PULAKNAJATSA
Kakatakakninani Jehová mifamilia
«Nkalakgatakilhputatit yama nti ntlawanit akgapun, chu ntiyat.» (Apocalipsis [Revelación] 14:7)
Chuna la akxilhti kʼuma folleto, Biblia limin lhuwa tastakyaw nema namakgtayayan wix chu mifamilia. Jehová lakaskin pi kapaxuwatit. Nachuna, wan pi komo pulana nakakninaniyatit «putum tuku maklakaskinatit nakamaxkikanatit» (Mateo 6:33, TNM). Dios miʼamigo litaxtuputun. Wa xlakata, kalimaklakaskinti putum tuku kgalhiya xlakata tlan natalalipina, ni anan atanu tlakg xalanka talakgalhaman nema nakgalhiyaw (Mateo 22:37, 38).
1 KAMATLIWAKGLHTI LA TALALIPINA JEHOVÁ
TUKU WAN BIBLIA: «Mintlatkan nakwan, chi nchu wixin, xtachuna nkilakgskgatan nawanatit, wan nkimPuchinakan» Jehová (2 Corintios 6:18). Dios miʼamigo wamputun chu oración namakgtayayan natalakatsuwiniya. Chu asta Jehová kinkawaniyan: «Ni anan xtajaxni nkatlawatit mioraciónkan» (1 Tesalonicenses 5:17). Xla lakaskin nawaniyaw tuku lilipuwanaw chu tuku wi kinakujkan (Filipenses 4:6). Komo akxtum tatlawaya oración mifamilia xlakan naʼakxilhkgo pi lu xlikana akxilha Dios.
Pero ni kajwatiya natachuwinana Dios, na talakaskin nakgaxpatniya. ¿La natlawaya? Nalikgalhtawakgaya xTachuwin chu likgalhtawakga nema anta takilhti (Salmo 1:1, 2). Kalilakpuwanti tuku katsinitilhaya (Salmo 77:11, 12). Xlakata nakgaxpatniya Dios na talakaskin napina ktamakxtumit (Salmo 122:1-4).
Atanu la na tlan namatliwakglha la talalipina Jehová wa nakalitachuwinana amakgapitsin. Akxni makglhuwa chuna natlawaya, tlakg natalakatsuwiniya (Mateo 28:19, 20).
TUKU TLAN XTLAWA:
Katlawa oración chu chali chali kalikgalhtawakga Biblia
Kamakgtaya mifamilia pulana nawilikgo xlakata takanajla nixawa tuku nalilakgastanankgo
2 KALIPAXUWA LA KAKNINANIYA DIOS KFAMILIA
TUKU WAN BIBLIA: «Katalakatsuwinitit Dios chu xla nakatalakatsuwiniyan» (Santiago 4:8, TNM). Kalakkaxwili kilhtamaku chu hora xlakata nakgalhiyatit akgtum programa akxni nakakninaniyatit Dios kfamilia (Génesis 18:19). Pero ni kajwatiya uma: chali chali kaputsa xtamakgtay Dios chu kamatliwakglhti la talalinkgo mifamilia. Biblia wan: «Nakalitachuwinana [Jehová] akxni natawilaya kminchik chu akxni lapat ktiji chu akxni pimpata lhtataya chu akxni natakiya» (Deuteronomio 6:6, 7). Nachuna kalakkaxwili natlawaya la Josué akxni wa: «Pero akit chu putum kinchik, akinin naskujniyaw Jehová» (Josué 24:15).
TUKU TLAN XTLAWA:
Kalakkaxwili akgtum programa xlakata tuku nakamasiyaniya chuna la mifamilia maklakaskinkgo