La kamasiyanikan kamanan

Akxni Jehová malakatsukilh familia, kalakgayawalh natlatni nakuentajtlawakgo xkamanankan (Colosenses 3:20). Xlakata wix xatlat, lakgchanan nakamasiyaniya minkaman napaxkikgo Jehová chu akxni nastakkgo tlan nalikatsikgo (2 Timoteo 1:5; 3:15). Nachuna, milikatsit tuku wi kxnaku. Chu liʼakxilhtit nema nakawiliniya na lu xlakaskinka. Xlakata tlakg tlan nakamasiyaniya minkamanan xTachuwin Dios, talakaskin pi pulana wix nawiliya kminaku (Salmo 40:8).

1 KAKAMAKGTAYA MINKAMANAN NATACHUWINANKGOYAN

TUKU WAN BIBLIA: “Liwana kakgaxpatti, ni lu lakapala kachuwinanti” (Santiago 1:19). Max wix lakaskina pi minkamanan tlan natachuwinankgoyan. Xlakata chuna nala, pulana kakalimasiyani pi kakgaxpatniputuna akxni nalakaskinkgo. Katlawa pi kaʼanalh tapaxuwan xlakata tlan nawanikgoyan tuku makgkatsikgo (Santiago 3:18). Komo xlakan namakgkatsikgo pi nakakilhniya o nakaliwaniya, max nitu katiwanikgon. Ni lakapala kasitsi chu kakawani pi kapaxkiya (Mateo 3:17; 1 Corintios 8:1).

TUKU TLAN XTLAWA:

• Kalimaxtu kilhtamaku akxni minkamanan nachuwinamputunkgo

• Ni xmakgasni kakatachuwinanti minkamanan, ni kaj akxni anan taʼakglhuwit

2 KAʼAKGATEKGSTI TUKU WAMPUTUNKGO

TUKU WAN BIBLIA: «Tiku limasiyama liskgalala akxni wi tuku tlawama tlan nakitaxtuni» (Proverbios 16:20). Min kilhtamaku, talakaskin atanu tuku natlawaya xlakata nakatsiya tuku makgkatsikgo. Kamanan malakatsalikgo tuku wankgo maski nichuna lakpuwamakgolh. «Akxni wi tiku kgalhtinan akxni nina liwana kgaxmatnit, xatonto.» (Proverbios 18:13.) Wa xlakata, ni tunkun kasitsi (Proverbios 19:11).

TUKU TLAN XTLAWA:

• Akxni minkgawasa chuwinama ni kamakgtanu nipara kalipekuanti xlakata tuku nawaniyan, maski tuwa

• Kalakapastakti la xmakgkatsiya wix chu tuku tlakg xlakaskinka xakxilha akxni na watiya kata xkgalhiya

3 WATIYA TUKU KAMASIYATIT

TUKU WAN BIBLIA: «Kakgaxpatti, kinkgawasa, xtastakyaw mintlat chu chuntiyaku kakgalhakgaxpatti xlimapakgsin mintse» (Proverbios 1:8). Jehová kamaxkinit limapakgsin xatlat chu xatse. Xchatiykan namasiyanikgo pi nalakgachixkuwinankgo chu nakgalhakgaxmatnankgo (Efesios 6:1-3). Kamanan akxilhkgo akxni wixin natlatni ni «makxtum [...] lantla nalakapastakatit» (1 Corintios 1:10). Wa xlakata, komo wi tuku ni akxtum lakapastakatit, ni xlakatin kamanan kalakilhnitit, max natlawa pi nialh katikamaxkikgon kakni.

TUKU TLAN XTLAWA:

• Kalakkaxwilitit la nakastakyawayatit minkamankan

• Komo ni akxtum lakapastakatit la nakamasiyaniyatit minkamanankan, kaʼakgatekgsti tuku xlakata chuna lakpuwan tiku tamakgaxtokga

4 KALAKKAXWILI LA NAKAMASIYANIYA

TUKU WAN BIBLIA: «Kamamakgatawakga kgawasa xlakata tiji niku xliʼanat» (Proverbios 22:6). Komo lakaskina pi tlan kakitaxtunin akxni nakamasiyaniya minkamanan, talakaskin wi tuku natlawaya. Kalakkaxwili la nakamasiyaniya chu la nakastakyawaya (Salmo 127:4; Proverbios 29:17). Kastakyawakan ni kaj kilhchanima nakamalakgaxokgekan, na kilhchanima nakamakgtayakan naʼakgatekgskgo tuku xlakata chuna kawilinikan makgapitsi limapakgsin (Proverbios 28:7). Kakamasiyani napaxkikgo xTachuwin Dios chu naʼakgatekgskgo tastakyaw nema anta wi (Salmo 1:2). Chuna tlan talakapastakni nakgalhikgo (Hebreos 5:14).

TUKU TLAN XTLAWA:

• Kaliskujti xlakata minkamanan naliʼakxilhkgo Dios la tiku xlikana lama nema tlan lipawankan

• Kakamakgtaya nakatsikgo tuku xlitlawatkan akxni wi tuku nitlan nakatlawaniputunkan, la akxni tuku taxtukgo kʼInternet o kredes sociales. Kakamasiyani natsalanikgo tiku kalikgamanamputunkgo