¿Nalichuwinanaw Dios niku nakatatanokglhaw latamanin o alakatanu? ¡Tlan chuna natlawaya!
1. 1) ¿Tuku wamputun nakalitachuwinanaw Dios latamanin niku nakatatanokglhaw? 2) ¿La xlilhuwa tiku wilakgo unu katsinikgolh tuku xaxlikana xlakata kalitachuwinanka Dios niku katatanokglhka?
1 ¿La xlilhuwa xalak mincongregación katsinikgolh tuku xaxlikana kaj xlakata kalitachuwinanka Dios niku katatanokglhka? Ni katikanajla komo nawanikana. ¿Tuku wamputun nalichuwinanaw Dios niku nakatatanokglhaw latamanin? Wamputun nakalitachuwinanaw xalakwan xalaksasti latamanin tiku nakatatanokglhaw chali chali: kʼescuela, kputaskujut, akxni anaw tamawananaw, akxni kalakgapaxialhnanaw kifamiliajkan o kintalakatsukan, akxni paxialhnamaw o atanu. Lakatum, xwilakgo liwaka akgtiy ciento xTatayananin Jehová tiku xtamunukgonita, 40% lakgapaskgolh xaxlikana xlakata kalitachuwinanka Dios niku katatanokglhka, uma limasiya pi lu tlan kitaxtu akxni chuna tlawayaw.
2. ¿Tukuya liʼakxilhtit lichuwinan Biblia xlakata tiku lichuwinankgolh Dios niku katatanokglhkgolh latamanin?
2 Tiku xlichuwinankgo Dios kxapulana siglo na lhuwa xkalitachuwinankgo Dios niku xkatatanokglhkgo latamanin. Kawiliw akgtum liʼakxilhtit, akxni xtitaxtuma kSamaria, Jesús tachuwinalh chatum puskat nema xmakutuma chuchut kpozo nema xtlawanit Jacob (Juan 4:6-26). Chatum xlakskujni mapakgsina xalak Etiopía xlikgalhtawakgama tuku tsokgli palakachuwina Isaías, Felipe chuna limatsukilh xtakgalhchuwin: «¿Akgatakgsa ntu likgalhtawakgapat?» (Hech. 8:26-38). Akxni xtanuma kpulachin anta kFilipos, Pablo litachuwinalh Dios chatum tiku kuenta xtlawama pulachin (Hech. 16:23-34). Chu alistalh Pablo «na paks xmakgamakglhtinankgoy wa nti xʼan lakgatayay» akxni xlakgachinukanit kxchik, «xliakgchuwinama xlimapakgsin Dios, chu na xmasiyuma xtamasiyun xpalakata nkimPuchinakan Jesucristo, tini mpala xliwanilh» (Hech. 28:30, 31). Komo xlakan chuna tlawakgolh wix na tlan chuna natlawaya, maski xamaxana wix. ¿La natlawaya?
3. ¿La tlan namakganaw tamaxana?
3 La namatsukiyaw. Kilhuwakan lu tuwa makgkatsiyaw natsukuyaw katachuwinanaw tiku ni lakgapasaw. Maski lakgapasaw, tuwa namakgkatsiyaw nalitachuwinanaw tuku xaxlikana. Pero komo liwana lakpuwanaw la lu tlan likatsi Jehová, tuku lu lanka xtapalh kinkamaxkinitan xlakata kintakanajlakan chu xlakata la lu nitlan wilakgo latamanin xalak kakilhtamaku, uma nakinkamakgtayayan xlakata nakalitachuwinanaw Dios latamanin (Jon. 4:11; Sal. 40:5; Mat. 13:52). Nachuna, tlan naskiniyaw Jehová tamakgtay xlakata ni napekuanaw (1 Tes. 2:2). Chuna la wa chatum tiku kilalh kGalaad: «Kakxilhnit pi oración kimakgtaya akxni tuwa makgkatsi nakatachuwinan latamanin». Komo ni liwana katsiya tuku nawana xatsekg katlawa oración (Neh. 2:4).
4. ¿Tuku nalakapastaka natlawaya chu tuku xlakata?
4 La wan xtukuwani, xlakata tlan nalichuwinanaw Dios niku nakatatanokglhaw latamanin ni talakaskin liwana nalakkaxwiliya tuku nawana o ni talakaskin tunkun nalikgalhtawakgaya akgtum texto xalak Biblia. Tuku nalakapastakaw natlawayaw tlan namatsukiyaw akgtum takgalhchuwin maski ni tunkun nalitachuwinanaw xlakata Dios. Lhuwa natalan wankgo pi akxni chuna tlawakgo, tlakg nituwa makgkatsikgo lichuwinankgo xalakwan xalaksasti. Wa xlakata, komo wi tiku ni lakaskin ni xafuerza natachuwinamputuna. Ni kasitsi chu alakatanu kapimpara.
5. ¿Tuku tlawa chatum tala xlakata tlan nakalitachuwinan Dios latamanin niku katatanokglha?
5 Chatum tala puskat tiku xamaxana lakputsanit la tlawa: akxni an tamawanan wi tiku lakakxilha chu talitsiyan. Komo na natalitsiyankan xla wi tuku wan. Akxni kgaxmata tiku chuna wanilh, uma tlawa pi ni napekuan chu tlakg natachuwinamputun. Liwana kgaxmata chu lakpuwan tuku nalakgati tiku tachuwinama xlakata xalakwan xalaksasti. Chuna tlan kamaxkinit lhuwa likgalhtawakga latamanin chu asta tlan matsukinit akgtum takgalhtawakga.
6. ¿La tlan namatsukikan akgtum takgalhchuwin niku katatanokglhkan latamanin?
6 Xlakata wi tiku tlan natsukuyaw tachuwinanaw. ¿Tuku tlan nawanaw xlakata wi tiku natsukuyaw takgalhchuwinanaw? Kalakapastakti: akxni Jesús tatanokgli puskat niku kxkgatnankan kaj skinilh aktsu chuchut (Juan 4:7). Xlakata wi tiku natsukuya tachuwinana max kaj talakaskin nawaniya akgtum akgtiy tachuwin o natlawaniya akgtum takgalhskinin. Chuna la nachuwinantilhaya, max naʼakxilha pi tlan nalichuwinana akgtum texto xalak Biblia nema tlan namasiyaniya xaxlikana (Ecl. 11:6). Makgapitsin tlan kakitaxtuninit akxni kalitachuwinankgo tuku lakgatikgo latamanin chu tlawanikgo akgtum takgalhskinin. Akgtum liʼakxilhtit, akxni kgalhipat makuchina, tlan xwanti: «¡Lu naklipaxuwa akxni nasputkgo putum tajatat!».
7. ¿La kinkamakgtayayan kuenta natlawayaw tuku akxilhaw akxni kalitachuwinanaw Dios tiku katatanokglhaw?
7 Nakinkamakgtayayan kuenta natlawayaw tuku akxilhaw. Akgtum liʼakxilhtit, komo akxilhaw pi wi tiku kgalhi xkamanan chu lu tlan tayat kgalhikgo, tlan nawaniyaw pi lu tlan la kamasiyanima xkamanan chu nakgalhskinaw: «¿La tlawaya xlakata lu tlan nakamasiyaniya?». Chatum tala kuenta tlawa tuku lichuwinankgo tiku kataskuja chu alistalh kamaxki likgalhtawakga nema lichuwinan xlakata tuku katsiputunkgo. Akgtum liʼakxilhtit, akgtum kilhtamaku katsilh pi chatum tiku xtaskujma xʼama tamakgaxtokga, wa xlakata linilh maktum revista ¡Despertad! nema xlichuwinan la tlawakan akgtum tamakgaxtokgat. Uma tlawalh pi xlichuwinankgolh tuku lichuwinan Biblia.
8. ¿La tlan namaklakaskina likgalhtawakga xlakata wi tiku natsukuya tachuwinana?
8 Atanu tuku tlan natlawayaw wa nalikgalhtawakgayaw kilikgalhtawakgakan niku nakinkaʼakxilhkgoyan amakgapitsin. Chatum tala putsa krevista Makatsinina o ¡Despertad! akgtum artículo nema wi tiku nalikgalhtawakgaputun chu tsuku likgalhtawakga pero ni takgaxmata. Komo akxilha pi wi tiku akxilhma revista, tlawani akgtum takgalhskinin o lichuwinan tuku wan uma artículo. Uma tlawa pi tlan wi tiku natsuku tachuwinan chu nalitachuwinan Dios. Asta maski kaj namakgxtakga likgalhtawakga niku amakgapitsin naʼakxilhkgo natlawa pi tiku kataskujaw o kataʼanaw kʼescuela nakatsiputunkgo chu nakinkatlawanikgoyan takgalhskinin.
9, 10. 1) ¿La tlan nalakputsayaw la nakalitachuwinanaw latamanin niku nakatatanokglhaw? 2) ¿La tlawanita wix?
9 Kalakputsaw la tlan wi tiku natsukuyaw tachuwinanaw. Xlakata lu xlakaskinka natlawayaw uma taskujut, talakaskin ni nalakpuwanaw pi ni xlakaskinka nakalitachuwinanaw Dios niku nakatatanokglhaw latamanin. Wata kalakputsaw la natlawayaw xlakata tlan nalichuwinanaw Dios chali chali. Kalakapastakti tiku max nakatatanokglha chu tuku tlan nawaniya xlakata tlan natachuwinana. Kalipi mi Biblia chu nachuna likgalhtawakga xlakata tlan namaxkiya tiku nakgaxmata (1 Ped. 3:15).
10 Lhuwa tiku lichuwinankgo Dios lakputsakgonit la tlan nakatachuwinankgo latamanin niku nakatatanokglhkgo. Kawiliw akgtum liʼakxilhtit, chatum tala puskat tiku ya xchik niku ni mastakan talakaskin natanukan, xla malakgnu rompecabezas nema kgalhikgo dibujos xalakglilakgatit niku ankgo kgamanankgo tiku anta wilakgo. Akxni latamanin tayakgo chu wankgo pi lu lilakgatit ama dibujo, xla kalitachuwinan tuku malaknu Biblia pi natawila «xasasti akgapun, chu xasasti tiyat» (Apo. 21:1-4). ¿La na tlan xtlawa xlakata tlan xkalitachuwinanti Dios latamanin niku xkatatanokglhti?
11. ¿La tlan natlawayaw xlakata chuntiya nakatsikgo xlakata Dios tiku katatanokglhwi?
11 Kalakgpimpara tiku kgaxmatli. Komo tekgsti tiku kgaxmata, kalakgpimpara. Xlakata tlan natachuwinamparaya, kawani: «Lu klipaxuwa la ktachuwinan. ¿Niku tlan naktekgsan xlakata nachuwinamparayaw?». Makgapitsi natalan maxkikgo xdirección chu número xla xteléfono tiku tachuwinankgolh chu wanikgo: «Klakgatilh la ktachuwinan. Komo tlakg katsiputuna xlakata tuku lichuwinaw, unu tlan nakimputsaya». Komo makgkatsiya pi nila nalakgpimparaya, tunkun kamaxki formulario Sírvase visitar (S-43-S) secretario xalak mincongregación xlakata namaxki congregación niku tlan nalakgankgo.
12. 1) ¿Tuku xlakata natsokgwiliyaw kilhtamaku nema lichuwinanaw xtachuwin Dios niku katatanokglhaw latamanin? 2) ¿Tuku lu tlan kitaxtunit? (Kaʼakxilhti recuadro «Akxni lichuwinankan Dios niku katatanokglhkan latamanin tlan kitaxtu».)
12 Pero, namakatsinanaw kilhtamaku nema maklakaskinaw akxni kalitachuwinanaw Dios latamanin tiku katatanokglhaw. Katsokgwili maski ni akglhuwa minuto nema kalitachuwinana akgatunu kilhtamaku. Komo chatunu chatunu tiku lichuwinankgo Dios maski kaj akgkitsis minuto akgatunu kilhtamaku, ¡akgtum papaʼ akgkutujun millón hora nakitaya!
13. ¿Tuku natlawa xlakata nakalitachuwinamputunaw xlakata Dios tiku nakatatanokglhaw?
13 Kalitachuwinaw Dios niku katatanokglhaw latamanin xlakata paxkiyaw Dios chu latamanin (Mat. 22:37-39). Xlakata lu paxtikatsiniyaw tayat chu tuku lakapastaknit natlawa Jehová tlawa pi nalichuwinanaw «xlakata na natakatsi wakg lakchixkuwin la laklikuanit tu katlawanita, y la snun likaknit mapakgsina» (Sal. 145:7, 10-12). Xlakata lu xlikana kamakgtayaputunaw latamanin lakputsayaw la nalichuwinanaw xalakwan xalaksasti xlakata ananku kilhtamaku (Rom. 10:13, 14). Komo nalakapastakaw tuku tlan xkitaxtulh chu nalakaxwiliyaw tuku nawanaw, putum tlan nalichuwinanaw Dios tiku natatanokglhaw... chu max, asta tlan napaxuwayaw komo namakgtayayaw tiku kgaxmatputun xlakata nakatsini xaxlikana.
[Blurb on page 4]
Kalakpuwanti pi kaj tsinu tachuwin nalimatsukiya mintachuwin; chuna ni tuwa namakgkatsiya
[Blurb on page 5]
Lhuwa tiku lichuwinankgo Dios tekgskgonit la tlan nakalitachuwinankgo Dios niku nakatatanokglhkgo latamanin
[Box on page 5]
Tuku tlan natlawayaw xlakata namatsukiyaw akgtum takgalhchuwin
◼ Kaskini Jehová tamakgtay xlakata tlan natsukuya
◼ Kakaputsa tiku tasikgo pi paxuwakgo chu ni lakapalakgo
◼ Kakalakakxilhti, kakatalitsiyanti chu kawanti tuku akxtum lakgatiyatit
◼ Liwana kakgaxpatti
[Box on page 6]
Akxni lichuwinankan Dios niku katatanokglhkan latamanin tlan kitaxtu
• Akxni xkgalhkgalhima pi xkaxtlawaka xputlaw, chatum tala kalitachuwinalh Dios tiku anta xwilakgo chu kamaxkilh invitación xlakata xʼankgolh ktaʼakgchuwin. Akxni titaxtulh akgtum kata, kʼakgtum lanka tamakxtumit lu lipaxaw makgachipalh chatum tala tiku ni xlakgapasa. ¡Wa xwanit chatum chixku tiku xmaxkinit invitación niku xmakaxtlawinama xputlaw katata! Alh kgaxmata taʼakgchuwin chu skilh akgtum takgalhtawakga. Chu uku xla chu xpuskat tamunukgonit.
• Chatum tala puskat tiku litachuwinanka Dios niku tatanokglhka, wa kalitachuwinan Dios tiku kalakgapasli xlakata chatutu xkamanan. Uma tlawa pi tlan nakalitachuwinan xtalakatsunin chu tiku kalakgapasa xalak escuela chu akxni kamamakxtumikan natlatni. Akxni wi tiku tachuwinan, tsinu tuku wan pero limasiya pi xlikana makgtaya Biblia xlakata tlan nakamakgastaka xkamanan; alistalh tsuku lichuwinan atanu tema. Akxni tsukunita tachuwinan, tlakg nituwa makgkatsi nalitachuwinan xalak Biblia alistalh. Chuna la tlawa makgtayanit xlakata kgalhkutiy latamanin natamunukgo.
• Chatum chixku tiku sta seguros alh xchik chatum tala puskat chu litachuwinalh Dios. Tala kgalhskilh komo xla xkgalhiputun akgtum latamat niku ni xtatatlalh, xpaxuwalh chu nikxni xnilh. Xla wa pi xlakaskin chu xkatsiputun tuku xlichuwinama tala. Tala masiyanilh tuku malaknu Dios. Uma chixku makglhtinalh maktum likgalhtawakga chu likgalhtawakgakgolh akgtum kakgotanun o smalankgan. Lakaxwilikgolh xlakata tlan xlimakgalhtawakgeka Biblia. Tsukulh an ktamakxtumit chu alistalh tamunulh.
• Chatum tala puskat akxni xʼan kʼavión tsukulh tachuwinan tiku xpaxtuwi chu litachuwinalh xlakata Dios. Akxni taktakgolh kʼavión tala maxkilh xdirección chu xnúmero xteléfono, chu wanilh pi xmakgamakglhtinalh akgtum takgalhtawakga akxni xlakgapaxialhnankgolh xtatayananin Jehová. Lichali chatiy xTatayananin Jehová ankgolh kxchik. Uma puskat tsukulh kgalhtawakga lakapala stakli xtakanajla, tamunulh chu alistalh na chatutu tiku tsukulh kamakgalhtawakge.
• Chatum tala chixku tiku nialh lakawanan nema xkgalhi akgtum ciento kata chu anta wi niku kamakgtakgalhkan lakgkgolotsijni, makglhuwa chuna wan: «Maklakaskinaw Tamapakgsin». Uma tlawa pi enfermeras chu amakgapitsin tiku na anta wilakgolh natlawanikgo takgalhskinin chu chuna tlan nalichuwinankgo xTamapakgsin Dios. Akgtum kilhtamaku, chatum tiku skuja anta kgalhskilh tuku natlawa kparaíso. Tala kgalhtilh: «Nakakxilha, naktlawampara chu naklhkuyu kisilla de ruedas». Xlakata xla nialh lakawanan skini uma puskat pi kalikgalhtawakganilh xrevistas. Akgtum kilhtamaku alh lakgapaxialhnan xtsumat tala, chu tiku anta skujma skinilh revistas xlakata tlan xlilh xchik. Chatum enfermera wanilh: «Tachuwin nema kkgalhiyaw unu wa uma: “Maklakaskinaw Tamapakgsin”».
• Akxni chatum tala puskat xwi kʼakgtum restaurante, kgaxmatli pi xwilakgo lakchixkuwin tiku xlinkgoya kata chu xlichuwinamakgo política. Akxni chatum wa pi mapakgsinanin nila masputukgo taʼakglhuwit nema kgalhikgo latamanin, tala lakpuwa: «Uku kkgalhi kilhtamaku». Tlawalh akgtum oración chu kalakgtalakatsuwilh. Pulana wa tiku xwanit, alistalh kalitachuwinalh akgtum tamapakgsin nema xʼama lakkaxtlawa xtaʼakglhuwitkan latamanin, xTamapakgsin Dios, chu alistalh kamaxkilh maktum folleto. Akxni chuna tlawalh talakatsuwilh tiku lakgayawakanit restaurante. Tala lakpuwa pi xʼamaka skinikan pi xʼalh pero uma chixku xkgaxmatnit tuku xlichuwinamakgo chu na xlakaskin maktum folleto. Alistalh na milh chatum puskat tiku na anta skuja nema kgaxmatli tuku xlichuwinamakgo chu xtasama. Uma puskat xlimakgalhtawakgamakaja Biblia pero la uku xkgalhtawakgaputumpara.