Tayat nema tlakg xlakaskinka nakgalhi xatlan makgalhtawakgena
1. ¿Tuku tayat xlikgalhit xatlan makgalhtawakgena?
1 ¿Tuku xlikgalhit xatlan makgalhtawakgena xalak Biblia? ¿Lhuwa takgalhtawakga xlikgalhit? ¿Talakaskin akglhuwata kata tlawama uma taskujut? ¿Liwana nakatsi masiyanan? Xtakgalhtin xapulana takgalhskinin wa tapaxkit: tayat nema makgantaxti putum tuku wan Limapakgsin, tuku lilakgapaskan kstalaninanin Cristo chu tayat nema tlakg talilakgapasa Jehová (Juan 13:35; Gál. 5:14; 1 Juan 4:8). Xlakata tlan makgalhtawakgena nawanaw talakaskin nalimasiyayaw tapaxkit.
2. ¿Tuku xlakata lu xlakaskinka nakapaxkiyaw latamanin?
2 Kakapaxki latamanin. Jesús, xaLanka Makgalhtawakgena, xkapaxki latamanin, uma tlawalh pi xkgaxmatnikgolh (Luc. 5:12, 13; Juan 13:1; 15:13). Komo kapaxkiyaw latamanin nalimaklakaskinaw putum kilhtamaku xlakata nakatachuwinanaw. Chuntiya nalichuwinanaw Dios: maski niti nakgaxmatputun, nakinkaputsastalanikanan o atanu tuku nakinkatlawaniputunkanan. Liwana nakakgaxmatniyaw tiku nakatachuwinanaw chu nakalitachuwinanaw tuku xlakan nakgaxmatputunkgo. Nachuna, nalimaklakaskinaw kinkilhtamakujkan xlakata nakatakgalhtawakgayaw latamanin chu nalakkaxwiliyaw tuku nakamasiyaniyaw.
3. ¿La nakinkamakgtayayan tapaxkit nema kgalhiniyaw tuku xaxlikana akxni nalichuwinanaw Dios?
3 Napaxkiyaw tuku xaxlikana masiya Biblia. Jesús na xpaxki tuku xaxlikana masiya Biblia. Asta xakxilha la tuku kgalhi lhuwa xtapalh (Mat. 13:52). Komo paxkiyaw tuku xaxlikana, lu xatapaxuwan nalichuwinanaw Dios chu lu nakgaxmatputunkgo tiku nakalitachuwinanaw. Uma tapaxkit nakinkamakgtayayan ni napekuanaw, nakinkamakgtayayan liwana nalakapastakaw pi lu xlakaskinka tuku lichuwinanaw chu ni nalakapastakaw tuku nila tlawayaw.
4. ¿La tlan nakgalhiyaw tapaxkit?
4 La nakgalhiyaw tapaxkit. Tlakg kapaxkiyaw latamanin akxni lakpuwanaw pi lu nitlan la wi xtakanajlakan chu akxni lakapastakaw liʼakxilhtit nema kinkawilinin Jehová chu xKgawasa (Mar. 6:34; 1 Juan 4:10, 11). Nachuna, tlakg napaxkiyaw tuku xaxlikana komo nakgalhtawakgayaw putum kilhtamaku chu liwana nalakpuwanaw tuku katsinimaw. Kalakapastakwi pi tapaxkit akgtum tawakat xla espíritu (Gál. 5:22). Xlakata tlan nakgalhiyaw, kaskiniw xtamakgtay Jehová chu kakinkamaxkin xʼespíritu santo (Luc. 11:13; 1 Juan 5:14). Maski anitaw kʼescuela o nitu kilanitaw, makgasa tlawamaw uma o lu lhuwa katsiniyaw masiyayaw, kimputumkan tlan namasiyayaw xTachuwin Dios komo kgalhiyaw tapaxkit.