«¡Lanka xkilhtamaku Jehová lakatsu wi!»: Chuntiya kamatliwakglhwi kintakanajlakan
«Chuntiya kastakwi xlakata xaʼakchan nalitaxtuyaw» (HEB. 6: 1).
1, 2. ¿Tuku lalh xlakata tlan «[xtsalakgolh] kkasipijni» kstalaninanin Cristo xalak Jerusalén chu Judea?
AKGTUM kilhtamaku, kstalaninanin Jesús talakatsuwinikgolh chu kgalhskinkgolh: «[¿]Tuku nalitasiya pi kinkatawila nawan chu akxni talakatsuwinita xlisputni kakilhtamaku?». Xla kalikgalhtilh akgtum profecía nema xʼama kgantaxtu akxni xtsukulh xapulana siglo. Kalitachuwinalh tuku xʼama la nema xlikana xlimasiyalh pi xʼama min lisputni. Akxni xkgantaxtulh uma, «tiku [xwilakgolh] kJudea [xkatsalakgolh] kkasipijni» (Mat. 24:1-3, 15-22). ¿Xʼakgatekgskgolh kstalaninanin tuku xʼama la chu xtlawakgolh tuku xkawaninit xMakgalhtawakgenakan?
2 Puxamakaw kata alistalh, kkata 61, apóstol Pablo tsokgli maktum carta nema kamalakgachanilh kstalaninanin Cristo tiku xwilakgolh Jerusalén chu kJudea. ¿Tuku xlakata? Xlakata xlilakpuwankgolh la xtatekgskgo. Xlakan chu Pablo ni para tsinu xlilakpuwankgo pi kaj akgkitsis kata xʼama titaxtu lata xtsukulh «lhuwa tapatin» (Mat. 24:21). Kkata 66, soldados romanos chu Cestio Galo tiku xpulalima, akgchipakgolh Jerusalén. Pero akxni x’amaka malakgsputukan kachikin, Cestio Galo limapakgsinalh pi kʼsoldados xtapanukgolh, chu uma tuku lalh kamaxkilh talakaskin pi tiku anta xwilakgolh tlan xtsalakgolh.
3. ¿Tuku kawanilh Pablo kstalaninanin Cristo chu tuku xlakata chuna tlawalh?
3 Kstalaninanin Cristo xtalakaskin pi liwana xlakapastaknankgolh chu xʼakgatekgskgolh tuku xʼama la, xlakata tlan xtsalakgolh. Pero, makgapitsin takgalan xʼakgateksgo. Xlakata xtakanajlakan xlitaxtukgo la lakgskgatan tiku xmaklakaskinkgo «leche» (kalikgalhtawakga Hebreos 5:11-13). Chu tiku lhuwa kata xlinkgoya la xlakgapaskgonit xaxlikana xtamakgatlinikgonit «xastakna Dios» (Heb. 3:12). Maski «xkilhtamaku Dios [x]talakatsuwima», xwilakgolh tiku xlismanikgonit nialh xtamakxtumikgo (Heb. 10:24, 25). Wa xlakata, Pablo kawanilh: «Xlakata kanajlanitawa tuku pulana katsiniw xpalakata Cristo, chuntiya kastakwi xlakata xaʼakchan nalitaxtuyaw» (Heb. 6:1).
4.¿Tuku xlakata xlakaskinka skgalalh natawilayaw chu tuku nakinkamakgtayayan?
4 Akinin lamaw kkilhtamaku niku nakgantaxtu xaʼawatiya tuku xlichuwinanit Jesús. «¡Lanka xkilhtamaku Jehová», niku namalakgsputukan xkakilhtamaku Satanás, «lakatsu wi!» (Sof. 1:14). Wa xlakata, la uku lu xlakaskinka skgalalh natawilayaw chu namatliwekglhaw kintakanajlakan (1 Ped. 5:8). Pero ¿xlikana chuna tlawamaw? Xlakata chuntiya nastakaw chu xaʼakchan nalitaxtuyaw nakinkamakgtayayan ni napatsankgayaw tuku kilhtamaku lamaw.
¿Tuku kilhchanima xaʼakchan litaxtukan?
5, 6. 1) ¿Tuku kilhchanima xaʼakchan litaxtukan? 2) ¿Tuku pulaktiy natlawayaw xlakata xaʼakchan nalitaxtuyaw?
5 Pablo kamakgpuwantinilh kstalaninanin Cristo pi xaʼakchan xlitaxtukgolh, pero na kawanilh tuku xkilhchanima uma (kalikgalhtawakga Hebreos 5:14). Tiku tliwakga kgalhikgo xtakanajlakan, ni kajwatiya wakgo «leche»; wata maklakaskinkgo «xapalha liwat». Wa xlakata lakgapaskgo xtamasiy Biblia asta xtakatsin Dios nema tsekg wi (1 Cor. 2:10). Nachuna, xlakata lilatamakgo tuku katsikgo, liwana lakapastaknankgo xlakata chuna katsinikgonit, chu chuna katsikgo tuku tlan chu tuku nitlan. Chu, akxni laksakkgo tuku natlawakgo tlan limaklakaskinkgo tastakyaw nema limin Biblia, xlakata tuku titaxtumakgolh chu tlan nalilatamakgo.
6 Pablo tsokgli: «Wa xlakata talakaskin tlakg liwana nalilakpuwanaw putum tuku kgaxmatnitaw, xlakata nikxni natamakgatliniyaw takanajla» (Heb. 2:1). Chuna, komo ni kuenta natlawayaw tsinu tsinu natamakgatliniyaw takanajla. Xlakata ni chuna nakinkaʼakgspulayan talakaskin «tlakg liwana nalilakpuwanaw» tuku xaxlikana. Wa xlakata kalilakpuwaw: «¿Kajwatiya kkatsi xapulana tamasiy nema xlikatsit chatum kstalanina Cristo? ¿Kajwatiya kskujnanima Jehová xlakata chuna klismaninit? ¿Tuku tlan naktlawa xlakata nakpaxki xaxlikana chu nakmatliwakglha kintakanajla?». Xlakata xaʼakchan nalitaxtuyaw talakaskin pulaktiy tuku natlawayaw: liwana nalakgapasaw xTachuwin Dios chu nakatsiniyaw la nakgalhakgaxmataw.
Liwana kalakgapaswi xTachuwin Dios
7.¿La kinkamakgtayayan liwana nalakgapasaw xTachuwin Dios?
7 Pablo tsokgli: «Xlakata putum tiku chuntiya way leche ni lakgapasa [o ni katsi] xtachuwin Dios nema kinkamasiyaniyan tuku xaʼakgstitum, xlakata skgataku» (Heb. 5:13). Xlakata xaʼakchan nalitaxtuyaw, talakaskin liwana nalakgapasaw xtamasiy Dios nema kinkamaxkinitan. Chu komo uma tamasiy wi kBiblia putum kilhtamaku kilikgalhtawakgatkan chu makgapitsi likgalhtawakga nema kinkamaxkiyan «skujni xatalipaw chu xaskgalala» (Mat. 24:45-47). Uma nakinkamakgtayayan nakatsiyaw la lakpuwan Dios chu nalakgpaliyaw la lakapastaknanaw. Kaʼakxilhwi tuku titaxtulh Rosa.a Uma tala wan: «Tuku lu kimakgtayanit kkilatamat wa pi chali chali klikgalhtawakga Biblia. Akgtiy kata la klikgalhtawakgakgolh Biblia, pero kmakgkatsilh pi xlikana klakgapasli kiMalakatsukina: la likatsi, tuku lakgati, tuku ni lakgati, xlitliwakga chu xliskgalala. Xlakata chali chali klikgalhtawakga Biblia, kimakgtayanit akxni ktitaxtunit tuku tuwa kkilatamat».
8.¿La nakinkamakgtayayan kkilatamatkan xTachuwin Dios?
8 Komo chali chali nalikgalhtawakgayaw xTachuwin Dios, xtamasiy nalakgpali kilatamatkan (kalikgalhtawakga Hebreos 4:12). Nalakgpalitilha kintayatkan chu chali chali tlakg tlan latamanin nalitaxtuyaw kxlakatin Jehová. ¿Lakpuwana pi talakaskin tlakg nalimaxtuya kilhtamaku xlakata nalikgalhtawakgaya Biblia chu nalilakpuwana?
9, 10. ¿Tuku kilhchanima liwana lakgapaskan xTachuwin Dios? Kalichuwinanti akgtum liʼakxilhtit.
9 Xlikana pi ni kaj tsinu nalakgapasaw tuku wan Biblia, wata talakaskin liwana nalakgapasaw. «Lakgskgatan» nema Pablo katsokgnanilh xkatsinikgo tuku xwan Tatsokgni. Tuku xkakitsankganima wa pi ni liwana xʼakgatekgskgo xlakata ni xlimaklakaskimakgo tuku xkatsikgo. Ni xkatsikgo xlakata ni xlimaklakaskinkgo xtastakyaw Biblia xlakata xlaksakkgolh tuku tlan.
10 Chuna la akxilhaw, nila wanaw pi liwana lakgapasaw xTachuwin Dios komo ni nalilatamayaw tuku katsiniyaw. Chuna masiya xliʼakxilhtit chatum tala tiku wanikan Kyle. Uma tala takgalhilh taʼakglhuwit chatum tiku xtaskuja. Pero xla xlakkaxtlawaputun uma. ¿Tuku tlawalh? Xla kinkawaniyan: «Xapulana texto nema klakapastakli wa Romanos 12:18, niku wan: «Komo tlan chuna tlawayatit, asta niku tlan chuna makgantaxtiyatit, tlan kakatalalipitit putum latamanin». Wa xlakata kwanilh kincompañera pi xaktachuwinamputun akxni xkgasputli kintaskujutkan». Lu tlan kakitaxtunilh xlakata latachuwinalh chu xcompañera kaks lilakawa tuku tlawalh Kyle. Kyle wan: «Kkatsinilh pi tlawakan tuku wan xtastakyaw Biblia, ankgalhin tlan kitaxtu».
Kakatsiniw nakgalhakgaxmatnanaw
11. ¿Tuku li’akxilhtit kinkalimasiyaniyan pi tlakg tuwa tamakgkatsi nakgalhakgaxmatninanaw, akxni wi tuku tuwa titaxtumaw?
11 Tlawakan tuku kinkawaniyan Biblia tlakg tuwa tamakgkatsi akxni titaxtumaw tuku tuwa. Kaʼakxilhwi tuku titaxtukgolh israelitas. Akxni nina makgas xtitaxtunit lata Jehová xkalakgmaxtunit k’Egipto, tsukukgolh «talatlawakgo Moisés» chu nachuna tsukukgolh «li’akxilhkgo Jehová». ¿Tuku xlakata chuna likatsikgolh? Kaj xlakata chuchut (Éxo. 17:1-4). Maski xtatlawakgonit akgtum talakkaxlan Jehová pi x’amakgo kgalhakgaxmatnankgo, kaj akgtiy papaʼ titaxtulh lakatsalakgolh limapakgsin xlakata kakninanikgolh atanu dioses (Éxo. 24:3, 12-18; 32:1, 2, 7-9). ¿Tuku xlakata ni kgalhakgaxmatnankgolh? ¿Kaj xlakata Moisés akglhuwata kilhtamaku la x’anit ksipi Horeb chu xlakan pekuankgolh? Amalequitas xkatalachipanita chu wa Moisés tiku xkamakgtayanit akxni chaxli xmakan xlakata xtlajanankgolh. Pero ama kilhtamaku Moisés ni anta xkatawi. ¿Tuku xtlawakgolh komo xminka katalachipakan? (Éxo. 17:8-16.) Maski xkatalachipaka o ni, israelitas «ni kgalhakgaxmatputunkgolh» (Hech. 7:39-41). Alistalh, ni kgalhakgaxmatkgolh Jehová akxni ni tanuputunkgolh kTiyat nema xKawanikanit pi Nakamaxkikan. Wa xlakata, Pablo kastakyawalh kstalaninanin Cristo pi kuenta xtlawakgolh ni xlikatsikgolh la israelitas tiku ni kgalhakgaxmatnankgolh (Heb. 4:3, 11).
12. ¿La katsinilh Jesús nakgalhakgaxmatninan chu la makgtayalh uma?
12 Xlakata xaʼakchan nalitaxtuyaw, talakaskin natlawayaw tuku matlaniyaw xlakata nakgalhakgaxmataw Jehová. Xlikana pi lakgachunin patinankan akxni kgalhakgaxmatnankan chuna la kinkalimasiyaniyan xli’akxilhtit Jesús (kalikgalhtawakga Hebreos 5:8, 9). K’akgapun, Jesús kgalhakgaxmatli xTlat putum kilhtamaku. Pero, akxni kilachi unu kKatiyatni tuwa makgkatsilh nakgalhakgaxmatninan xlakata lhuwa patinalh. Xlakata kgalhakgaxmatninalh akxni tuwa tuku titaxtulh, makgtayalh tlakg tlan namakgantaxti taskujut nema Dios x’ama lakgayawa: Mapakgsina chu Sacerdote xlitaxtulh.
13. ¿La nalimasiyayaw pi xlikana kgalhakgaxmatnanaw?
13 ¿Chu tuku nawanaw kimpalakatakan? ¿Na nakgalhakgaxmataw Jehová maski tuwa tuku natitaxtuyaw? (Kalikgalhtawakga 1 Pedro 1:6, 7.) Xtastakyaw Jehová liwana lichuwinan, xlakata la linkan latamat, ni na’akgskgawinanaw, la chuwinanaw, akxni likgalhtawakgayaw Biblia, anaw ktamakxtumit chu akxni lichuwinanaw Dios (Jos. 1:8; Mat. 28:19, 20; Efe. 4:25, 28, 29; 5:3-5; Heb. 10:24, 25). ¿Nakgalhakgaxmataw Dios xlakata uma, maski tuwa namakgkatsiyaw? Komo chuna natlawayaw, nalimasiyayaw pi xaʼakchan litaxtuyaw.
¿La litamakgtayayaw xaʼakchan nalitaxtuyaw?
14. ¿La makgtayalh tliwakga xtakanajla chatum tala?
14 Xlikana pi kstalanina Cristo lu litamakgtaya xlakata katsininit la nalakapastaknan chu na katsi tuku tlan chu tuku nitlan, k’uma kakilhtamaku niku latamanin «nipara liʼakxilhkgo la tuku nitlan akgtum talakgalhin» (Efe. 4:19). Kalichuwinaw Jorge, chatum kstalanina Cristo tiku chali chali likgalhtawakga kilikgalhtawakgakan chu lu xtapalh li’akxilha. Makgamakglhtinalh akgtum taskujut niku kajwatiya lakpuskatin kskujkgo. Xla wan: «lhuwa tiku xakkataskuja xtlawakgo talakgxtumit nema ni xlitatlawat chu ni xmaxanankgo, pero chatum xtasiya pi ni chuna xlikatsi chu asta xkatsiputun tuku wan Biblia. Pero, akgtum kilhtamaku ki’akstukan xakskujmaw, tsukulh kiwani tuku ni xlilat. Pulana klakpuwa pi kaj xkgalhkgamanama, pero tsukulh kintalakatsuwini chu ni xakkatsi la xakmachokgolh. Ama kilhtamaku klakapastakli tuku xlichuwinan maktum Makatsinina, xlakata chatum tala tiku nachuna xtitaxtunit kxtaskujut. Uma artículo na xlichuwinan xli’akxilhtit José chu xpuskat Potifar.b Wa xlakata kmachokgolh, xla tapanulh chu alh» (Gén. 39:7-12). Jorge tlan makgkatsilh xlakata ni tlawalh tuku nitlan chu tlan tawi xtalakapastakni (1 Tim. 1:5).
15. ¿La matliwakglha kinakujkan xa’akchan nalitaxtuyaw?
15 Atanu tuku tlan kinkakitaxtuniyan akxni xaʼakchan litaxtuyaw wa pi tatliwakglha kinakujkan, uma wamputun la likatsiyaw chu uma kinkamakgtayayan ni nakinkalimaʼakgtsankgekanan «tipalhuwa tamasiy nema ni xtachuna tuku kinkamasiyanikanitan» (kalikgalhtawakga Hebreos 13:9). Komo naliskujaw xlakata natatliwakglha kintakanajlakan, kintalakapastaknikan nalilakpuwan «tuku tlakg xlakaskinka» (Fili. 1:9, 10). Chu uma natlawa pi tlakg xtapalh nali’akxilhaw Jehová chu napaxtikatsiniyaw putum tuku kinkamaxkinitan (Rom. 3:24). Kstalanina Cristo tiku lakpuwan «chuna la tiku laklankata» paxtikatsininan chu lipaxuwa la talalin Jehová (1 Cor. 14:20).
16. ¿Tuku makgtayalh chatum tala xlakata tliwakga xkgalhilh xnaku?
16 Chatum tala tiku wanikan Luisa akgatekgsli pi chuna la kskujnanima Jehová, kaj xlimasiya xlakata natalan tlan xlichuwinankgolh. Xla wan: «Ni xaktlawama tuku nitlan, pero ni xakliskujma xlakata tlakg nakskujnani Jehová. Alistalh kaʼakxilhli pi komo tlakg xakskujnaniputun, wi tuku kililakgpalit xwanit chu talakgpalit nema tlakg xlakaskinka ktlawalh wa pi nakskujnani Jehová, xliputum kinaku». Xlakata lu liskujli, Luisa tlawalh pi xnaku xtatliwakglhli, chu wa uma tuku makgtayalh akxni lu tatatlalh (Sant. 5:8). Xla wampara: «Lu kpatinalh, pero kmakgkatsilh pi Jehová lakatsu xkintawi».
Kakgalhakgaxmatninaw «xliputum kinakujkan»
17. ¿Kxapulana siglo, tuku xlakata lu xlakaskinka xwanit pi kstalaninanin Cristo xkgalhakgaxmatnankgolh?
17 Xtastakyaw Pablo xlakata xaʼakchan nalitaxtukgo, kamakgtayalh kstalaninanin Cristo nalakgtaxtukgo tiku xlamakgolh kJerusalén chu kJudea. Tiku kgalhakgaxmatkgolh tuku kawanilh Pablo liwana katsikgolh, tuku xlitlawatkan xwanit akxni akxilhkgolh tuku xkalitachuwinanit Jesús chu tlan xtsalakgolh kkasipijni. Akxni xʼakxilhkgolh «tuku xalixkajni nema masputunan anta ya niku kxasanto» uma wamputun soldados romanos tiku stiliwilikgolh Jerusalén, katsikgolh pi xchanit kilhtamaku (Mat. 24:15, 16). Lakapastakkgolh tuku xkawaninit Jesús, chu tsalataxtukgolh kJerusalén akxni nina xmalakgsputukan chu chuna la lichuwinan historiador eclesiástico Eusebio, chankgolh kPela (o Pella), ksipi Galaad. Chu chuna kstalaninanin Cristo, lakgtaxtunikgolh tuku nitlan akgspulalh Jerusalén.
18, 19. 1) ¿Tuku xlakata lu xlakaskinka nakgalhakgaxmatninanaw la uku? 2) ¿Tuku natalichuwinan kʼatanu artículo?
18 Kstalaninanin Cristo xala uku tiku tliwakga kgalhikgo xtakanajlakan, kgalhakgaxmatnankgo chu uma nakamakgtaya nalakgtaxtukgo akxni nakgantaxtu tuku lichuwinanit Jesús xlakata «lanka tapatin» nema nikxni lanit kkakilhtamaku (Mat. 24:21). ¿Nakgalhakgaxmataw «xkuentajtlawana chiki» akxni lakapala tuku nakinkalimapakgsiyan? (Luc. 12:42.) ¡Lu xlakaskinka pi xliputum kinakujkan nakgalhakgaxmatninanaw! (Rom. 6:17.)
19 Xlakata xaʼakchan nalitaxtuyaw, talakaskin liwana nalakapastaknanaw, uma chuna kitaxtu akxni liwana likgalhtawakgayaw xTachuwin Dios chu katsiniyaw kgalhakgaxmatnanaw. Kamanan tuwa makgkatsikgo namastakakgo xtakanajlakan. Atanu artículo nalichuwinanaw uma.
[Notas]
a Makgapitsi tukuwani kalakgpalikanit.
b Ka’akxilhti artículo «Fortalecidos para rechazar el mal», nema limin La Atalaya 1 xla octubre kata 1999.
¿Tuku xkgalhtinanti?
• ¿Tuku kilhchanima xaʼakchan litaxtukan, chu la nalakgchanaw?
• ¿Tuku xlakata talakaskin liwana nalakgapasaw Biblia komo xaʼakchan litaxtuputunaw?
• ¿La nakatsiniyaw nakgalhakgaxmatninanaw?
• ¿La litamakgtayayaw xaʼakchan nalitaxtuyaw?
[Dibujo]
Lilatamakan xtastakyaw Biblia kinkamakgtayayan natayaniyaw taʼakglhuwit
[Dibujo]
Tiku kgalhakgaxmatkgolh Jesús lakgmaxtukgolh xlatamatkan