¿Namakgtayayan nakgalhiya niku miʼakstu nalichuwinana Dios?
1. ¿Tuku wamputun niku miʼakstu nalichuwinana Dios?
1 Komo kmincongregación lhuwa kgalhi niku lichuwinankan Dios, tlan namaxkikana tsinu, max anta lakatsu kminchik. Wa uma niku miʼakstu nalichuwinana Dios. Klibro Organizados kpágina 103 wan pi akxni kgalhiya niku miʼakstu nalichuwinana Dios namakgtayayan xlakata «liwana namaklakaskina kilhtamaku nema limaxtuya». Nachuna wan: «Max tlan nawaniya atanu tiku lichuwinan Dios xlakata nataʼanan».
2. ¿La natamakgatsiya niku miʼakstu lichuwinana Dios chu akxni makxtum nakatapina grupo?
2 Katalimakgatsi akxni makxtum lichuwinankan Dios. Komo namaxkikana lakatsu niku skuja, tlan nalichuwinana Dios akxni maxkikana kilhtamaku nawayana o akxni nataxtuya kmintaskujut. Na tlan nawaniya kataʼan atanu tiku na lakatsu skuja. Komo nalakgchanan lakatsu kminchik, wix chu mi familia tlan nalichuwinanatit Dios kakgotanun. Komo wix ni pina niku tamakxtumikan akxni ankan lichuwinankan Dios, lu xlakaskinka natlawaniya oración Jehová akxni nina pina lichuwinana Dios (Filip. 4:6). Nachuna, maski kgalhiya niku lichuwinana Dios na nakatatamakxtupiya congregación akxni ankgo lichuwinankgo Dios. Chu sábado o domingo niku lhuwa tamakxtumikgo akxni ankan lichuwinankan Dios talakaskin nakatapina mi grupo.
3. ¿La kinkamakgtayayan nakgalhiyaw niku kiʼakstukan nalichuwinanaw Dios?
3 La makgtayanan. Komo wix kgalhiya niku miʼakstu nalichuwinana Dios, ni katitsankganin niku napina chu tlan nalichuwinana Dios akxni nakgalhiya kilhtamaku. Na tlan tlakg nalichuwinana Dios xlakata ni talakaskin makgat napina. Uma makgtayanan xlakata precursores auxiliares o precusores regulares namakgatsikgo xkilhtamakujkan. Nachuna, akxni natekgsa chatum tiku nakgaxmata, tlan nalakgpimparaya chu namatsukiniya akgtum takgalhtawakga xalak Biblia. Namin kilhtamaku, makglhuwa nalichuwinana Dios anta niku skinita akxni nina maspita xlakata tlan naskin achatum. Makgapitsi wankgo pi kamakgtayanit xlakata tlan nakalakgapaskgo latamanin chu chuna tlan nakamasiyanikgo. ¿Tlan naskina niku nalichuwinana Dios xlakata namakgtayayan wix chu mi familia liwana namakgantaxtiyatit xtaskujut Dios? (2 Tim. 4:5.)