Aktsu tsumat lakastakwanan

Jairo aku akxilhli la Jesús mapaksalh puskat tiku xlakgstajma, wa xlakata katsi pi na tlan namakgtaya xtsumat, maski lakpuwama pi max ninita (Mateo 9:18). ¿Wi tuku tlan natlawa Jesús xpalakata aktsu tsumat?

Akxni Jesús tachuwinamajku puskat tiku mapaksalh, chinkgo makgapitsi lakchixkuwin tiku minkgoyacha kxchik Jairo chu wanikgo: «¡Mintsumat nilha! Nialh kamakglhuwi Makgalhtawakgena» (Marcos 5:35).

Tamakatsinin lu makgalipuwan. Uma chixku tiku lu lakgapaskan kkachikin, ni katsi tuku natlawa xlakata tuku wanika. ¡Kaj xachastum xtsumat ninit! Pero Jesús, tiku kgaxmatli tuku wanika, lakaʼakxilha chu limaʼakgpuwantini uma tachuwin: «Ni kapekuanti, kajwatiya kalimasiya takanajla» (Marcos 5:36).

Jesús taʼan asta kxchik. Akxni chankgo, lhuwa tachilimaka. Latamanin tasamakgolh chu akstu kakuxmukgaximaka xlakata lakglipuwamakgo aktsu tsumat. Jesús tanu kchiki chu kawani tuku kaks kamalakawani: «Aktsu tsumat nitu ninit kaj lhtatama» (Marcos 5:39). Akxni kgaxmatkgo uma, latamanin tsukukgo likgalhkgamanankgo xlakata katsikgo pi tsumat ninit. Pero Jesús nakalimasiyani pi xlimakgatliwakga Dios tlan namaxkipara latamat tiku ninit, xtachuna la mastaknikan tiku lu lhtatanit.

Jesús tlawa pi kataxtukgolh putum tiku wilakgo kchiki, kajwatiya Pedro, Santiago, Juan chu xnatlatni aktsu tsumat tamakgxtakgkgo. Alistalh an niku ma aktsu tsumat, makgachipa chu wani: «Tálitha cúmi», nema akxni matitaxtikan kʼatanu tachuwin wamputun: «Aktsu tsumat, akit kwaniyan: “¡Kataki!”» (Marcos 5:41). Chu aktsu tsumat tunkun taki chu tsuku tlawan. ¡Kalilakpuwanti la lipaxuwakgo Jairo chu xpuskat! Alistalh, Jesús kawani pi kamawikgolh aktsu tsumat, chuna limasiya pi xlikana staknama.

Jesús kawani xnatlatni aktsu tsumat pi ni kalichuwinankgolh tuku tlawanit xpalakatakan, chuna la kawaninit amakgapitsi latamanin tiku kamapaksanit. Pero tamakatsin xlakata «tuku lalh takatsilh kxlilakgatum ama kachikin» (Mateo 9:26). Xlikana, komo xakxilhti pi mintalilakgapasni o miʼamigo malakastakwanika, xlichuwinanti. Chuna la wankgo Evangelios, uma wa xlimakgtiy tamalakastakwanit nema tlawa Jesús.