¿Tlakg kiliskujat?
1. ¿Tuku max nalilakgaputsa chatum kstalanina Cristo tiku ni makgatsankganani Dios?
1 ¿Minit kilhtamaku akxni makgkatsi pi ni lhuwa tuku tlawapat? Max xlakata kgolompat, xlakata tatatlaya o xlakata tlakg lhuwa tuku lakgatayapat kmifamilia, nitlan limakgkatsiya xlakata nila lhuwa kilhtamaku skujnaniya Dios. Chatum tala puskat tiku kgalhi chatutu xkamanan wa pi min kilhtamaku nitlan limakgkatsi pi komo kamakgtakgalha xfamilia, wa xlakata ni lhuwa kilhtamaku kgalhi chu litliwakga xlakata naskujni Dios. Akxni chuna titaxtuyaw lu xlakaskinka liwana naʼakxilhaw uma. ¿La tlan chuna naʼakxilhaw?
2. ¿Tuku lakaskin Jehová natlawayaw?
2 Tuku lakaskin Jehová natlawayaw. Kimputumkan tlakg skujnaniputunaw Jehová. Pero ni watiya wamputun tuku tlawaputunaw chu tuku tlan tlawayaw. Maski chuna, xlakata akinin tlakg lhuwa tuku tlawaputunaw limasiya pi ni antiya tamakgxtakgaw. Chu kalakapastakwi pi Jehová liwana katsi tuku nila tlawayaw; xla ni kinkaskiniyan tuku nila tlawayaw (Sal. 103:13, 14). Wa xlakata, ¿tuku kinkaskiniyan? Pi xliputum kinakujkan kaskujniw, kamaxkiw tuku tlakg tlan kgalhiyaw (Col. 3:23).
3. ¿La tlan nakatsiyaw la skujnanimaw Dios?
3 ¿La nakatsiyaw tuku tlan natlawayaw? Naskiniyaw Jehová pi kakinkamakgtayan liwana naʼakxilhaw la wi kilatamatkan (Sal. 26:2). Nachuna, chatum amigo tiku tliwakga wi xtakanajla, tiku tlan lipawankan, tiku liwana kinkalakgapasan chu lakatanks kinkawaniyan tuku kilitlawatkan tlan nakinkawaniyan tuku nalakgpaliyaw kkilatamatkan (Pro. 27:9). Nachuna, kalakapastakti pi kilatamatkan talakgpalitilha, wa xlakata tlan xwa komo naʼakxilhtilhaya la wi milatamat (Efe. 5:10).
4. ¿La kiliʼakxilhatkan tastakyaw xalak Biblia xlakata kintaskujutkan?
4 La naʼakxilhaw tuku kinkamalakapastakkanan. ¿Akxilhnita pi akxni wi tiku kgosnankgo o tsalanan tiku anta wilakgo wanikgo tachuwin nema namatliwakglhkgo tiku tatayakgo? Xlakan matliwakglhputunkgo xlakata tlan nachan niku xlichanat chu ni kaj maxlajwaniputunkgo. Nachuna kitaxtu xlakata tamakxtumit chu likgalhtawakga nema kinkamatliwakglhan chu kinkamalakapastakniyan textos xalak Biblia xlakata “luwa nakaliwaniya mpi nalichuwinankgo ntachuwin”: uma kaj kinkalimatliwakglhputunan chu ni kinkamamakgkatsiniputunan pi ni lhuwa tuku tlawamaw (2 Tim. 4:2). Wa xlakata, tlan liwana nakatsiyaw pi komo chuntiya xliputum kinakujkan naskujnaniyaw, Jehová nalakapastaka tuku “ntlawamaw, chu tapaxkit” (Heb. 6:10).