Wa tuku xla skuwananin ni tlan

Satanas lakaskin natlawayaw tuku tlawakgoy skuwananin. Lhuwa kristiano tlawanikgoy tamakamastan tiku xlamakgolh makgasa chu tiku xaspiritu xpalakata ni nakatlawani tuku nixatlan. Pekuanikgoy xlitliwakga tiku xpulatamat nak xaspiritu. Lakatikgoy lastun o tamakgapixnu tuku xla skuwana, wakgoy “likuchun” nema likanajlakgoy pi kgalhiy xlitliwakga skuwana o kalimaktlawakan. Wilakgolh kristiano katuwa tuku matsekgkgoy o maknukgoy anta nak xchikkan xlakata kanajlakgoy pi uma nakalimakgtayay xlitliwakga. Wi tiku lakatikgoy “likuchun” xla skuawana, likanajlakgoy pi nakamakgtayay akxni stananankgoy o tamawanankgoy, akxni kaliaxilhkan xtakatsinkan o akxni nakgalhikgoy xlitatawilat.

Kon xʼamigo Jiova nawana tlakgtlan nalitamakgtayaya tuku xla tlaway Satanas. Jiova Dios chu paks xʼanjel kgalhikgoy tlakg lhuwa litliwakga nixtachuna Satanas chu paks xdemonio (Santiago 2:19; Apocalipsis 12:9). Jiova lulakatiputun xlitliwakga xpalakata nakamakgtayay xʼamigo, tiku nimakgxtakgnankgoy (2 Crónicas 16:9).

Kxtachiwin Dios wan: “Ni katlawatit tuku tlawakgoy skuwananin”. Jiova lakgmakgan tuku xla skuwananin, xpalakata xtaskujutkan kinkaliwiliyan kxlitliwakga Satanas Diablo (Levítico 19:26, NM).