Akgtum tamakatsinin xalamakgasa

Jiova nikatimakgxtakgli pi latamanin tiku lixkan xtayat nalakxtlawakgoy Paraiso. Anta manwa nalatamakgoy tiku xʼamigo. ¿Tuku nakaʼakgspulay latamanin tiku lixkan xtayat? Tuku lanit akxni xlama Noe kinkawaniyan ama. Titaxtulha akglhuwa milh kata akxni latamalh, xatlan chixku, xlenkgalhin kgoxajtlawalh tuku xlakaskin Jiova. Paks amakgapitsin latamanin xalaʼ kKatiyatni xtlawakgoy tuku ni tlan. Wa xpalakata, Jiova wanilh Noe pi nalimin akgtum munkaklat xpalakata nakamalakgsputu latamanin tiku lixkan xtayat. Nawanilh pi natlaway akgtum arka xpalakata ni nanikgoy xlaʼ chu xfamilia akxni xmilh ama Munkaklat (Génesis 6:9-18).

Noe chu xfamilia tlawakgolh arka. Noe kamakatsinilh latamanin pi xʼama min Munkaklat, nitiku kgaxmatnilh chu xlenkgalhin tlawakgolh tuku nixatlan. Akxni Noe tlawakgolh arka anta katamaknulh takgalhinin, chu alistalh nachuna tatanukgolh xfamilia. Jiova limilh akgtum lankasen. Senalh tipuxum kilhtamaku chu tipuxum katsisni litatsamalh chuchut xlikalanka Katiyatni (Génesis 7:7-12).

Latamanin tiku lixkan xtayat nikgolh, Noe chu xfamilia lakgtaxtukgolh. Jiova kakuentajtlawalh akxni milh Munkaklat chu kamakilhanulh kxakawan Katiyatni niku nixʼanan tuku nixatlan (Génesis 7:22, 23). Biblia wan pi alimakgtum nachimparay kilhtamaku akxni Jiova nakamalakgsputuparay wantiku ni tlawaputunkgoy tuku xaʼakgstitum. Kristiano tiku tlan likatsikgoy ni katikamalakgsputuka. Nalatamakgoy xlipan Katiyatni akxni akgtum Paraiso wanita (2 Pedro 2:5, 6, 9).

Laʼuku lhuwa latamanin tlawakgoy tuku nixatlan. Latamanin xalaʼ uku litsamakgoy takglhuwit. Jiova makglhuwa kamalakgachay xTatayananin, xpalakata namakatsinikgoy latamanin, lulhuwa tiku ni kgaxmatputunkgoy xtachiwin Jiova. Chalhuwa kristiano ni lakgpaliputunkgoy xlatamatkan, chu ni lakaskinkgoy pi Dios nakawani tuku tlan chu tuku ni tlan. ¿Tuku nakaʼakgspulay? ¿Nalakgpalikgoy xlatamat? Chalhuwa nikxni katilakgpalikgolh. Talakatsuwimaja kilhtamaku akxni latamanin tiku lixkan xtayat xlipan nakamalakgsputukan (Salmo 92:7).

Ni katimalakgsputuka Katiyatni; akgtum paraiso nawan. Tiku xʼamigo Dios nawankgoy, xlipan nalatamakgoy kParaiso anta nak Katiyatni (Salmo 37:29).