TAKGALHTAWAKGA 20
¿La lakkaxwilikanit congregación?
Jehová ni lakaskin pi wi tuku akglakgwa katawi (1 Corintios 14:33). Wa xlakata, xkachikin liwana talakkaxtawilanit. ¿La lakkaxwilikanit congregación xla kstalaninanin Cristo? ¿Tuku tlan natlawayaw xlakata putum tlan nakitaxtu?
1. ¿Tiku xapuxku litaxtu kcongregación xla kstalaninanin Cristo?
«Cristo xʼakgxakga congregación» (Efesios 5:23). Lata kʼakgapun Jesús pulalima xkachikin Jehová kxlikalanka katiyatni. Laksakli «skujni xatalipaw chu xaskgalala»: uma skujni wa makgapitsi lakgkgolotsin tiku makgasata skujnimakgo Jehová chu kalilakgapaskan la Lakgkgolotsin tiku Pulalinankgo (kalikgalhtawakga Mateo 24:45-47). Umakgolh lakgkgolotsin pulalinkgo congregación kxlikalanka katiyatni chuna la xtlawakgo apóstoles chu lakgkgolotsin xalak Jerusalén kxapulana siglo (Hechos 15:2). Pero umakgolh lakchixkuwin ni napuxkun litaxtukgo kxkachikin Jehová. Putsakgo xtapulalit Jehová chu xTachuwin chu tlawakgo tuku Jesús kalimapakgsi.
2. ¿Tuku taskujut lakgayakgo lakgkgolotsin?
Lakgkgolotsin wa kstalaninanin Cristo tiku tliwakga kgalhikgo xtakanajlakan. Xlakan makgalhtawakgenanin litaxtukgo xlakata masiyakgo tuku wan Biblia. Nachuna, kamakgtayakgo chu matliwakglhkgo congregación. Umakgolh lakchixkuwin ni kaxokgonikan. Wata «xatapaxuwan [skujkgo] chuna la lakaskin Dios», ni chuna tlawakgo kaj xlakata lhuwa tuku kgalhiputunkgo (1 Pedro 5:1, 2). Siervos ministeriales kamakgtayakgo lakgkgolotsin, xlakan na tlan namakgantaxtikgo tuku taskin xlakata lakgkgolotsin nalitaxtukgo alistalh.
Lakgkgolotsin tiku Pulalinankgo, kalaksakkgo makgapitsi lakgkgolotsin xalak congregación xlakata superintendentes de circuito nalitaxtukgo. Umakgolh natalan kalakgapaxialhnankgo congregaciones, kawanikgo tuku xlitlawatkan chu kamakgpuwantinikgo. Nachuna, kalaksakkgo natalan xlakata lakgkgolotsin chu siervos ministeriales nalitaxtukgo akxni akxilhkgo pi makgantaxtimakgo tuku skin Biblia (1 Timoteo 3:1-10, 12; Tito 1:5-9).
3. ¿Tuku tlawakgo chatunu xtatayananin Jehová?
Putum tiku xalak congregación maxkikgo «kakni xtukuwani Jehová» akxni mastakgo xtakgalhtinkan o xtaʼakgchuwinkan ktamakxtumit. Na malankikgo Jehová akxni lichuwinankgo xtukuwani chuna la matlanikgo (kalikgalhtawakga Salmo 148:12, 13).
TLAKG KALAKPUTSANANIW
Kaʼakxilhwi la likatsi kimpuxkukan Jesús, la lakgkgolotsin stalanikgo xliʼakxilhtit chu la tlan nakataskujaw Jesús chu lakgkgolotsin.
4. Jesús chatum puxku tiku tlan mamakgkatsininan
Jesús kinkawaniyan pi kamakgamakglhtinaw la kimpuxkukan. Kalikgalhtawakgatit Mateo 11:28-30 chu kalichuwinantit uma:
¿La likatsi kimpuxkukan Jesús? ¿La makgkatsikgo latamanin tiku makgamakglhtinankgo Jesús la xpuxkukan?
¿La limasiyakgo lakgkgolotsin pi stalanikgo xliʼakxilhtit Jesús? Kaʼakxilhtit VIDEO.
Biblia liwana wan la xlitlawatkan xtaskujutkan lakgkgolotsin.
Kalikgalhtawakgatit Isaías 32:2 chu 1 Pedro 5:1-3 chu kalichuwinantit uma:
Jesús xkamatliwakglha amakgapitsin, chu lakgkgolotsin na liskujkgo xlakata chuna natlawakgo. ¿La makgkatsiya wix xlakata katsipat la likatsikgo lakgkgolotsin?
¿Tuku atanu tlawakgo lakgkgolotsin nema limasiya pi stalanikgo xliʼakxilhtit Jesús?
5. Lakgkgolotsin tlawakgo tuku wankgo pi xlitatlawat
¿La lakaskin Jesús pi lakgkgolotsin kaʼakxilhkgolh xtaskujutkan? Kaʼakxilhtit VIDEO.
Jesús liwana masiyalh tuku tayat xlikgalhitkan natalan tiku pulalinankgo kcongregación. Kalikgalhtawakgatit Mateo 23:8-12 chu kalichuwinantit uma:
Chuna la wan uma texto, ¿tuku tayat xlikgalhitkan lakgkgolotsin? ¿Lakpuwana wix pi sacerdotes o atanu xpulalinanin takanajla o religión chuna likatsikgo la wan texto?
Lakgkgolotsin matliwakglhkgo la talalinkgo Jehová chu kamakgtayakgo xfamiliajkan xlakata nachuna natlawakgo
Lakgkgolotsin kalilakgaputsakgo putum tiku makgtapakgsikgo kcongregación
Lakgkgolotsin lu lichuwinankgo xTachuwin Dios
Lakgkgolotsin makgalhtawakgenanin litaxtukgo. Na makgtayanankgo akxni kaxakakan kPukgalhtawakga chu akxni tlawakan atanu taskujut
6. Akxtum kataskujaw lakgkgolotsin
Biblia kinkawaniyan tuku xlakata akxtum nakataskujaw lakgkgolotsin. Kalikgalhtawakgatit Hebreos 13:17 chu kalichuwinantit uma:
Chuna la wan Biblia, ¿tuku xlakata xlakaskinka nakakgalhakgaxmataw tiku kinkapulalinkgoyan? ¿Lakpuwana wix pi xlilat tuku kinkaskinimakan? ¿Tuku xlakata chuna lakpuwana?
Kalikgalhtawakgatit Lucas 16:10 chu kalichuwinantit uma:
¿Tuku xlakata lu xlakaskinka nakakgalhakgaxmataw lakgkgolotsin maski lakpuwanaw pi ni lu xlakaskinka tuku kinkawanimakgon?
MAKGAPITSIN WANKGO: «Ni talakaskin namakgtapakgsiyaw kʼakgtum takanajla».
¿Tuku tlan kitaxtu akxni makgtapakgsiyaw kʼakgtum congregación chu anta kakninaniyaw Dios?
TUKU KATSINIW
Jesús wa xpuxku congregación xla kstalaninanin Cristo. Lakgkgolotsin kgalhakgaxmatkgo xlimapakgsin Jesús chu akinin xatapaxuwan kataskujaw xlakata kinkakuentajtlawakgoyan. Nachuna, tlawakgo tuku kinkawanikgoyan pi xlitatlawat.
¿Tuku xkgalhtinanti?
¿Tiku xapuxku litaxtu kcongregación xla kstalaninanin Cristo?
¿La makgtayanankgo lakgkgolotsin kcongregación?
¿Tuku tlawakgo chatunu kskujnin Jehová?
TLAKG KAKATSINI
Kaʼakxilhti tuku limasiya pi Lakgkgolotsin tiku Pulalinkgo xtatayananin Jehová chu amakgapitsi lakgkgolotsin, kalilakgaputsakgo amakgapitsi kstalaninanin Cristo.
Kaʼakxilhti tuku taskujut tlawakgo superintendentes de circuito.
Superintendente de circuito nema kalakgapaxialhnan laktsu kachikinin (4:51)
Kaʼakxilhti tuku taskujut tlawakgo lakpuskatin kcongregación.
«¿Na masiyakgo lakpuskatin tiku xtatayananin Jehová?» (Artículo xla Makatsinina)
Kaʼakxilhti pi lakgkgolotsin lu liskujkgo xlakata nakamatliwakglhkgo xnatalankan.
«Lakgkgolotsin kinkamakgtayakgoyan napaxuwayaw» (Makatsinina, 15 xla enero kata 2013)