¿Tuku tlan natlawaya komo akstu makgkatsikana chu pekuana?

Kaʼakxilhti aktsu kgawasa nema wi kdibujo. Tasiya pi xakstu wi chu pekuanit, ¿ni xlikana? ¿Minit kilhtamaku akxni pekuanti?... Kimputumkan min kilhtamaku pekuanaw. Biblia lichuwinan makgapitsi xlakskujnin Jehová tiku maski xpaxkikgo, na makgkatsikgolh pi xakstu xwilakgolh chu pekuankgolh. Chatum wa Elías. Kaʼakxilhwi tuku akgspulalh.

Elías latamalh kʼIsrael makgasa, akxni Jesús nina xlakachin. Acab xmapakgsinama kʼIsrael chu ni xpaxki xaxlikana Dios Jehová. Acab chu xpuskat Jezabel, xkakninanikgo nixaxlikana dios nema xwanikan Baal. Wa xlakata, lhuwa latamanin xalak Israel na xkakninanikgo Baal. Mapakgsina Jezabel lu nitlan xlikatsi chu xkamakgniputun putum tiku xkgalhakgaxmatkgo Jehová. Chu xlakata Elías kskujnani Jehová, ¡na xmakgniputun! ¿Tuku tlan xtlawalh Elías? ¿Tuku xtitlawa wix?...

Elías tsalalh. Alh lakgamakgat kdesierto chu tatsekgli kʼakgtum lanka lhuku. ¿Tuku xlakata anta tatsekgli?... Xlakata xpekuanit. Pero Elías ni xlipekuanat xwanit. ¿Tuku xlakata? Xlakata xkatsi pi Jehová tlan xmakgtayalh. Jehová xlimasiyaninita Elías xlitliwakga. Makgtum wa akxni Jehová kgalhtilh xʼoración chu makamincha lhkuyat kʼakgapun. ¿Ni xlikana pi Jehová kgalhi lhuwa litliwakga? Chuna. ¡Elías tlan xlipawa Jehová!

Akxni Elías xwi klanka lhuku, Jehová tachuwinalh chu kgalhskilh: «¿Tuku tlawapat unu?» Elías kgalhtilh: «Pulana lhuwa latamanin xkgalhakgaxmatnikgoyan, pero la uku kaj kiʼakstu xwi. Chu kpekuama xlakata na nakimakgnikan». Elías xlakpuwan pi putum tiku xkakninanikgo Jehová xkamakgnikanita. Pero Jehová wanilh: «Ni miʼakstu wila. Wilakgolh akgtujun mil latamanin tiku chuntiya kinkakninanikgo. Ni kapekuanti xlakata nakmaxkiyan atanu taskujut». Akxni Dios chuna wanilh, ¿la makgkatsilh Elías?... ¡Lu lipaxuwalh!

Kalakpuwanti tuku akgspulalh Elías. ¿Tuku masiyaniyan?... Pi namin kilhtamaku namakgkatsiya pi miʼakstu wila chu napekuana. Pero akxni chuna makgkatsiya, kalakapastakti uma, wix kgalhiya lhuwa amigos tiku paxkikgo Jehová chu na paxkikgoyan. Chu kalakapastakti pi Jehová kgalhi lhuwa litliwakga, chu putum kilhtamaku namakgtayayan. ¿Lu lipaxuwaya xlakata katsiya pi nikxni miʼakstu wila?...