Takgalhtawakga 11

Tuku kanajlakgoy kristianos chu tlawakgoy nema Dios nitlan akxilha

¿Tuku kanajlakgoy chu tlawakgoy kristianos kxtakaknin nema nitlan?  (1)

¿Pi xlikanajlatkan kstalaninanin Cristo pi Dios akgtum Trinidad? (2)

¿Tuku xlakata kstalaninanin Cristo tiku xaxlikana ni tlawakgoy fiesta xlakata Talakgatankuwit nipara Semana Santa nipara makatamikan kata? (3, 4)

Tiku nikgonitta, ¿pi tlan katlawaniy tuku nitlan wantiku staknankgoy? (5) ¿Pi kcruz nilh Jesús? (6) ¿Pi snun xlakaskinka namakgapaxuwayaw Dios? (7)

1. Ni paks tuku kanajlakgoy chu tlawakgoy kristianos kxtakaknin nixatlan. Pero Dios nitlan akxilha nema minacha ni xaxlikana takanajla o lakatayay tuku Biblia masiyay (Mateo 15:6).

2. Trinidad: ¿Pi akgtum Trinidad Jiova wamputunaw chatutu Dios litakgatsiy chatum Dios? ¡Ni chuna! Jiova, wa xaTlat, chu «Dios nkimPuchinakan nama watiya nchatum» (Marcos 12:29; Juan 17:3). Jesús wa xapuxku xKgawasa Dios, chu Jesús tapakgsiniy Dios (1 Corintios 11:3). XaTlat tlakg xapuxku chu xKgawasa ni malakgchani (Juan 14:28). Wa espíritu santo ni chatum Dios, wa xlitliwakga Dios nema liskuja (Génesis 1:2; Hechos 2:18).

3. Talakgatankuwit chu Semana Santa: Jesús ni lakachilh 25 xla diciembre, akxni lakachilh max xliʼakgtum octubre, kilhtamaku akxni wantiku xkuentajtlawananin borrego xkuentajtlawamakgolh xborregokan anta kakuen kkatsisni (Lucas 2:8-12). Jesús nitu mapakgsinama nalitlawakan kata  kata fiesta akxni lakachilh. Wantuku limapakgsinalh nalakapastakaw kata, kata, akxni tinilh (Lucas 22:19, 20). Putum wantuku tlawakgoy kTalakgatankuwit minkgoyacha ktakanajla nixaxlikana xalamakgasa. Nachuna Semana Santa, akxni kamakgchokgonikan imagen chu ni wakgoy liway. Tiku xapulana kstalaninanin Cristo ni xlitlawakgoy fiesta xlakata Talakgatankuwit chu Semana Santa na ni tlawakgoy tiku xaxlikana kstalaninanin Cristo xala uku.

4. Tamakatamitat: Kaj pulaktiy tamakatamitat nema lichiwinan Biblia, wa tlawakgolh tiku ni xkakninanikgoy Jiova (Génesis 40:20-22; Marcos 6:21, 22, 24-27). Tiku xapulana kstalaninanin Cristo ni xtlawakgoy fiesta xlakata tamakatamitat. Tama talismanin minitancha ktakanajla nixaxlikana xalamakgasa. Tiku xaxlikana kstalaninanin Cristo makglhuwa xalipaxaw titaxtukgoy kilhtamaku chu lamaxkikgoy tamaskiwin liʼakgtuminika kata.

5. Tapekua xlakata tiku nikgonitta: Tiku nikgonitta nituku lay tlawakgoy chu nituku makgkatsikgoy. Akin nilay kamakgtayakgoyaw chu xlakan nilay kinkatlawanikgoyan tuku nitlan (Salmo 146:4; Eclesiastés 9:5, 10). Ni xlikana anan xespíritu tiku nikgonitta; nialh tuku staknan akxni nikan. Pero lakgachunin ángeles xalaklixkajni, kalimapakuwikan demonio, lititaxtukgoy lakomo xespíritu tiku nikgonitta. Paks takaknin nema katlawanikan tiku nikgonitta, chu kapekuanikan na nitlan (Isaías 8:19).

6. Cruz: Ni anta kcruz nilh Jesús, xla nilh anta kkgantum kiwi. Klhuwa Biblias wi tachuwin «cruz», uma tachuwin xagriego xwamputun kgantum kiwi. Akglhuwa takanajla nixaxlikana xalamakgasa wa xmaklakaskinkgoy cruz chu anta minitancha tama takanajla xlakata cruz. Wa xlakata, xapulana kstalaninanin Cristo ni xmaklakaskinkgoy chu ni xkakninanikgoy cruz. Wa xlakata ¿pi tlan namaklakaskinaw akgtum cruz kkintakaknikan? (Salmo 31:6; 1 Corintios 10:14.)

7. Max lu tuwa namakgkatsiya namakgxtakga umakgolh takanajla nema lismaninita kmintakaknin. Max para minpariente o tiku talalipinkgoya namakgpuwantiniputunkgoyan pi ni nalakgpaliya mintakanajla. Pero namakgapaxuwaya Dios tlakg xlakaskinka nixawa namakgapaxuwaya mintakristiano (Salmo 118:6; Mateo 10:36, 37).

[Dibujo xla página 22]

Dios ni akgtum Trinidad

[Dibujos xla página 23]

Wa Lakgatankuwit minitancha ktakanajla nixaxlikana xalamakgasa

Nitlan nakakninaniyaw chu nakapekuaniyaw tiku nikgonitta