La talakgatumilh xalakwan xalaksasti tamakatsin

AKXNI kstalanina Cristo wa, Pablo lu lhuwa tsukulh lichuwinan xTamapakgsin Dios. Pero la uku xla xʼama tayani lhuwa taputsastalanit. Uma apóstol tiku lu skulujwa xwanit, makglhuwa alh latapuli xlakata nalichuwinan tamapakgsin nema xʼama makgantaxti tuku xlakapastaknit Dios xlakata latamanin.

Akxni xapulana alh latapuli, alh kListra chu kuchilh chatum chixku tiku lata aktsinajku nila xtlawan. Latamanin tiku akxilhkgolh wankgolh pi Pablo chu Bernabé dioses xwankgonit. Xlakan atakgalana tlawakgolh pi latamanin ni xkamaxkikgolh tamakamastan. Pero latamanin tiku kakgalhakgaxmatkgolh tiku ni xkaʼakxilhputunkgo Pablo, lilaktalawilikgolh chiwix. Maski lakpuwankgolh pi xmakgnikgonit, Pablo ni nilh chu alistalh taspitpa kkachikin xlakata nakamatliwakglha kstalaninanin Cristo.

Alistalh, makgapitsi kstalaninanin Cristo tiku judíos xwankgonit wankgolh pi wantiku ni judíos xafuerza xkgalhakgaxmatkgolh Limapakgsin nema maxkika Moisés. Xlakata tlan xlakkaxtlawalh taʼakglhuwit, Pablo kalinilh uma taʼakglhuwit apóstoles chu lakgkgolotsin xalak Jerusalén. Akxni liwana xputsananikgonita xTachuwin Dios chu skinikgolh xtamakgtay espíritu santo, xlakan katsokgnanikgolh congregaciones chu kawanikgolh pi ni xkakninanikgolh ídolos, ni xwakgolh kgalhni, liwa nema kgalhi kgalhni chu na ni xtlawakgolh talakgxtumit nema ni xlitatlawat. Uma limapakgsin «xlakaskinka» xwanit, pero ni xwamputun pi kstalanika Limapakgsin nema maxkika Moisés (Hechos 15:28, 29).

Akxni xlimakgtiy alh latapuli, Pablo alh kBerea akgtum kachikin nema xwi niku la uku wi Grecia. Judíos tiku anta xlamakgolh xatapaxuwan makglhtinankgolh uma tamakatsin, chali chali xlakputsananikgo xTachuwin Dios xlakata liwana nakatsikgo komo xlikana wantuku xkatsinimakgolh. Alistalh, Pablo katsalanipa tiku ni xakxilhputunkgo. Alh asta kAtenas, chu alh kxlakatin latamanin tiku lhuwa tuku xlakgapaskgo chu mastalh akgtum lu lilakgatit taʼakgchuwin chu ni limakgasitsinalh chu akinin na tlan chuna natlawayaw.

Akxni xlimakgtutu kilatapulilh, Pablo alh kJerusalén. Akxni alh ktemplo lhuwa latamanin xmakgniputunkgo. Pero soldados xalak Roma makgtayakgolh chu linka Pablo xlakata naputsananikan. Xlakata xalak Roma xwanit, maxkika talakaskin xlinilh taʼakglhuwit mapakgsina Félix. Judíos nikxni tlan limasiyakgolh tuku xlimawakamakgo. Maski chuna, Festo tiku tawi xlakgxokgo Félix xʼama kamakamaxki judíos. Xlakata nichuna xtlawaka, Pablo wa pi xlakkaxtlawalh César, wa xlakata mapakgsina kgalhtinalh: «Pus wa César nalakgpina» (Hechos 25:11, 12).

Xʼamaka lakaxtlawakan kRoma. Wa xlakata Pablo alh kʼItalia pero barco laklatayalh chu tamakgxtakgli kʼisla wanikan Malta chu anta titaxtulh kinvierno. Akxni chalh kRoma, akgtiy kata tawi kʼakgtum chiki nema xlakgaxokgomaka. Maski tachin xwi Pablo, chuntiya lhuwa xkalitachuwinan xlakata xTamapakgsin Dios wantiku xlakgapaxiʼalhnankgo.

(Takilhtinit kHechos 11:22–28:31.)