Tamakatsin xla Tamapakgsin Núm. 37

Akgtum tamakatsin xlakata natakatsiy xlikalanka katiyatni

¡Talakatsuwima xlisputni nixaxlikana takanajla!

▪ ¿Tuku kilhchanima nixaxlikana takanajla?

▪ ¿La namasputukan nixaxlikana takanajla?

▪ ¿Nalakgtaxtuya wix akxni namasputukan nixaxlikana takanajla?

¿Tuku kilhchanima nixaxlikana takanajla?

¿Lilakgaputsaya akxni kxtukuwani takanajla tatlaway tuku lu nitlan? Wix katsiya xlakata tuku nitlan, ¿lisitsiya akxni tiku wankgoy pi skujnanikgoy Dios akxilha pi makgtanukgoy kguerra, makgninankgoy chu ni tlawakgoy tuku xaʼakgstitum? ¿Tuku xlakata tasiyay pi lhuwa taʼakglhuwit lakatsukuy ktakanajla?

Ni putum takanajla linkgoy kuenta, kaj watiya lin kuenta nixaxlikana takanajla. Jesucristo tiku lhuwa kanajlanikgoy chu lakgachixkuwilikgoy, lichuwinalh pi nixaxlikana takanajla wa tiku mastay nixatlan tawakat, chuna la «ntu nixatlan kiwi, wa mastay wa ntu nixatlan xatawakat» (Mateo 7:1-17). ¿Tukuya tawakat mastay nixaxlikana takanajla?

Takanajla nixaxlikana...

◼ ... MAKGTANUY KGUERRA CHU KPOLÍTICA. Maktum revista Asiaweek wan: «Lakomo kʼAsia chu alakatanu, tiku pulalinkgoy takanajla tlakg chu tlakg kgalhiputunkgoy limapakgsin, chu ni maxanankgoy limaklakaskinkgoy xtakanajlakan kristianos xlakata nakgalhikgoy tuku lakaskinkgoy». Na watiya revista wan pi xlakata tama tuku tlawakgoy, «kristianos akgwitimakgolh». Chatum pulalina xla takanajla xalak Estados Unidos wa: «Xlakata nialh naʼanan lamakgnit, kakamakgniw tiku makgninankgoy xlakata makgapekuananputunkgoy». Chuna la xla wan, wa uma tuku xlitatlawat: «Putum nakamakgniyaw anta kxtukuwani Kimalanakan». Pero Biblia wan: «Lapi wa nti wan, “kpaxkiy Dios,” [chu] na xkajniy xtala, pus kaj akgsaninan» (1 Juan 4:20). Jesús asta mastalh uma limapakgsin: «Kapaxkitit mintalatlawanakan» (Mateo 5:44). ¿Lakgapasa akgtum takanajla nema malakgachakgoy kguerra tiku anta tapakgsinikgoy?

◼ ... MALAKGATUMIY NIXAXLIKANA TAMASIY. Atsinu ni putum takanajla masiyakgoy pi wi tuku kgalhiyaw nema nila taʼakxilha chu ni niy akxni niyaw. Lhuwa takanajla limaklakaskinkgoy uma tamasiy xlakata nakaliʼakgskgawikgoy tiku makgtanumakgolh kxtakanajlakan, kamatajikgoy akxni katlawanikgoy oración tiku kanininit. Pero Biblia ni wa tama masiyay, anta wan: «Xlakata tiku staknankgoy liwana katsikgoy pi nanikgoy pero wantiku nikgonita, nialh tuku katsikgoy» (Eclesiastés 9:5). Jesús masiyalh pi tiku nikgonit nakamalakastakwanikan, pero uma ni xlakaskinka xwa komo chatum kristiano kgalhi tuku ni niy (Juan 11:11-25). ¿Masiyay mintakanajla pi wi tuku kgalhiyaw nema ni niy akxni niy kintiyatliwakan?

◼ ... MASTAY TALAKASKIN KAʼANALH TALAKGXTUMIT XALIMAXANA. Kmakgapitsi laklanka kachikinin, wilakgolh takanajla nema mastakgoy talakaskin pi sacerdotes nawankgoy lakchixkuwin tiku tatalakgxtumikgoy xtachixku chu lakpuskatin tiku tatalakgxtumikgoy xtapuskat chu kawanikgoy mapakgsinanin pi kakamamakgoxtokgli tiku akxtum tawi xtachixku o xtapuskat. Asta makgapitsi takanajla tiku nitlan akxilhkgoy talakgxtumit xalimaxana nitu wankgoy akxni tiku pulalinkgoy takanajla kalekgamanankgoy laktsu kamanan. Pero ¿tuku masiyay Biblia xlakata uma? Biblia liwana wan: «Ni katakgskgawitit, xampi na ni mpala wa nti xakgtsankgatayanin, chu xlakatakilhputananin ntu nkaj tatlawamakxtu, chu ni mpala wa nti makuanankgoy, chu lakchajan nti akxtum lamapakgsiy, chu nti latatalakgxtumikgoy akxtum nchixkuwin [...] ni katilakgchankgolh kxtapakgsin Dios» (1 Corintios 6: 9, 10). ¿Katsiya wix xlakata akgtum takanajla nema mastakgoy talakaskin katlawaka talakgxtumit xalimaxana?

¿Tuku nakaʼakgspula takanajla nema mastakgoy xamasni tawakat? Jesús makatsininalh: «Xlipaks nkiwi wa ntu ni mastay ntlan xatawakat, nakakan, namapukan klhkuyat» (Mateo 7:19). Chuna xla, nixaxlikana takanajla natankamikan chu namasputukan. Pero, ¿la nalay chu tuku nalikatsiyaw akxni chuna nalay? Akgtum tuku limaʼakxilhnanka nema wi klibro xla Apocalipsis xalak Biblia, kcapítulo 17 chu 18 kinkawaniyan la nakgantaxtuy.

¿La namasputukan nixaxlikana takanajla?

Katlawa la komo akxilhpat uma. Kstipun tantum lapanit xalixkajni nema kgalhiy akgtujun xakgxakga chu kgankaw xʼakgalokgot kgetawilanit chatum puskat tiku tanu tanu lakchixkuwin tatalakgxtumi (Apocalipsis 17:1-4). ¿Tiku kilhchanima? Tama puskat kgalhiy «limapakgsin kxokgspun reyes xala katiyatna», lhakganit xatsutsokgo xlhakgat, limaklakaskin limajinin chu lu lhuwa tumin kgalhiy. Nachuna, na wa xlakata xtaskuwan, «liakgtsankgatayakgolh xlipaks ntachixkuwitat» (Apocalipsis 17:18; 18:12, 13, 23). Wa Biblia kinkamasiyaniyan pi uma puskat akgtum tamakxtumit xla takanajla nema wilakgolh xlikalanka katiyatni. Ni litaxtuy kaj akgtum takanajla, wata kilhchanima putum takanajla nema mastay xamasni tawakat.

Chu lapanit, litaxtuy laklanka tamapakgsin xla xlikalanka katiyatni (Apocalipsis 17:10-13).a Kstipun lapanit kgetawilanit nixaxlikana takanajla, malaksakniputun tuku natlaway chu pulalinputun.

Pero kaj xalan nalay tuku nilay tamakanajla: «Chu nkgankaw akgalokgot ntu ukxilhnita animalh [o lapanit], wa yuma naxkajnikgoy mpuskat makuana, na kaxtum natlaway namalakgsputukgoy, chu na namapuxtunikgoy; na naxkaktinikgoy xliwa nawakgoy chu na klhkuyat nalhkuyukgoy» (Apocalipsis 17:16). Kaj xalan chu lipekua, laklanka tamapakgsin xalak katiyatni natalachipakgoy nixaxlikana takanajla chu liwana namasputukgoy. ¿Tuku xlakata chuna natlawakgoy? Libro xalak Biblia Apocalipsis wan: «Dios [“kawilinilh”, NM] kxnakujkan lakimpi natlawakgo wa ntu xla lakaskin» (Apocalipsis 17:17). Xlikana, Dios nakamalakgaxokgey nixaxlikana takanajla xlakata putum tuku lu nitlan litlawamakgolh anta kxtukuwani Dios. Nachuna, xlakata natlaway tuku xaʼakgstitum, nalimaklakaskin mapakgsinanin tiku katatalakgxtumiy xlakata nalimasputuy uma puskat nema kaj akgtum limasiy.

¿Tuku militlawat xlakata nichuna naʼakgspulayan la naʼakgspulay nixaxlikana takanajla? Xmakatsinina Dios wan: «Kalakgtaxtunitit wixin, wanti nkintalaksaknin» (Apocalipsis 18:4). La uku natsalaniyaw nixaxlikana takanajla. Pero, ¿niku naʼanaw? Ni wa nialh nakanajlaniyaw Dios, xlakata wantiku ni kanajlanikgoy Dios na nitlan katikakitaxtunilh (2 Tesalonicenses 1:6-9). Anta niku kaj watiya tlan natamakgtayayaw anta kxaxlikana takanajla. ¿Tuku nalilakgapasaw xaxlikana takanajla?

¿Tuku nalilakgapasaw xaxlikana takanajla?

¿Tukuya xatlan tawakat xlimastat xaxlikana takanajla? (Mateo 7:17.)

Xaxlikana takanajla litalakgapasa...

◼ ... XLAKATA LAPAXKIKGOY. Xaxlikana xlakskujnin Dios «ni katuxawat ntapakgsikgoy» o kakilhtamaku, ni lalakgmakgankgoy kaj xlakata xcolorkan chu ni lalakgmakgankgoy xlakata tanu tanu wilakgolh akgatunu kachikinin chu lakgalhini «ntapaxkit chatunu chatunu» (Juan 13:35; 17:16; Hechos 10:34, 35). Xlakan ni lamakgnikgoy, wata mastakgoy xlatamatkan xlakata xnatalan (1 Juan 3:16).

◼ ... LIPAWANKGOY XTACHUWIN DIOS. Wa xaxlikana takanajla ni masiyakgoy “xtapuwankan” nipara “xlimapakgsin chixkuwin”; wantuku masiyakgoy takilhtinit kBiblia, Xtachuwin Dios (Mateo 15:6-9). ¿Tuku xlakata? Xlakata «xlipaks yuma ntatsokgnun, paks timapuwanikgolh Dios lantla natsokgkgoy wanti tsokgkgonit, chu na luwa tlan nalimakgalhtawakganankan, chu nalimakgatanksninankan, chu nalistakyawanakan, chu nalimasiyukan wantu xaʼakgstitum natlawakan» (2 Timoteo 3:16).

◼ ... MATLIWAKGLHKGOY MAKXTUM NATAWILAKGOY FAMILIA, MAKGPUWANTININANKGOY XLAKATA XALAKATITUM NALATAMAKAN CHU CHUNA LILATAMAKGOY. Xaxlikana takanajla kamakgpuwantini lakchixkuwin pi «xlipaxkitkan xpuskatkan xtachuna mpi lu wa xmakni», kamakgtaya xapuskat «kamaxkilh kakni xchixku» chu kamasiyani kamanan pi “kakgalhakgaxmatkgolh wantu kalimapakgsi xtlatkan” (Efesios 5:28, 33; 6:1). Nachuna, tiku wi tuku kaliyawakanit xaʼakgstitum xlikgalhitkan xlatamatkan (1 Timoteo 3:1-10).

¿Wi akgtum takanajla nema tlaway chuna la akxilhwi? Wa libro Holocaust Politics, nema taxtulh 2001 wan: «Komo tlakg kristianos xlilatamakgolh tuku lichuwinankgoy chu tlawakgoy xtatayananin Jehová, ni xlalh el Holocausto [akxni kamakgnika lhuwa Judíos xliʼakgtiy Guerra nema tlawalh xliKalanka katiyatni] chu kkakilhtamaku na nialh xlamakgnikgolh xlakata alakatanu xalanin».

Xlikana, xtatayananin Jehová—nema skujmakgolh 235 laklanka kachikinin—ni kajwatiya lichuwinankgoy tuku wan Biblia xlakata tayat: tlawakgoy tuku anta wan. Kkamakgpuwantiniyan pi kakawani kamakgtayakgon xlakata nakatsiya tuku lakaskin Dios pi natlawayaw chatunu chatunu akinin xlakata kintakakninkan namakgapaxuwa. La uku kilhtamaku chuna militlawat. Ni katamakgapali. ¡Talakatsuwima xlisputni nixaxlikana takanajla! (Sofonías 2:2, 3.)

Komo tlakg katsiputuna xlakata tamakatsin xalak Biblia nema lichuwinankgoy xtatayananin Jehová, kkamakgpuwantiniyan pi kakatsokgnani kdirección nema wi kpakgalhu.

□ Klakaskin maktum folleto ¿Tuku kinkaskiniyan Dios? nema ni taxokgoy.

Katsokgti tukuya tachuwin.

□ Katlawatit litlan kakilaputsaw xlakata nakilimakgalhtawakgayatit chu nakilimasiyaniyatit Biblia.

[Notas nema wilakgo kpágina]

[Comentario xla página 3]

«Kalakgtaxtunitit wixin, wanti nkintalaksaknin»

[Comentario xla página 3]

Nixaxlikana takanajla kgalhi «limapakgsin kxokgspun reyes xala katiyatna»