¿La xmakgtaya tiku tamakgaxtokga chatum tala wantiku ni xTatayana Jehová?
1. ¿Tuku xlakata wanaw pi ni kajwatiya natalan tiku tamakgaxtokgkgo tiku ni kgalhtawakga makgtayaputunkgo na nakanajla?
1 ¿La kgalhlit wilakgo kmincongregación tiku tamakgaxtokga chatum tiku ni xTatayana Jehová? Xlikana pi lu xlakgatilh komo tiku paxki na xkakninanilh xaxlikana Dios. Pero ni kajwatiya uma natalan chuna lakaskinkgo. Xtachuna la Dios putum congregación lakaskinkgo pi “paks latamanin nalakgapaskgo wa talulokgtat”, o xaxlikana (1 Tim. 2:4). ¿La tlan nakatalakatsuwiniyaw tiku tamakgaxtokgkgo natalan wantiku ni xtatayana Jehová?
2. ¿La kinkamakgtayayan nakaʼakgatekgsiniyaw tiku ni kanajla?
2 Pulana, nakatsiyaw la lakapastaka tiku ni xTatayana Jehová. Lhuwa lakchixkuwin kapaxkikgo xfamiliajkan chu tlan kalikatsinikgo xpuskatkan chu xkamanankan, pero ni chuna kanajlakgo la akinin. Nachuna, max ni lhuwa tuku katsikgo xlakata xTatayananin Jehová, kaj wa katsikgo tuku kawanikgonit xʼamigos tiku ni lu katsikgo xlakata xtatayananin Jehová o xlakata tuku kawanikgonit tiku ni kaʼakxilhputunkgo xtatayananin Jehová. Wilakgo tiku nitlan akxilhkgo xlakata kstalanina Cristo nalimaklakaskin kilhtamaku nema pulana xkalimaxtuni xfamilia xlakata «natlawa tuku xla xtakanajla». Komo akgatekgsniyaw, o namakgachakgxiya tiku ni xtatayana Jehová nakinkamakgtayayan xlakata tlan nalikatsiniyaw chu namaxkiyaw kakni chu nachuna ni katipekuaw akxni natachuwinanaw (Pro. 16:20-23).
3. ¿La tlan natlawayaw pi chixku o puskat tiku xTatayana Jehová nakatsiputun tuku xaxlikana?
3 Xlikana nakamakgtayaputunaw. Namin kilhtamaku, tuku tlakg nakinkamakgtayayan xlakata latamanin nakatsiputunkgo tuku xaxlikana, wa tuku tlawayaw chu ni wa akxni kalitachuwinanaw xalak Biblia (1 Ped. 3:1, 2). Tuku tlakg xlakaskinka wa xlikana nakamakgtayaputunaw. Natalan lakpuskatin tlan natachuwinankgo chatum puskat tiku ni kanajla chu natalan lakchixkuwin natachuwinankgo xchixku chatum tala. ¿La natlawakgo?
4. ¿La tlan nalimasiyayaw pi kamakgtayaputunaw?
4 Komo ni lakgapasa xchixku o xpuskat, pulana katachuwinanti tala xlakata tuku tlawaputuna. Komo xapulana nitlan nakgalhtiyan wantiku ni kanajla, ni kaxlajwananti. Xlakata wix tlan nalikatsiniya chu xlikana namakgtayaputuna max nalakgpali tuku lakpuwan xlakata xtatayananin Jehová (Rom. 12:20). Kawiliw akgtum liʼakxilhtit, makgapitsi natalan tiku tliwakga wi xtakanajlakan kawanikgo tiku ni xtatayana Jehová chu xfamilia xlakata kaʼankgolh wayankgo kxchikkan, xlakata tlakg nalalakgapaskgo chu nalakgpalikgo tuku nitlan xlakpuwanikgo. Lichuwinankgo tuku lakgatikgo, chu ni xafuerza litachuwinamputunkgo tuku xalak Biblia. Uma tlan nalitachuwinana alistalh, akxni tlakg talalipina. Chu asta max naʼan ktamakxtumit akxni nakalakgapasa makgapitsi natalan xalak congregación niku tlan nakatsi tuku katsinima tiku tamakgaxtokga. Pero maski nina la katikatsilh xaxlikana, nawaniyaw pi tlan xlakata makgtaya tiku tawi.
5. ¿Tuku tlan natlawakgo lakgkgolotsin xalak congregación?
5 Lakgkgolotsin xalak congregación, wa tlakg xlilakgtalakatsuwitkan chixku o puskat tiku ni xTatayana Jehová chu nalakputsakgo la nalitachuwinankgo xalak Biblia. Chatum tiku ni xkgaxmatputun tuku wan Biblia max akxni wi khospital o lu snun tatatla nalakaskin nalitachuwinankan wantuku wan Biblia. Komo kʼakgtum tamakgaxtokgat niku tanu tanu kanajlakan tuwa tuku natitaxtukan, la akxni niy chatum xalak familia, lakgkgolotsin xalak congregación tlan nawanikgo tiku ni kanajla la kanajlayaw xlakata nakgaxmatkgo tuku nakamatliwakglha xfamilia.
6. ¿Tuku xlakata natalakatsuwiniyaw tiku tamakgaxtokga chatum tala wantiku ni xtatayana Jehová?
6 ¡Tala lu xpaxuwalh komo tiku tamakgaxtokga na xtatayana Jehová xwa! Pero uma na lu xmakgapaxuwalh Jehová, ángeles chu putum congregación (Luc. 15:7, 10). Maski tasiya pi latamanin ni kgaxmatputunkgo, chuntiya tlan napaxuwayaw, xlakata tuku tlawamaw makgapaxuwa Jehová tiku «ni chatum lakaskin natsankgay, chi wampi paks kalakgchankgolh nalakgaspittayanikgoy xtalakgalhinkan» (2 Ped. 3:9).
[Epígrafe de la página 6]
Namin kilhtamaku tuku pulana tlakg nakinkamakgtayayan xlakata nakatsiputunkgo tuku xaxlikana, wa tuku tlawayaw chu ni wa akxni kalitachuwinanaw xalak Biblia