Lantla teakgskan xaxlikana takanajla

Kon xʼamigo Dios wamputuna, min takanajla natlawaya nikuma Dios wan pi xatlan. Jesus wa pi “xaxlikana kakninanin” xlikaknitkan Dios chuna lantla “xaxlikana” (Juan 4:23, 24, NM). Kajtipatum wi lantla xatlan nakakniyaw Dios (Efesios 4:4-6). Xaxlikana takanajla linan kxaxlipan latamat; chu nixaxlikana takanajla linan anta nak pulakgsputni (Mateo 7:13, 14).

Kajkaks nakaʼakxilha latamanin, nakatsiya nikuma xaxlikana takanajla. Kon Jiova tlan likatsi, xaxlikana xkakninanin tlan xliwanatkan. Xtachuna xatlan xakiwi laxux makgalay xatlan xlaxux, xaxlikana takanajla makgalay xatlan latamanin (Mateo 7:15-20).

Xʼamigo Jiova lulakgachixkuwilikgoy Biblia. Katsikgoy pi Biblia xtamakamin Dios: wa xpalakata limapulikgoy xlatamat, lilakkaxtlawakgoy xtaakglhuwit chu litamakgtayakgoy xpalakata tlakg tlan nalakgapaskgoy Dios (2 Timoteo 3:16). Xlakʼan xlenkgalhin tlawaputunkgoy tuku lichiwinantapulikgoy.

Xʼamigo Jiova lapaxkikgoy. Jesus masiyalh pi xpaxkikgoy latamanin akxni kamasiyanilh xlakata Dios chu akxni kamakuchilh tatatlanin. Nachuna tiku xalaʼ kxaxlikana takanajla kapaxkikgoy kristiano. Xlakan, xtachuna la Jesus, nilakgmakgankgoy limaxkganin, nipara tiku tanu xkolorkan chu nipara tiku xaʼalakatunu kachikin. Jesus tiwa pi latamanin nakatsikgoy tiku xtamakgalhtawakgen xpalakata xlakan lapaxkikgoy (Juan 13:35).

Xʼamigojkan Dios lakgachixkuwikgoy xtukuwini: Jiova. Pi wi tiku ni xlakatiputulh min tukuwini, ¿mi amigo xwa? Lukana pi ni. Akxni kgalhiyaw chatum amigo, limapakuiyaw xtukuwini chu tlan kalixakgatliyaw latamanin xlakata xlaʼ. Wa xpalakata tiku xʼamigo Dios wamputunkgoy, xlilakatitkan xtukuwini chu tlan xlixakgatlitkan amakgapitsin latamanin xlakata xlaʼ. Jiova lakaskin pi chuna natlawayaw (Mateo 6:9; Romanos 10:13, 14).

La Jesus, xʼamigo Dios kamasiyanikgoy latamanin xlakata xReino Dios. XReino Dios akgtum limapakgsin xalaʼ kʼakgapun, natlaway Katiyatni akgtum paraiso. Xʼamigojkan Dios makatsinikgoy latamanin uma xatlan tamakatsinin xlakata xReino Dios (Mateo 24:14).

Xtatayananin Jiova kgoxajlakgoy xpalakata xʼamigo Dios wanputunkgoy. Lakgachixkuwilikgoy Biblia chu lapaxkikgoy. Nachuna lakatikgoy chu lakgachixkuwikgoy xtukuwini Dios; masiyanikgoy kristiano xlakata xReino Dios. Laʼuku kilhtamaku, xtatayananin Jiova lilatamakgoy xaxlikana takanajla.