Samuel putum kilhtamaku tlawalh xtalakaskin Jehová

Lata akxni Samuel aktsujku xwanit, xwi chu skujli ktabernáculo, niku latamanin xʼankgo kakninanikgo Jehová. ¿Katsiputuna tuku xlakata Samuel anta xwi? Xlakata nakatsiyaw, pulana kalakgapaswi Ana xtse Samuel.

Lhuwa kata Ana xkgalhiputun skgata, pero nila xkgalhi. Wa xlakata Ana tlawanilh oración Jehová chu skinilh: «Jehová katlawa litlan, kakimakgtaya». Chu wanilh: «Komo nakkgalhi chatum aktsu kgawasa, nakmalakgacha ktabernáculo xlakata anta natawila chu naskuja». Jehová kgalhtilh xʼoración chu tlawalh pi xkgalhilh aktsu kgawasa. Limapakuwilh Samuel. Chuna la Ana xwaninit Jehová, akxni Samuel xkgalhi max akgtutu o akgtati kata, lilh ktabernáculo xlakata anta kskujnilh Dios.

Elí xapuxku sacerdote xwanit, tiku xpalakachuwinan latamanin xlakatin Dios. Chatiy xkamanan tiku laklankata na sacerdotes xlitaxtukgo. Xlakata ktabernáculo xkakninanikan Dios, tiku anta xwilakgolh xlitlawatkan tuku tlan. Pero Samuel xakxilha tuku nitlan xtlawakgo xkamanan Elí. ¿Tlawalh Samuel tuku nitlan chuna la xkamanan Elí? ¿Tuku lakpuwana?... Ni, xla putum kilhtamaku tlawalh tuku Jehová xlakaskin, chuna la xnatlatni xmasiyanikgonit.

¿Tuku lakpuwana pi xtalakaskin xtlawalh Elí? ¿Lakpuwana pi xtalakaskin nakastakyawa xkamanan?... Xtalakaskin xkastakyawalh, chu nialh xkamaxkilh talakaskin naskujkgo ktabernáculo. Pero nichuna tlawalh, wa xlakata Jehová lu sitsinilh Elí chu chatiy xkamanan chu lakkaxwililh nakamalakgaxokge.

Akgtum tsisni akxni Samuel klhtatama, kgaxmatli pi xwankan: «¡Samuel!». Xla lakapala alh niku xwi Elí pero Elí wanilh: «Nitu ktasaniman». Pero amakgtiy chuna kgaxmatpa. Chu xlimakgtutu, Elí wanilh Samuel: «Komo nakgaxmatparaya pi wi tiku tachuwinaman, kakgalhtinanti: “Kachuwinanti Jehová, akit kkgaxmatma”». Akxni Samuel chuna tlawalh Jehová wanilh: «Kawani Elí pi nakmalakgaxokge xfamilia xlakata putum tuku nitlan tlawamakgolh». ¿Tuwa makgkatsilh Samuel nawani Elí tuku xʼama la? ¿Tuku lakpuwana?... Max lu tuwa makgkatsilh. Samuel pekualh akxni wanilh Elí tuku xʼama akgspula. Pero maski Samuel lu xpekuanit, kgalhakgaxmatli Jehová chu wanilh putum tuku xʼama tlawa. Chu tuku Dios wa xlikana kgantaxtulh. Elí chu xkamanan nikgolh.

Lhuwa tuku kinkamasiyaniyan Samuel. Maski akxilhli pi amakgapitsi xtlawamakgolh tuku nitlan, xla putum kilhtamaku tlawalh tuku Jehová xlakaskin. Wix, ¿nachuna natlawaya? ¿Chuna la Samuel litaxtuputuna chu kgalhakgaxmatputuna Jehová? Komo chuna natlawaya namakgapaxuwaya Jehová chu minatlatni.