Pablo chu Timoteo

Timoteo chatum tala tiku kgawasaku xwanit kcongregación xalak Listra. Xtlat griego xwanit, chu xtse judía. Xtse xwanikan Eunice, chu xnana o xtsiyuna, Loida. Xlakan masiyanikgolh xlakata Jehová lata aktsujku xwanit.

Akxni Pablo xlimakgtiy lakgapaxialhnalh Listra xlakata xlichuwinama Dios, akxilhli pi Timoteo xlikana xkapaxki natalan chu putum kilhtamaku xkamakgtayaputun. Wa xlakata, Pablo wanilh Timoteo pi xtaʼalh xlakata nalichuwinankgo Dios. Titaxtulh kilhtamaku Pablo masiyanilh Timoteo la tlan makgalhtawakgena xwa chu xlichuwinalh xalakwan xtamakatsin Dios.

Espíritu santo xkapulalin Pablo chu Timoteo kaxanikawa niku xʼankgo. Akgtum tsisni, wi tuku makxilhnika Pablo. Akxilhli chatum chixku tiku wanilh pi xʼalh kMacedonia xlakata xkamakgtayalh. Wa xlakata Pablo, Timoteo, Silas chu Lucas ankgolh lichuwinankgo Dios chu lakkaxwilikgolh congregaciones anta.

Kkachikin Tesalónica nema xtapakgsi kMacedonia, lhuwa lakchixkuwin chu lakpuskatin, kstalaninanin Cristo litaxtukgolh. Pero makgapitsi judíos xkalakgkatsananikgo Pablo chu tiku xkataʼan. Kamamakxtumikgolh lhuwa latamanin tiku nitlan xlikatsikgo chu kaxwatalinkgolh natalan niku xwilakgo mapakgsinanin xalak kachikin. Judíos pixlanka xwankgo: “¡Umakgolh lakchixkuwin xtalatlawananin mapakgsina xalak Roma!”. Xlatamat Pablo chu Timoteo kalipekua xwilakgo, wa xlakata tsalakgolh kBerea kkatsisni.

Latamanin xalak Berea xkgaxmatputunkgo xalakwan xtamakatsin Dios chu lhuwa griegos chu judíos kanajlakgolh. Pero minkgolh makgapitsi judíos xalak Tesalónica, xlakata namatsukikgo taʼakglhuwit. Wa xlakata, Pablo alh kʼAtenas. Timoteo chu Silas tamakgxtakgkgolh kBerea xlakata nakamatliwakglhkgo natalan. Titaxtulh kilhtamaku, Pablo malakgachapa Timoteo kTesalónica xlakata xkamakgtayalh natalan natayanikgo taputsastalanit nema xʼanan anta. Alistalh, Pablo malakgachalh Timoteo nakalakgapaxialhnan chu nakamatliwakglha lhuwa amakgapitsi congregaciones.

Pablo wanilh Timoteo: “Tiku naskujnaniputunkgo Jehová nakaputsastalanikan”. Timoteo putsastalanika chu na tamaknuka kpulachin xpalakata xtakanajla. Pero xla xpaxuwa xlakata chuna tlan xlimasiya pi ni xmakgxtakga Jehová.

Pablo kawanilh filipenses: “Nakkamalakgachaniyan Timoteo. Xla nakamasiyaniyan la chuntiya nalatapayatit kxtiji xaxlikana chu la nalichuwinanatit Dios”. Pablo xlipawan Timoteo. Akxtum skujnikgolh Dios akglhuwa kata chu lu tlan amigos xwankgonit.