Akxni Dios xmapakgsinan putum tamalakatsukin xkgalhi takaksni chu makxtum xwi.

¿Tuku xlakata lakaskinaw xTamapakgsin Dios?

Lata akxni kamalakatsukika latamanin, kajwatiya kiMalakatsukinakan, tiku wanikan Jehová, xmapakgsinan chu xlimasiya tapaxkit. Wa xlakata, tlawalh akgtum lu stlan pulataman xpalakata latamanin, akgtum jardín anta kʼEdén, niku xʼanan lhuwa taway. Nachuna, kamaxkilh akgtum tlan taskujut (Génesis 1:28, 29; 2:8, 15). Komo xmastaw talakaskin pi Dios chuntiya xkinkamapakgsin, chuntiya xlipaxuwaw takaksni.

Adán chipanit xtawakat kiwi nema Eva maxkilh chu Jehová xkawaninit pi ni xliwatkan — Xapulana latamanin ni lakaskinkgolh pi wa Dios xkamapakgsilh.

Biblia wan pi chatum ángel tiku wanikan Satanás wa pi Dios ni xlakgchan namapakgsinan. Xtachuna la xwa pi latamanin tlakg tlan xkakitaxtunilh komo ni wa Dios tiku xkamapakgsilh. Lu nitlan, pero Adán chu Eva kgaxmatnikgolh Akgskgawini chu lakatakikgolh Dios (Génesis 3:1-6; Apocalipsis 12:9).

Akxni lakatakikgolh Dios chu ni makgamakglhtinankgolh la xmapakgsinakan, Adán chu Eva makgatsankgakgolh xatlan xpulatamankan kParaíso chu nialhla latamakgolh putum kilhtamaku (Génesis 3:17-19). Tuku laksakkgolh na kalaktlawalh xkamanankan. Biblia wan pi xlakata Adán lakgalhinalh «ntsukulh ntalakgalhin nkatuxawat [...], pus wa linin nkitaxtunilh ntalakgalhin» (Romanos 5:12). Talakgalhin liminit atanu taʼakglhuwit: «Chixku akgchipanit chixku xlakata natlawani tuku nitlan» (Eclesiastés 8:9). Uma wamputun pi akxni latamanin xʼakstukan kamapakgsikan, anan taʼakglhuwit xlikalanka katiyatni.

LATAMANIN TSUKUKGO MAPAKGSINANKGO

Nemrod lu tlankajwa xwanit. Xchakgen tasiyakgo latamanin nema tlawamakgo akgtum talhman kachikin — Nemrod talalakatawakalh Jehová.

Xapulana mapakgsina nema Biblia lichuwinan wa Nemrod, chu xla talalakatawakalh xTamapakgsin Dios. Lata uma kilhtamaku lhuwa latamanin malakatsalikgonit xlimapakgsinkan. Wa xlakata, liwakaya max akgtutu mil kata, mapakgsina Salomón tsokgli: «Kakxilhli xlakgpixtajatkan tiku xkatlawanikan tuku nitlan, pero ni xwi tiku tlan xkamamakgkatsinilh; chu tiku xkatlawanikgo tuku nitlan lakgtliwakgan xwankgonit» (Eclesiastés 4:1).

La uku, uma ni talakgpalinit. Akgtum tamakatsin xla Naciones Unidas kkata 2009 wan pi chuna la titaxtu kilhtamaku, lhuwa latamanin lakpuwankgo pi nixatlan mapakgsinanin «wa pulaktum tuku tlawa pi nitlan natawila kakilhtamaku».

WI TUKU XLITATLAWAT

Latamanin maklakaskinkgo tlakg xatlan mapakgsinanin chu tlakg xatlan tamapakgsin. Chu wa uma tuku malaknunit kimalakatsukinakan.

Tipalhuwa dibujos niku masiya tuku nitlan kitaxtu akxni latamanin xʼakstu kamapakgsikan: 1) chatum puskat xalak Asia wi ktiji niku lu kalixkajnit chu chaxnit aktsu xkgawasa nema tasama; 2) chatum kgolotsin ma kʼakgtum hospital; 3) makgapitsi soldados latalama niku tlawamaka guerra; 4) makgapitsi tiku talalakatawakakgo mapakgsina lu sitsikgonit chu chipakgonit pancartas; 5) chatum puskat chu xtsumat chankgo kxchikkan chu akxilhkgo pi lakgapakglhkanit xmalakcha; 6) niku taxtu xjini laklanka fabricas chu makgapitsi cables kʼakgtum lanka kachikin niku anan contaminación — Nipara wa tlakg xatlan mapakgsinanin tlan lakkaxtlawakgonit laklanka xtaʼakglhuwitkan latamanin.

Dios lakkaxwilinit xTamapakgsin, uma wamputun, akgtum tamapakgsin nema natawila xlakgxokgo putum tamapakgsin xalak katiyatni «chu ama tamapakgsin xliputum kilhtamaku natawila» (Daniel 2:44). Wa uma Tamapakgsin nema lhuwa latamanin skinkgonit kpadrenuestro (Mateo 6:9, 10). Pero Dios ni wa tiku katimapakgsinalh kʼuma Tamapakgsin, wata laksaknit chatum tiku kilatamachi la chatum chixku. ¿Tiku laksaknit?