Xasasti artículos nema tlan nalitsukuyaw makgalhtawakgananaw
1. ¿Tuku xasasti artículos natsuku taxtu krevista Makatsinina, chu tuku xlakata katlawakanit?
1 Febrero kata 2011 kmakgapitsi revistas Makatsinina, natsuku taxtu xasasti artículos xlakata nakinkamakgtayayan namatsukiyaw takgalhtawakga xalak Biblia. Wanikan «Tuku masiya xTachuwin Dios». Chu maski katsiyaw pi lhuwa latamanin niku lichuwinanaw Dios lipaxuw nalikgalhtawakgakgo makatunu revista, uma artículos katlawakanit xlakata tiku lichuwinan Dios nakatalikgalhtawakga tiku nakalakgan.
2. ¿Tuku limin akgatunu artículo?
2 Tuku limin. Xtítulo chu xsubtítulos la takgalhskinin limin xlakata tlan natlawaniya tiku tachuwinampat chu tlan nalitachuwinana. Wilikan textos nema tlakg xlakaskinka, ni tsokgwilikanit tuku wan uma textos xlakata tiku takgalhchuwinampat namakgtaya tuku nalikgalhtawakga kxTachuwin Dios. Ni laklanka párrafo limin xlakata tlan natalikgalhtawakgaya akxni nalakgpina. Nachuna akgatunu artículo linan klibro ¿Tuku xlikana masiyay Biblia? xlakata ni tuwa natsukuyaw masiyaniyaw tuku wan uma libro.
3. Akxni anaw lichuwinanaw Dios akgatunu chiki, ¿la tlan nalimaklakaskinaw tuku lichuwinankgo artículos xlakata wi tiku natsukuyaw makgalhtawakgayaw?
3 La nalimaklakaskinaw. Akxni namalaknuniya revista, katlawani akgtum takgalhskinin nema nakatsiputun tiku tachuwinampat xlakata tuku lichuwinan uma artículo. Akgtum liʼakxilhtit, pulaktum lichuwinan la xlilakaskinka tuku wan Biblia. Tlan xwanti: «¿Lakpuwana wix pi Biblia xTachuwin Dios o kaj akgtum tlan likgalhtawakga? [Kamaxki talakaskin nakgalhtinan.] Wi tuku lu xlakaskinka klitachuwinamputunan xlakata uma tema». Kamasiyani xapulana takgalhskinin, kalikgalhtawakga xapulana párrafo chu kaputsa texto xalak Biblia. Kalikgalhtawakganipara takgalhskinin chu kawanin tuku lakpuwan. Kamasiyani tuku wan likgalhtawakga chuna la wix nakatsiya pi tlan, kalimaklakaskinti takgalhskinin chuna la tatsokgtilhanit. Akxni nina waniya pi pimpata, kamasiyanipara atanu takgalhskinin chu katalakaxla tukuya kilhtamaku tlan naʼakxilhatit uma takgalhskinin. Kataspitpara akgatunu semana xlakata tlakg natalikgalhtawakgaya artículo asta akxni natalikgalhtawakgaparaya atanu revista. Atanu tuku tlan natlawaya tlan nawaniya pi limakgalhtawakgaputuna. Tlan namaklakaskina revista xlakata namasiyaniya la limakgalhtawakganankan.
4. Akxni wi tiku nalakgamparayaw, ¿la tlan nalimaklakaskinaw uma artículos?
4 Nachuna, uma sección tlan nalimaklakaskinaw akxni wi tiku akgatunu papaʼ maxkiyaw revistas chu akxni wi tiku lakgamparayaw. Tlan xwanti: «Revista Makatsinina limin xasasti artículos. Kimaxki talakaskin nakmasiyaniyan». Skiniyaw Jehová pi uma xasasti sección natlawa pi lhuwa latamanin «nalakgapaskgoy wa ntalulokgtat», o xaxlikana (1 Tim. 2:4).