¿Ankgo latamakgo alakatanu tiku nikgonita?

¿Ninita chatum tiku lu xpaxkiya? Akxni max chuna xtitaxtupat max lakpuwanti: «¿Ankgo latamakgo alakatanu tiku nikgonita? ¿Tlan nakkaʼakxilhpara tiku lu xakkapaxki nema nikgonita?». Kʼuma takgalhtawakga chu nema stala, naʼakxilhaw tuku masiya Biblia nema lu tlan kinkamamakgkatsiniyan.

1. ¿Ankgo latamakgo alakatanu tiku nikgonita?

Jesús tamalakxtumilh linin la akxni lhtatakan. ¿Tuku xlakata linin xtachuna la akxni lhtatakan? Akxni chatum lataman lu lhtatanit, ni katsi tuku lama. Akxni chatum lataman niy, nialh makgkatsi takatsanajwat chu nialhtu patinama. Biblia wan pi «wantiku nikgonita nialhtu katsikgo» (kalikgalhtawakga Eclesiastés 9:5).

2. ¿Tuku xlakata kinkamakgtayayan nakatsiyaw tuku xaxlikana xlakata linin?

Lhuwa latamanin pekuanikgo linin chu na kapekuanikgo tiku nikgonita. Komo wix chuna makgkatsiya, tuku wan Biblia xlakata linin tlan namamakgkatsiniyan. Jesús wa: «Xaxlikana nakalakgmaxtuyan» (Juan 8:32). Maski makgapitsi takanajla o religiones masiyakgo pi akxni niy chatum lataman xlistakna an latama alakatanu, Biblia nichuna masiya. Wa xlakata, akxni chatum lataman niy, nialh patinama. Xlakata tiku nikgonita nialhtu katsikgo, nila kinkatlawanikgoyan tuku nitlan. Wa xlakata ni talakaskin natlawayaw oración xpalakatakan chu na ni kililakpuwanatkan pi wi tuku kilitlawatkan xlakata ni nakamakgasitsiyaw o xlakata nakamaxkiyaw kakni.

Makgapitsi latamanin wankgo pi tlan katachuwinankgo tiku nikgonita, pero uma ni xlikana. Chuna la aku akxilhwi, «wantiku nikgonita nialhtu katsikgo». Tiku lakpuwankgo pi katachuwinankgo xninkan wa katachuwinankgo demonios, nema kamakanajlikgo latamanin pi katachuwinamakgo xtalikakgapasnikan. Akxni katsiyaw tuku xaxlikana xlakata linin kinkamakgtayayan xlakata demonios nitu nakinkatlawanikgoyan. Jehová liwana kinkawaniyan pi ni kakatachuwinamputuw tiku nikgonita, xlakata katsi pi komo nakatachuwinanaw demonios, kalipekua nawili kilatamatkan (kalikgalhtawakga Deuteronomio 18:10-12).

3. ¿Xlikana ankgo latamakgo alakatanu tiku nikgonita?

Kxlikalanka katiyatni tanu tanu tuku lakpuwankgokan xpalakata tiku nikgonita, pero ni putum xaxlikana.

• Anta niku wix lapat, ¿tuku lakpuwankgokan xpalakata tiku nikgonita?

VIDEO: ¿La wilakgolh tiku nikgonita? (kaj aktsu) (1:19)

Kalikgalhtawakgatit Eclesiastés 3:20 chu kalichuwinantit uma:

• Chuna la wan uma versículo, akxni chatum lataman niy, ¿tuku akgspula?

• Akxni chatum lataman niy, ¿an latama alakatanu xlistakna o xʼespíritu?

Biblia kinkalitachuwinanan akxni nilh Lázaro, chatum xʼamigo Jesús. ¿Tuku wa Jesús xpalakata Lázaro? Kalikgalhtawakgatit Juan 11:11-14 chu kalichuwinantit uma:

• ¿Tuku tamalakxtumilh Jesús linin?

• ¿Tuku kinkamasiyaniyan uma xlakata tiku nikgonita?

• ¿Lakpuwana pi xlikana tuku wan Biblia xlakata linin?

4. Xaxlikana xlakata linin kinkamakgtayayan

Akxni katsiniyaw tuku xaxlikana xlakata linin, nialh kapekuaniyaw tiku nikgonita. Kalikgalhtawakgatit Eclesiastés 9:10 chu kalichuwinantit uma:

• ¿Tlan nakinkatlawanikgoyan tuku nitlan tiku nikgonita?

Tuku masiya Biblia na kinkamakgtayayan nialh nakanajlayaw pi kilikakninanitkan o pi ni kilimakgasitsitkan tiku nikgonita. Kalikgalhtawakgatit Isaías 8:19 chu Apocalipsis 4:11 chu kalichuwinantit uma:

• ¿La lakpuwana pi makgkatsi Jehová akxni wi tiku kakninani o putsa xtamakgtaykan tiku nikgonita?

5. Xaxlikana xlakata linin tlan kinkamamakgkatsiniyan

Lhuwa latamanin kamasiyanikan pi akxni nanikgo, nakamalakgaxokgekan tuku nitlan tlawakgolh kxlatamatkan. Pero lu tlan limakgkatsiyaw akxni katsiyaw pi tiku ninita nitu makgapatinamaka, maski tlawalh tuku lu nitlan. Kalikgalhtawakgatit Romanos 6:7 chu kalichuwinantit uma:

• Komo Biblia wan pi tiku ninita nialhtu laklin o nialhtu lakgawi xtalakgalhin, ¿xlilat nalakpuwanaw pi tiku nikgonita lipatinamakgo tuku nitlan tlawakgolh?

Akxni tlakg lakgapasaw Jehová, liwana katsiyaw pi xla nikxni kamakgapatinan tiku nikgonita. Kalikgalhtawakgatit Deuteronomio 32:4 chu 1 Juan 4:8 chu kalichuwinantit uma:

• Umakgolh versículos kinkawaniyan pi Dios tlan likatsi chu xapaxkina, ¿lakpuwana pi chatum Dios tiku chuna likatsi kamakgapatinan tiku nikgonita?

• ¿Tlan mamakgkatsiniyan tuku xaxlikana xlakata linin? ¿Tuku xlakata?

TUKU KATSINIW

Akxni wi tiku niy, anta sputa xlatamat. Tiku nikgonita nialhtu patinamakgo chu nila kinkatlawanikgoyan tuku nitlan.

¿Tuku xkgalhtinanti?

• ¿Ankgo latamakgo alakatanu tiku nikgonita?

• ¿Tuku xlakata kinkamakgtayayan akxni katsiyaw xaxlikana xlakata linin?

• ¿Tuku xlakata tlan makgkatsiyaw akxni katsiyaw xaxlikana xlakata linin?

TLAKG KAKATSINI

Kaʼakxilhti tuku kilhchanima akxni Biblia maklakaskin tachuwin alma.

“¿Qué es el alma?” (Artículo xalak jw.org)

Kaʼakxilhti komo xlikana pi Dios kamakgapatinan tiku nitlan likatsikgo anta kpupatin.

¿Anan akgtum pupatin? (3:07)

¿Xlilat nakapekuaniyaw tiku nikgonita?

Espíritus de difuntos... ¿pueden ayudar a uno?, ¿o causarle daño? ¿Existen, realmente? (Folleto)

Kalakgapasti chatum chixku tiku tlan makgkatsilh akxni katsilh tuku xaxlikana xlakata linin.

«Lu kaks kimalakawanilh la lu tlan takgalhtin masta Biblia» (Makatsinina, 1 xla febrero kata 2015)