Capítulo 14
¿Tuku kalipulalin Jehová xkachikin?
1. ¿Tuku kinkawaniyan Biblia xlakata xkachikin Jehová, chu tuku xlakata xlakaskinka kilikatsitkan?
¿KGALHI Dios akgtum kachikin? Biblia nema Dios matsokgninalh kinkawaniyan pi kgalhi akgtum kachikin chu na kinkamakgtayayan nakatsiyaw xlakata pulaktu nema wilacha kʼakgapun (Ezequiel 1:1, 4-14; Daniel 7:9, 10, 13, 14). Maski uma xalak akgapun nila akxilhaw, xlakata ni tasiyay, la uku lhuwa kamakgtaya xaxlikana xkakninanin Dios (2 Reyes 6:15-17). Jehová na kgalhi apulaktu xkachikin anta unu kKatiyatni. Biblia kinkamakgtayayan nakatsiyaw wantiku makgtapakgsikgoy kxkachikin chu la pulalin Jehová.
Talakgapasa xkachikin Jehová xalak katiyatni
2. ¿Tukuya xasasti kachikin lakkaxwililh Dios?
2 Akgtum mil akgkitsis ciento a tipuxamakitsis kata Israel wa xkachikin Dios xwanit (Hechos 7:38). Pero xlakata ni kgalhakgaxmatkgolh xLimapakgsin Dios chu lakgmakgankgolh xKgawasa, Jehová na kalakgmakgalh. Jesús kawanilh judíos: «Kaukxilhti, wa nchu mimputawilh, tsilis natamakgaxtakga» (Mateo 23:38). Wa xlakata Jehová lakkaxwilipa akgtum xasasti kachikin, wantiku katatlawalh xasasti talakkaxlan. Umakgolh litakgatsiy 144,000 latamanin tiku Dios kalaksaknit xlakata natatawilakgoyacha xKgawasa anta kʼakgapun (Apocalipsis 14:1-4).
3. ¿Tuku lalh kPentecostés kata 33 akxni ay xminita Cristo nema Dios liwana limasiyalh pi xʼama limaklakaskin xasasti kachikin?
3 Wantiku pulana makgtapakgsikgolh kxasasti kachikin, wa tiku Jehová kalilaksakli xʼespíritu santo kPentecostés kata 33 akxni ay xminita Cristo. Xlakata uma tuku lalh Biblia wan: «Cha nchu akxni ntiakchalh nkilhtamaku ntu wanikan Pentecostés, paks makxtum xwilakgo lakatum kchiki. Kaj xamakgtum nchu ntitakgaxmatli luwa palha ntu ntimakawa ntimincha nkakgapun, kaj xtachuna xmakasanat un ntu luwa tliwakga mpala xlawi, na anta nchu ntiwankgaxnalh kxlipalaktlanka kchiki ntani xwilakgo. Cha nchu ntitasiyunikgolh lhkuyat xtachuna simakgat wa ntu ntakgpitsinikgolh ntitayanikgolh kxokgspun xakgxakgakan nchatunu. Paks chi tilitatsamakgolh Spiritu Santo» (Hechos 2:1-4). Chuna, Dios liwana limasiyalh akxni limaklakaskilh xʼespíritu pi tama kilhtamaku xʼama kalimaklakaskin tama latamanin xlakata xmakgantaxilh tuku lakapastaknit natlawa nema pulalin Jesucristo tiku wilacha kʼakgapun.
4. ¿Tiku la uku pulaktu xkachikin Jehová nema taʼakxilha?
4 La uku kKatiyatni umakgolh 144,000 nialh lhuwa wilakgolh. Pero xlakata kgantaxtuma tuku wan Biblia pi xʼama la xlakata uma kachikin, na wilakgolh tiku litaxtukgoy “lhuwa latamanin” xla «amakgapitsi borregos» nema akxtum kataskujkgoy chu umakgolh lhuwa millones wilakgolh. Jesús, lu Xatlan Maputswayanina, kamamakxtuminit uma pulaktiy xlakata pulaktum nawan chu chatum Maputswayanina tiku natapakgsinikgoy: Jesús (Apocalipsis 7:9; Juan 10:11, 16). Xputumkan uma pulaktiy, litaxtukgoy kaj akgtum kachikin tiku makxtum wilakgolh, pulaktu xkachikin Jehová nema taʼakxilha.
Kachikin nema pulalin Dios
5. ¿Tiku pulalin xkachikin Dios, chu tuku limaklakaskin?
5 Tachuwin xalak Biblia «nkgamputum xkanajlanin [o xcongregación] Dios xastakna» liwana masiyay tiku pulalin. Uma kachikin wa pulalin Dios. Dios tlaway pi wa Jesús nalipulalin xkachikin, wantiku liyawalh xʼAkgxekga congregación nawan nema ni tasiyay, chu na lipulalin xTachuwin, Biblia (1 Timoteo 3:14, 15; Efesios 1:22, 23; 2 Timoteo 3:16, 17).
6. 1) ¿La litasiyalh pi wa Dios xpulalima congregación kxapulana siglo? 2) ¿Tuku litasiyay pi Jesús chuntiya wa xʼAkgxekga congregación?
6 Jehová makglhuwa limasiyalh pi wa pulalima uma kachikin: Wantuku lalh kPentecostés (Hechos 2:14-18, 32, 33); akxni chatum xʼángel Jehová tlawalh katsukuka lichuwinankan xalakwan xalaksasti tamakatsin anta kʼÁfrica; akxni Saulo xalak Tarso kstalanina Cristo wa, takgaxmatli xtachuwin Jesús chu wanilh tuku xlitlawat, chu akxni Pedro tsukulh kalixakgatli xlakata Dios wantiku ni judíos xwankgonit (Hechos 8:26, 27; 9:3-7; 10:9-16, 19-22). Titaxtulh kilhtamaku latamanin nialh kgaxmatkgolh tachuwin xalak akgapun, nialh tasiyakgolh ángeles chu nialh kamaxkika espíritu xlakata natlawakgo tuku nila tamakanajla. Pero, Jesús kawanilh: «Xawa lakatanks kakatsitit pi xaliʼankgalhin kit nakkatalatamayan chali chali asta akxni nasputa katuxawat» (Mateo 28:20; 1 Corintios 13:8). La uku, xtatayananin Jehová makgamakglhtinankgoy pi wa Jesús tiku kapulalima. Komo ni wa xkapulalilh Jesús nila xlichuwinankgolh xlakata Tamapakgsin uma kakilhtamaku niku lhuwa kaputsastalanikan.
7. 1) ¿Tiku la uku «skujni xalipaw chu xaskgalala», chu la likatsiyaw? 2) ¿Tukuya taskujut lakgayawalh Jesús «[k]skujni»?
7 Akxni Jesús nialh makgas xʼama niy, kalixakgatlilh xtamakgalhtawakgen xlakata «skujni xalipaw chu xaskgala», xlakata Jesús wa xaMalana xʼama lakgayawa lu xlakaskinka taskujut. Uma «skujni» ay xtawilalh akxni Malana xʼalh kʼakgapun, chu chuntiya skujma xwa akxni xtaspitpa malana chu ni xtasiyalh, akxni ay xkgalhilh Tamapakgsin. Xlakata uma tuku katsiw limasiyay pi nikajwatiya chatum lataman xʼama litaxtu, pero xcongregación Cristo tiku kalaksakkanit tlan xlitaxtulh uma lakskujni. Xlakata Jesús kalitamawalh xkgalhni, xla tlan xwa pi «[x]lakskujni». Wantiku makgtapakgsikgoy kxcongregación Jesús kawanilh pi xkamasiyanikgolh amakgapitsi xlakata kstalaninanin Cristo xwankgolh chu xkamatliwakglhtilhakgolh uma tiku xkamasiyanikgolh, «xkilhtamaku namaxkikgoy ntu nawakgoy [xla takanajla]» (Mateo 24:45-47; 28:19; Isaías 43:10; Lucas 12:42; 1 Pedro 4:10).
8. 1) ¿Tukuya taskujut lakgaya la uku skujni xalipaw? 2) ¿Tuku xlakata xlakaskinka namakgamakglhtinanaw tamasiy nema kinkalimaxkiyan kskujni Dios?
8 Kata 1914, akxni taspitli chu ni taʼakxilhli Malana Jesús, wa skujni liwana xtlawama taskujut nema xlakgayawakanit, xlakata tuku lalh, kata 1919 limasiyalh pi tama kata tlakg lakgayawaka taskujut. Kata 1919 asta la uku litachuwinama xlikalanka katiyatni xlakata xTamapakgsin Dios chu na kamamakxtumikanit tiku litaxtukgoy lhuwa latamanin tiku kakninanikgo Jehová xlakata nalakgtaxtukgo klanka talakgaputsit (Mateo 24:14, 21, 22; Apocalipsis 7:9, 10). Umakgolh lhuwa latamanin maklakaskinkgo liwat xla takanajla, chu skujni xalipaw wa kamaxki. Xlakata tlan namakgapaxuwayaw Jehová, talakaskin namakgamakglhtinanaw tamasiy nema kinkalimaxkiyan uma skujni chu natlawayaw tuku kinkawanikanan.
9, 10. 1) ¿La xtalakkaxtlaway tuku ni lu liwana xtakatsiy xlakata akgtum tamasiy chu la xtapulalin akxni xtalichuwinan xalakwan xalaksasti tamakatsin kxapulana siglo? 2) ¿La lakkaxwilikan la uku taskujut kxkachikin Jehová?
9 Lakgachunin ni liwana katsiyaw xlakata akgtum tamasiy chu la wi tuku xlitatlawat. ¿Tuku natlawayaw akxni chuna lay? Anta kCapítulo 15 xla Hechos kinkawaniyan la talakkaxtlawalh akgtum taʼakglhuwit xlakata akxni tiku ni judíos kstalaninanin Cristo wankgolh. Uma taʼakglhuwit kamakamaxkika apóstoles chu lakgkgolotsin xalak Jerusalén, lakgkgolotsin tiku xpulalinankgoy. Maski uma lakchixkuwin lakgachunin xʼakgtsankgakgoy, Dios kalimaklakaskilh xlakata xlakkaxtlawakgolh uma taʼakglhuwit. Akxni ay xlekgalhtawakgakgonit wantuku wan Biblia chu wantuku xkalimasiyaninit espíritu santo pi ay tlan xkalixakgatlikgolh xlakata Dios tiku ni judíos, katsikgolh tuku tlawakgolh. Dios kasikulanatlawanilh tuku tlawakgolh (Hechos 15:1-29; 16:4, 5). Umakgolh lakgkgolotsin tiku xpulalinankgoy kamalakgachakgolh chalhuwa lakchixkuwin xlakata xlichuwinankgolh xlakata xTamapakgsin Dios.
10 La uku, uma Lakgkgolotsin Tiku Pulalinankgoy kxkachikin Jehová nema tasiyay wa natalan tiku kalilaksakkanit espíritu chu lakalhuwa laklanka kachikin katiyakanit, chu anta wilakgolh kchiki anta niku pulalinkan taskujut xla xtatayananin Jehová xlikalanka katiyatni. Xlakata Jesucristo kapulalima, tlawamakgo pi katalakgatumilh xaxlikana takaknin xlikalanka Katiyatni, lakkaxwilikgoy taskujut xlakata natalichuwinan nema tlawakgoy xtatayananin Jehová klhuwa mil congregación. Putum umakgolh Lakgkgolotsin Tiku Pulalinankgoy nachuna lakapastakkgo chuna la apóstol Pablo, wantiku katsokgnanilh xnatalan: «Ni wa xpalakata mpala kaj kilitlankakan [o xmalankan, NM] xpalakata mintakanajlakan, wampi kaj kmakgamakgtayaputunaw mintapaxuwankan nkin, xampi wa xpalakata mintakanajlakan, tliwakglh liwilatit» (2 Corintios 1:24).
11. 1) ¿La tlawakan akxni kalaksakkan lakgkgolotsin chu siervos ministeriales? 2) ¿Tuku xlakata akxtum nakataskujaw wantiku kalaksakkanit xlakata napulalinkgoy congregación?
11 Xlikalanka katiyatni xtatayananin Jehová makgxtakgkgoy pi Lakgkgolotsin Tiku Pulalinankgoy nalaksakkgoy natalan tiku tlan nalakgatayakgoy taskujut, chu umakgolh lakgkgolotsin wankgoy tiku lakgkgolotsin chu siervos ministeriales nalitaxtukgoy xlakata nakuentajtlawakgoy congregaciones. Umakgolh tiku kaliyawakan taskujut, kBiblia wan tuku xlitlawatkan xlakata tlan nakgalhikgoy uma taskujut chu na katsikgoy pi umakgolh lakchixkuwin kgalhikgoy talakgalhin, xlakata min kilhtamaku akgtsankgakgoy. Lakgkgolotsin tiku wankgoy tiku tlan lakgkgolotsin chu siervos ministeriales nalitaxtukgoy chu tiku wankgoy pi tlan, lu tuwa tuku lakgatayakgolh kxlakatin Dios (1 Timoteo 3:1-10, 12, 13; Tito 1:5-9). Wa xlakata, skinikgoy xtamakgtay xʼespíritu Dios chu putsakgoy kakapulalilh xTachuwin (Hechos 6:2-4, 6; 14:23). Kapaxtikatsiniw xlakata Jehová «mastanit lakchixkuwin», wantiku kinkamakgtayakgoyan xlakata «nakgalhiyaw nkilipakskan ntu watiya ntipatum ntakanajla» (Efesios 4:8, 11-16).
12. ¿La kalimaklakaskin Jehová lakpuskatin anta kxkachikin chuna la lakkaxwilinit?
12 Biblia masiyay pi wantiku napulalinkgoy congregación wa lakchixkuwin. Uma limapakgsin ni kamaktuju lakpuskatin, xlakata makgapitsin na makgtapakgsikgoy kTamapakgsin xalak akgapun, chu xliputumkan lakpuskatin tlakg lichuwinankgoy xlakata xlimapakgsin Dios (Salmo 68:11). Nachuna, akxni liwana tlawakgoy tuku kalakgayawakanit kxfamiliakan, lakpuskatin makgtayaninankgo xlakata congregación tlan natalichuwinan (Tito 2:3-5). Pero wantiku namasiyakgoy kcongregación wa lakchixkuwin tiku kalakgayawakanit tama taskujut (1 Timoteo 2:12, 13).
13. 1) Chuna la wan Biblia, ¿la xliʼakxilhatkan lakgkgolotsin taskujut nema lakgayakgolh? 2) ¿Tukuya talakgalhaman kgalhiyaw kinputumkan?
13 Kkakilhtamaku lu xlakaskinka kaʼakxilhkan wantiku lakgayakgo laklanka taskujut. Pero kxkachikin Dios, wa uma limapakgsin tuku kgalhakgaxmatkgoy: «Xampi wanti ntlakg xtaktujulh lantla xlipaks wixin, wa xapuxku nawan» (Lucas 9:46-48; 22:24-26). Biblia kamakgpuwantini lakgkgolotsin pi ni namalananputunkgoy kxtakanajlakan tiku tapakgsinikgoy Dios, wata kaj kakawilinikgolh liʼakxilhtit tiku kamakgtakgalhkgoy (1 Pedro 5:2, 3). Ni kaj makgapitsi chuna xlitlawatkan, wata putum xtatayananin Jehová, lakchixkuwin chu lakpuskatin kgalhikgoy talakgalhamanin nalimasiyakgoy pi kakninanikgoy tiku lu Lanka xliputum kakilhtamaku, ni litlankajwanankgoy akxni lichuwinankgoy xtukuwani Jehová chu akxni lichuwinankgoy xlakata xTamapakgsin.
14. Kalimaklakaskinti textos nema tatsokgtawilakgonit, chu kakgalhti takgalhskinin nema stalanikgo akgatunu párrafo.
14 Tlan natlawayaw uma takgalhskinin: «¿Xlikana kʼakgatekgsa chu kpaxtikatsini la pulalin Jehová xkachikin nema tasiyay? ¿Limasiyay xlakata la klikatsi, tuku kwan chu tuku ktlaway?». Nalakpuwanaw xlakata tuku wan alistalh nakinkamakgtayayan naʼakxilhaw tuku tlawamaw akinin.
Komo xlikana ktapakgsini Cristo, xʼAkgxekga congregación, ¿tuku naktlaway chuna la wan umakgolh versículos? (Mateo 24:14; 28:19, 20; Juan 13:34, 35.)
Akxni kmakgamakglhtinan chu klimasiyay pi kpaxtikatsini liwat xlakata takanajla nema Dios kinkalimaxkiyan skujni chu Lakgkgolotsin tiku Pulalinankgoy, ¿tiku klakgachixkuwilima? (Lucas 10:16.)
¿La nalalikatsiniy natalan xalak congregación, chu tuku xlakata lakgkgolotsin tlakg chuna xlitlawatkan? (Romanos 12:10.)
15. 1) ¿Tuku limasiyayaw chuna la akxilhaw xkachikin Jehová nema tasiyay? 2) ¿La tlan nalimasiyayaw pi Diablo kaj xaʼakgsanina chu namakgapaxuwayaw Jehová?
15 La uku, Jehová kalipulalin xlakskujni xkachikin nema tasiyay chu kgalhakgaxmatkgoy Cristo. Wa xlakata, chuna la akxilhaw uma, limasiyayaw komo tatayayaw Jehová pi wa lakgchan namapakgsinan (Hebreos 13:17). Satanás chuntiya kilhwama pi kajwatiya lakaskinaw tuku tlan nakinkakitaxtuniyan. Pero, komo nakaskujniyaw amakgapitsi akxni natalakaskin chu ni natlawayaw pi lanka nakinkaʼakxilhkanan, limasiyayaw pi Diablo kaj xaʼakgsanina. Akxni paxkiyaw chu kalakgachixkuwiliyaw wantiku lakgayakgolh taskujut kcongregación akxni chuna tlawayaw chu ni kaj tlan kalichuwinanaw xlakata wi tuku nakinkamaxkinanan, makgapaxuwayaw Jehová (Judas 16; Hebreos 13:7). Komo ni namakgatsankgananiyaw xkachikin limasiyayaw pi Jehová wa kiDioskan chu makxtum kakninaniyaw (1 Corintios 15:58).
Wantuku talichuwinalh
• ¿Tuku tama xkachikin Jehová nema taʼakxilha la uku? ¿Tuku lakgaya?
• ¿Tiku liyawakanit xʼAkgxekga congregación nawan, chu tuku limaklakaskin nema taʼakxilha xlakata liwana nakinkapulalinan?
• ¿Tukuya xatlan talakapastakni nakakgalhiniyaw tiku makgtapakgsikgoy kxkachikin Jehová?
[Dibujos xla página 133]
Jehová kinkalipulalinan xkachikin nema tasiyay wantiku tapakgsini Cristo