Katlawatit chuna la tlawakgolh palakachuwinanin: Miqueas
1. ¿Tuku max xakstu kgalhskinka palakachuwina Miqueas akxni xmakgantaxtima tuku xlimapakgsikanit, chu tuku xlakata tlan nawanaw pi ni kaj paxkat wa xkilhtamaku?
1 Max akstu kinkakgalhskinkanitan tuku kilhtamaku nasputa tuku nitlan. Max palakachuwina Miqueas nachuna kgalhskinka, akxni xkamakatsinima kachikin Israel chu Judá pi Jehová xʼama kamalakgsputu. Pero ni kaj makgatsankgalh kilhtamaku akxni lichuwinalh Dios. Kata 740 akxni nina xmin Jesús akxni Miqueas xlamajku, Jehová makgantaxtilh xtachuwin chu malakgaxokgelh Samaria (Miq. 1:6, 7). Akxni titaxtulh kilhtamaku, kata 607 Jerusalén masputuka (Miq. 3:12). Chu akinin, ¿la natlawayaw la Miqueas xlakata kgalhkgalhimaw akxni Jehová namasputunan?
2. ¿Tuku xlakata nakgalhkgalhiyaw xkilhtamaku Jehová, chu tuku wamputun uma?
2 Kakgalhkgalhinaw. Miqueas tsokgli: «Pero kilakata, xlakata Jehová skgalalh naktawila. Xlikana nakkgalhkgalhinan xlakata kiDios kilakgmaxtuna» (Miq. 7:7). Uma ni wamputun pi Miqueas nialhtu tlawalh. Xla liwana makgantaxtilh tuku xlakgayawakanit xlakata palakachuwina xwanit. Nachuna, xlakata kgalhkgalhimaw xkilhtamaku Jehová, kaliskujwi xlakata “nakgalhiyaw xasantujlani kilatamatkan, chu xkakninanin Dios nawanaw” (2 Ped. 3:11, 12). Kalakapastakwi pi xlakata Jehová kinkakgalhkgalhiyan kamaxki talakaskin latamanin kamakgxtakgkgolh nitlan xtayatkan (2 Ped. 3:9). Wa xlakata, na kakgalhkgalhinaw la tlawakgolh palakachuwinanin, chuna la wan Biblia (Sant. 5:10).
3. ¿Tuku xlakata chuntiya naskiniyaw Jehová xʼespíritu santo?
3 Kalipawaw pi Jehová nakinkamatliwakglhan. Taskujut nema makgamakglhtinalh Miqueas lu tuwa xwanit, wa xlakata skinilh Jehová pi xmatliwakglhli (Miq. 3:8). Jehová katsi pi akinin na maklakaskinaw xtamakgtay, chu Biblia kinkawaniyan pi kaskiniw xtamakgtay kʼoración. Komo naxlajwananaw, xla nakinkamaxkiyan litliwakga xlakata namakgantaxtiyaw tuku kinkalakgayawakanitan (Sal. 84:5, 7; Is. 40:28-31). Kilhuwakan akxilhnitaw la Jehová kinkamatliwakglhnitan xliputum kilhtamaku nema skujnanimaw. Wa xlakata, chuntiya kaskiniw xʼespíritu santo (Luc. 11:13).
4. ¿Tuku lu tlan liʼakxilhtit kinkamakgxtakgnin Miqueas?
4 Miqueas tlakg xlakaskinka xakxilha natlawa xtalakaskin Jehová. Liwana xlakpuwanit natlawa xaʼakgstitum maski amakgapitsin lixkajnit xlinkgo xtayatkan. Chali chali na kinkaliʼakxilhkanan komo namakgatsankgananiyaw Dios. Wa xlakata liwana kalakpuwaw pi «nalatamayaw kxtukuwani Jehová kiDioskan, xliputum kilhtamaku» (Miq. 4:5).