawakacha Saulo akgtum xkgakganat. Xla tamacha kkatiyatni chuna la akxilhmaw kdibujo. Akxnichu tama taxtucha akgtum tachuwin nema xwan: ¡Saulo, Saulo! ¿Tuku xlakata kintlawaniya tuku nitlan? Lakchixkuwin tiku taʼankgoy akxilhkgolh xkgakganat chu kgaxmatkgolh chuwinanka pero ni katsikgoy tuku wanka.

¿Tiku wix kinpuxku?, wan Saulo.

Tachuwin nema kgaxmatli Saulo wan: Akit Jesús wantiku tlawanipat tuku nitlan. Jesús chuna wan xlakata Saulo kaputsastalaniy kstalaninanin, Jesús makgkatsiy la wa tlawanimaka tuku nitlan.

Saulo kgalhskininan: Kinpuxku, ¿tuku kilitlawat?

Kataki chu kapit kDamasco wan Jesús. Anta nawanikana tuku militlawat. Akxni Saulo takilh chu malakkilh xlakgastapu ni la xlakawanan. ¡Lakgaxokgo xwanit! Wa xlakata uma lakchixkuwin tiku xtaʼamakgolh kDamasco pakgachipalinkgolh.

Chu akxni tama kilhtamaku Jesús xakgatlilh chatum kstalanina xalak Damasco chu waniy: Ananías, kapit niku nakmalakgachayan. Kapit ktiji nema wanikan Xatsajwa. Anta kxchik Judas kakgalhskininanti xlakata chatum chixku xtukuwani Saulo. Klaksaknit xlakata kilakskujni nawan.

Ananías kgalhakgaxmatli Jesús. Chu akxni akxilhli Saulo wililh xmakan anta kxakgxakga chu wanilh: Kinpuxkukan Jesús kiwanilh nakmin xlakata tlan nalakawananparaya chu nalitatsamaya espíritu santo. Lakapara wintuku tapekgxtaktalh kxlakagastapu, chu Saulo tlan lakawananpa

Saulo lu tlan limaklakaskinka xlakata nakatalichuwinan xasasti xalakwan kristianos xla laklanka kachikinin. Lilakgapaska apóstol Pablo chu xlakata Saulo, lhuwa tuku nakatsiyaw. Pero pulana kaʼakxilhwi tuku Dios matlawilh Pedro.