Niku tamasta xtakgalhtin akgtum takgalhskinin

◼ Akxni nawankan pi tlantiya natamunu tiku kgalhtawakgama, ¿tuku nalimasiya akxni naʼan ktamakxtumit chu akxni naʼan makglichuwinan Dios?

Tuku tlakg xlakaskina kilitlawatkan kkilatamatkan wa akxni tamunukan. Wa xlakata, akxni lakgkgolotsin namastakgo talakaskin pi natamunu tiku kgalhtawakgama, liwana xlikatsit tiku tamunuputun tuku skini Dios. Nachuna xlimasiyat pi lilatamaputun chuna la wan xTachuwin Dios.

Kstalaninanin Cristo kinkawanikanan pi putum kilhtamaku natamakxtumiyaw, wa xlakata tiku tamunuputun nachuna xlitlawat (Heb. 10:24, 25). Nachuna nalimasiya ktamakxtumit, akxni namasta xtakgalhtin. Chu max na matitaxti xtaʼakgchuwin Niku Masiyakan xlakata la Lichuwinankan Dios maski uma ni talakaskin xlakata natamunuya.

Xlakata akinin kstalaninanin Cristo, kinkalakgayawakanitan taskujut xlakata nalichuwinanaw xalakwan xalaksasti chu nakaputsayaw tiku kgaxmatputunkgo, wa xlakata tiku tamunuputun talakaskin pi pulana putum kilhtamaku namakglichuwinan xTachuwin Dios (Mat. 24:14; 28:19, 20). ¿Akglhuwa papaʼ natitaxtu xlakata tlan natamunu? Xlakata nalimasiya pi na tlawaputun xtaskujut Jehová, talakaskin pi natasiya pi lina kilhtamaku makglichuwinama xTachuwin (Sal. 78:37). Nachuna ni talakaskin lhuwa kilhtamaku natitaxtu, max asta ni akglhuwa papaʼ natalakaskin xlakata tlan natamunu. ¿Akglhuwa hora xlimastat akgatunu papaʼ? Nitu wi akgtum limapakgsin xlakata uma. Lakgkgolotsin liwana xliʼakxilhatkan tuku xlakata nila masta lhuwa hora tiku tamunuputun chu ni nawanikgo pi tlakg lhuwa tuku xlitlawat (Luc. 21:1-4).

Lakgkgolotsin o niku ni lhuwa wilakgolh lakgkgolotsin, tiku siervos ministeriales liwana xlikatsitkan pi tiku tamunuputunkgo tanu tanu xtapuwankan, wa xlakata liwana xliʼakxilhatkan komo makgatsi tuku skinkan xlakata tiku tamunuputun. Xlimasiyat pi xlikana xtatayana Jehová wamputun chu lhuwa xtapalh akxilha ankan ktamakxtumit chu makglichuwinankan Dios. Lakgkgolotsin liwana katsikgo pi tiku tamunuputun tlakg tsankgani namatliwakglha xtakanajla, chu ni tatalakxtumi chatum tiku lhuwata kilhtamaku tamununit. Komo lakgkgolotsin naʼakxilhkgo pi nina makgatsi tuku taskin xlakata natamunu, liwana nawanikgo tuku xlakata nina xlitamunut chu namaxkikgo tamakgtay xlakata xtakanajla.