Jesús malakastakwani Lázaro

Akxni Jesús xkatatanokglhnita Marta chu María lakatsu kBetania, akxtum kataʼan niku maknukanit Lázaro, kʼakgtum lhuku nema lilakgatalakanit chiwix. Akxni anta wi, xla limapakgsinan: «Kamakgenutit chiwix». Marta ni katsi tuku tlawaputun, wa xlakata wani: «Malana, max puksamaja, xlakata xliʼakgtatita kilhtamaku». Pero xla kgalhskin: «¿Ni kwanin pi komo xlikana nakanajlaya xpimpat akxilha xlilanka Dios?» (Juan 11:39, 40).

Wa xlakata mapanukan chiwix. Chu Jesús talakayawa chu tlawa akgtum oración: «Tlat, kmaxkiyan paxtikatsinit xlakata kinkgaxpatninita. Xlikana, akit katsi pi putum kilhtamaku kinkgaxpatniya; chuna kwa xlakata makxtum kiliyakgolh latamanin, xlakata nakanajlakgo pi wix kimalakgachanita». Jesús tlawa oración kxlakatin amakgapitsin xlakata nakatsikgo pi tuku xla ama tlawa wa nalitlawa xlitliwakga Dios. Alistalh pixlanka wan: «¡Lázaro, kataxtu!». Chu Lázaro taxtu. Litamakgswitnit laktitsu lhakgat lata kxtantun asta kxʼakgxakga. Jesús wan: «Kamakgxkuttit chu kamaxkitit talakaskin natlawan» (Juan 11:41-44).

Judíos tiku minkgonit makgoxamixikgo María chu Marta akxilhkgo uma milagro chu kanajlanikgo Jesús. Pero amakgapitsin talakgan fariseos chu kawanikgo tuku Jesús tlawanit. Uma kilhtamaku fariseos chu xanapuxkun sacerdotes mamakxtumikgo Sanedrín, tlakg xlakaskinka tribunal judío. Chatum tiku anta tapakgsi wa xapuxku sacerdote, Caifás. Makgapitsi taʼakglhuwikgo chu wankgo: «¿Tuku natlawayaw, xlakata uma chixku tlawa lhuwa milagros? Komo nitu natlawaniyaw, putum nakanajlanikgo, chu xalak Roma naminkgo chu nakinkamakglhtikgoyan templo chu nachuna kinkachikinkan» (Juan 11:47, 48). Xlakan katsikgo pi Jesús «tlawa lhuwa milagros» xlakata tiku kalitachuwinankgonit akxilhkgonit umakgolh milagro. Pero ni lipaxuwakgo pi Dios maklakaskima Jesús xlakata natlawa putum uma. Tuku tlakg lilakgaputsakgo wa pi ni nakamakglhtikan limapakgsin nema kgalhikgo.

Xtalakastakwanat Lázaro limasiya pi nixlikana tuku wankgo saduceos, tiku ni kanajlanikgo talakastakwanat. Caifás, tiku saduceo tsuku chuwinan: «Wixin ni akgatekgsatit tuku lama, wixin ni akgatekgsatit pi kachikin tlakg xlakaskinka nixawa chatum lataman. Tlakg tlan xla naniy nixawa putum kachikin namalakgsputukan» (Juan 11:49, 50; Hechos 5:17; 23:8).

Caifás ni xʼakstu chuna wan, wa Jehová tiku tlawa pi kalichuwinalh tuku x’ama lay xlakata xla xapuxku sacerdote. Tuku tlawaputun Caifás wa pi kamakgnika Jesús xlakata chuntiya nakgalhikgo limapakgsin xpulalinanin takanajla. Pero tuku Caifás lichuwinan masiya pi xlinin Jesús nakalakgmaxtu judíos chu putum «xkamanan Dios nema kamaʼakgawanikanit» (Juan 11:51, 52).

Xaʼawatiya, Caifás tlawa pi Sanedrín naputsa la namakgni Jesús. Pero chuna la katsiw, chatum tiku tapakgsi kSanedrín nema wanikan Nicodemo, lakgalhaman Jesús. ¿Namakatsini tuku tlawaputun Sanedrín? Ni katsiyaw, pero Jesús taxtu kJerusalén chu uma tlawa pi ni namakgnikan xlakata nina chan kilhtamaku nema Dios lakkaxwilinit.