¿La namasiyaniya tiku nila liwana kgalhtawakga?
1. ¿Tiku max nakatekgsaw akxni anaw lichuwinanaw Dios?
1 Min kilhtamaku akxni anaw lichuwinanaw Dios katekgsaw latamanin tiku katsiputunkgo tuku xaxlikana xlakata Dios pero ni lu liwana kgalhtawakgakgo. ¿Tlan nakamakgtayayaw? Tlan.
2. ¿Tuku xlakata ni nakawaniyaw tuku nitlan nalimakgkatsikgo tiku nila liwana kgalhtawakgakgo, chu la tlan chuna natlawayaw?
2 Ni nakawaniyaw tuku nitlan nalimakgkatsikgo. Jehová akxilha xnaku chatum lataman chu ni wa la xlilhuwa kgalhtawakganit (1 Sam. 16:7; Pro. 21:2). Akinin nachuna likatsiyaw la Jehová, niti kalakgmakganaw kaj xlakata nila liwana kgalhtawakgakgo. Akxni akinin akgatekgsaw o makgachakgxiya pi latamanin tlakg namastakgo talakaskin nakamakgtayayaw komo ni nawaniyaw tuku nitlan nalimakgkatsikgo chu ni nakaskiniyaw lakapala kakatsinikgolh (1 Ped. 3:15). Wa xlakata akxni kajku tsukumaw masiyaniyaw ni naskiniyaw kalikgalhtawakgalh akgtum texto o akgtum párrafo. Chuna la natitaxtutilha kilhtamaku nakatsinitilha tuku lu xatlan nema masiya Biblia, chu max xakstu nalakapastaka tlakg liwana nakgalhtawakga chu chuna nalipaxuwa akxni nalikgalhtawakga «chali chali [...] ama limapakgsin» (Sal. 1:2, 3).
3. ¿Tuku tlan nalimasiyanikan chatum tiku nila liwana kgalhtawakga?
3 Tuku nakalimasiyaniyaw. Dibujos kinkamakgtayakgoyan xlakata nakalimasiyaniyaw chu xlakata natamakgxtakga kxakgxakgakan tuku kamasiyanimaw. Pulana kamasiyani dibujo tiku kgalhtawakgama chu alistalh kawanin tuku akxilha. Alistalh katlawani takgalhskinin xlakata nawaniyan tuku kinkamasiyaniyan tuku akxilhma kdibujo. Alistalh kalikgalhtawakgani makgapitsi textos nema lichuwinankgo tuku masiyanipat. Na tlan nalimaklakaskinaw dibujos xlakata naʼakxilhaw tuku katsinilh. Tuku kuenta militlawat: ni lu lhuwa tuku nakamasiyaniya. Makglhuwa nawaniya xtema chu tachuwin nema tlakg xlakaskinka, ni kalichuwinanti tuku ni tatsokgtawilanit klikgalhtawakga nema maklakaskimpat. Kalikgalhtawakga textos anta kBiblia chu katlawani takgalhskinin xlakata nakatsiya komo liwana akgatekgsma tuku masiyanipat. Chuna, max tiku kgalhtawakgama tlakg liwana nakatsiniputun nakgalhtawakga xlakata nakatsi amakgapitsi tuku xaxlikana masiya Biblia.
4. ¿La namakgtayakan tiku kgalhtawakgama liwana nakgalhtawakga?
4 La tlakg tlan nakgalhtawakga. Tiku nila liwana kgalhtawakga ni wamputun pi nila katiʼakgatekgsli o na ni tamakgxtakga kxakgxakga tuku masiyanimaka. Wa xlakata, kawani pi kakgaxmatli grabaciones nema tlawakgonit xtatayananin Jehová. Chu asta tlakg tlan nakgalhtawakga akxni nakgaxmata chu nastalanitilha klikgalhtawakga chu nachuna nawantilha chuna la wan disco. Na tlan nalimaklakaskina folleto Kaliskujti xlakata nakgalhtawakgaya chu natsokgnana. Makgapitsi kachikinin lakgkgolotsin xalak congregación lakkaxwilikgonit xlakata nakamasiyanikgo amakgapitsi nakatsinikgo kgalhtawakgakgo. ¿Lakpuwana wix pi makgtayanan uma tuku lichuwinaw? Lakaskinaw pi uma tuku lichuwinaw tlan kimputumkan nakalimakgtayayaw liwana nakgalhtawakgakgo xlakata naʼakgatekgskgo xasanto «xtatsokgnun Dios», nema skgalala nakatlawa xlakata tlan nalakgtaxtukgo (2 Tim. 3:15).