«Kxlipaks naliʼakgchiwinanaw” Dios»
1. ¿Tukuya lu tlan liʼakxilhtit kinkamakgxtakgnin Pablo?
1 “Kamakgantaxti wa yuma ntaskujut.” (2 Tim. 4:5.) Apóstol Pablo tlan wanilh Timoteo umakgolh tachuwin xlakata chuna xtlawanit. Kkata 47 chu 56 akxni xminita Jesús Pablo makgtutu lichuwinantapulilh Dios. Nachuna, klibro xla Hechos makglhuwa lichuwinankan pi Pablo lu “liʼakgchuwinalh” Dios (Hech. 23:11; 28:23). ¿La tlan nachuna natlawayaw?
2. ¿La tlan liwana nalichuwinanaw Dios akxni anaw akgatunu chiki?
2 Akxni akgatunu chiki lichuwinanaw Dios. Wilakgolh latamanin tiku nikxni kgaxmatkgonit xtachuwin Dios, pero xlakata tlan nakgaxmatkgo talakaskin nakaputsayaw atanu hora xlakata nakamanokglhuyaw. Komo naʼanaw kakgotanun sábado o domingo max namanokglhuyaw xachixku. Nalakputsayaw la natlawayaw xlakata wi tiku natachuwinanaw kʼakgatunu chiki, nakinkamakgtayayan komo natsokgwiliyaw tiku ni katekgswi chu nakalakgamparayaw atanu hora. Chu komo niti natekgsaw maski chuna natlawayaw, tlan natlawayaw cartas o nakatachuwinanaw kteléfono.
3. ¿La tlan nalichuwinana Dios niku tsamakan chu niku katatanokglha latamanin?
3 Niku tsamakan chu niku katatanokglhaw latamanin. Akinin xtatayananin Jehová kamasiyaniyaw «xaxlikana liskgalala» putum tiku kgaxmatputunkgo. Min kilhtamaku kalitachuwinanaw «ktiji» o «kplazas» (Prov. 1:20, 21). Na lichuwinanaw Dios akxni wi niku anaw. Chuna tlan nawanaw pi “nitu ntu atipatu tlawayaw xman wa akgchuwinanaw” chu makgantaxtimaw tuku kinkalakgayawakanitan xlakata “kxlipaks naliʼakgchiwinanaw” Dios (Hech. 10:42; 17:17; 18:5; 20:20, 21, 24).
4. ¿La makgtayanan oración chu nalakpuwanaw tuku wan Biblia xlakata lhuwa nalichuwinanaw Dios?
4 Min kilhtamaku xlakata max nila liwana chuwinanaw o maxananaw, ni lichuwinamputunaw Dios chu Jehová katsi tuku nila tlawayaw (Sal. 103:14). Pero, akxni chuna namakgkatsiyaw, tlan natlawaniyaw oración Jehová xlakata nakinkamatliwakglhan chu tlan nachuwinanaw (Hech. 4:29, 31). Nachuna, nakinkamakgtayayan akxni kiʼakstukan nalikgalhtawakgayaw xTachuwin Dios komo nalakpuwanaw pi lu xlakaskinka nalichuwinanaw xalakwan xalaksasti (Filip. 3:8). Uma nakinkamakgtayayan lu xlakaskinka naʼakxilhaw nalichuwinanaw Dios chu xatapaxuwan natlawayaw.
5. ¿La natlawayaw xlakata namakgtayananaw nakgantaxtu tuku lichuwinalh palakachuwina Joel?
5 Palakachuwina Joel xlichuwinanita pi akxni nina min nawan xalipekua xkilhtamaku Jehová, xkachikin chuntiya xʼamakgo lichuwinankgo Dios (Joel 2:2, 7-9). Wa xlakata, liwana katlawaw uma taskujut nema nikxni katitatlawapa.