Job ni makgatsankganani Dios

¿TLAN ni namakgatsankgananikgo xlakskujnin Dios akxni nakgalhikgo laklanka taʼakglhuwit, maski tasiya pi nitu katikalimakgtayalh? Chatum chixku wanikan Job wa uma tuku akgspulalh. Kaʼakxilhwi tuku kitaxtulh.

Job xfamilia Abrahán xwanit, xlama niku la uku wi Arabia kilhtamaku akxni israelitas xlamakgo kʼEgipto. Akgtum kilhtamaku tsukuka lichuwinankan Job kʼakgtum tamakxtumit nema Jehová xkatakgalhi ángeles kʼakgapun. Na anta xwi Satanás. Xlakatin putum ángeles Jehová lu tlan lichuwinalh Job xlakata ni xmakgatsankganani, chuna limasiyalh pi lu xlipawan. Pero Satanás limawakalh Job pi kskujnani Dios xlakata wi tuku xlakaskin, xlakata lhuwa tuku xmaxki chu xmakgtaya. Xla wa pi komo xmakgatsankgalh putum tuku xkgalhi, xmakgxtakgli Jehová.

Dios mastalh talakaskin pi Akgskgawini xmakglhtilh putum tuku xkgalhi, xkamanan chu awatiya, maxkilh tajatat. Xlakata Job ni xkatsi pi wa Satanás tiku xmalakgachanima putum tuku nitlan, nila liwana xkatsi tuku xlakata Dios xmastama talakaskin. Maski chuna, nikxni makgxtakgli Jehová.

Akxni ama kilhtamaku minkgolh lakgapaxialhnankgo kgalhtutu tiku xwankgo pi xʼamigos chu tsukukgolh katuwa wanikgo. Xlakata tuku wanikgolh lhuwa tatsokgnit klibro xalak Biblia nema wanikan Job, xmalakpuwaniputunkgo pi xmalakgaxokgema Dios xlakata xatsekg xtlawanit talakgalhin. ¡Lu nitlan tuku xwanimakgo! Asta wankgolh pi Dios ni xlakaskinka kaʼakxilha xlakskujnin chu nipara kalipawan. Pero Job ni kgaxmatputulh uma nitlan talakapastakni chu kawanilh pi ni katimakgatsankgananilh Dios asta akxni xnilh.

Xlakata putum tuku wanikgolh, Job tlakg xlakaskinka akxilhli xlakata la xkakgalhtilh. Elihú, chatum kgawasa tiku kgaxmatli putum tuku wankgolh, stakyawalh xlakata tlakg xlakaskinka xʼakxilha la naʼakxilhkgo amakgapitsi chu ni wa xtukuwani chu xlimapakgsin Jehová. Nachuna, tliwakga kastakyawalh nixaxlikana xʼamigos Job.

Xaʼwatiya, Jehová stakyawalh Job. Limaklakaskilh tuku malakatsukinit chu masiyanilh pi chatum chixku nitu litaxtu akxni tamalakxtumikan la xlilanka Dios. Job tataktujulh chu makgamakglhtinalh tastakyaw. Chu Jehová tiku «lu tlan xtapuwan [o xapaxkina] y kalakgalhaman» makglhtilh tajatat chu tlakg lhuwa maxkilh tuku xkgalhi nixawa la pulana chu maxkipa xkamanan (Santiago 5:11, TXC). Xlakata Job ni makgatsankgananilh Dios uma liwana kgalhtilh Satanás chu limasiyalh pi latamanin tlan ni namakgatsankgananikgo Dios akxni nakgalhikgo laklanka taʼakglhuwit.

(Takilhtinit kJob.)