Kakamakgtayaw tiku ni lakawanankgo kakatsinikgolh xlakata Jehová

1. ¿La limasiyalh Jesús pi xkalilakgaputsa tiku ni xlakawanankgo?

¹ Jesús xʼamaja taxtu kJericó. Ama kilhtamaku, chatiy tiku ni xlakawanankgo tsukukgolh wanikgo: «¡Kimpuchinakan, kakinkakgalhini ntalakgalhaman!». Jesús max lu xlakgaputsama, xlakata xkatsi pi nialh lhuwa xtsankga xlakata xmakgnika. Maski chuna, tachokgolh, katasanilh chu kamapaksalh (Mat. 20:29-34, TNM). ¿La tlan na nalakgalhamananaw chuna la tlawalh Jesús?

2. ¿La tlan nakalitachuwinanaw Dios latamanin tiku ni lakawanankgo nema katekgsaw ktiji?

² Kakamakgtayaw. Komo natatanokglhaw chatum tiku ni lakawanan, akgtum liʼakxilhtit max ktiji, katachuwinaw chu kawaniw pi makgtayaputunaw. Max xapulana ni kintikatachuwinamputun, xlakata wi tiku katlawanikgo tuku nitlan tiku ni lakawanankgo. Pero komo tlan likatsiyaw chu kalimasiyaniyaw pi kalilakgaputsayaw, max tlakg tlan namakgkatsi. Nachuna, kalakapastakwi pi tanu tanu la xlisnun lakgaxokgonkgo, chu uma natlawa pi nakatsiyaw la namakgtayayaw. Akxni makgtayanitaw nawan, tlan nawaniyaw pi akinin masiyayaw tuku lichuwinan Biblia. Kalikgalhtawakganiw akgtum texto xalak Biblia, la Salmo 146:8 o Isaías 35:5, 6. Na tlan namasiyaniyaw la tlan namakti archivos xla audio ksitio jw.org. Komo tlan likgalhtawakga kbraille, kakgalhskiw komo lakaskin maktum likgalhtawakga kʼuma tachuwin. Komo kgalhi akgtum computadora nema limin akgtum programa nema tlan likgalhtawakga tuku tatsokgnit kcomputadora, max na namakgtaya artículos nema wilakgolh kjw.org chu likgalhtawakga nema limin tipalhuwa colores (RTF), umakgolh pulaktiy formatos kaj xaʼespañol wi chu atanu tachuwin nema tlakg tachuwinan xlikalanka katiyatni. (Kaʼakxilhti recuadro «Akxni makgtayakan tiku ni lakawanan...».)

3. ¿La tlan nakatekgsaw tiku ni lakawanankgo niku lichuwinanaw Dios?

³ Kakatekgswi latamanin tiku ni lakawankgo. Xlikana, ni lu katekgsaw latamanin tiku ni lakawankgo akxni anaw akgatunu chiki, xlakata ni katachuwinanputunkgo tiku ni lakgapaskgo akxni wi tiku kalakgapaxiʼalhnankgo. Wa xlakata, lhuwa naliskujaw xlakata nakatekgsaw chu nakalitachuwinanaw Dios (Mat. 10:11). ¿Lakgapasaw tiku ni lakawanan anta kkintaskujutkan o taʼanaw kʼescuela? Komo chuna, kalitachuwinanaw tuku xaxlikana. Komo niku lichuwinanaw Dios anan akgtum escuela niku ankgo tiku ni lakawanankgo, kakgalhskiw tiku pulalin uma escuela komo lakaskin pi xliniw likgalhtawakga xla braille xlakata nawili kxbiblioteca. ¿Lakgapasaw akgtum familia tiku chatum ni lakawanan? ¿Anta niku lichuwinanaw Dios wi niku kamakgtayakan tiku ni lakawanankgo o niku wilakgolh tiku tatatlakgo chu na anta wilakgolh tiku ni lakawanankgo? Kawaniw xfamilia tiku ni lakawanan, wantiku makgamakglhtinan niku wilakgolh tatatlanin o xdirector akgtum escuela pi akinin xtatayananin Jehová kamakgtayaputunaw tiku ni lakawanankgo, chu kgalhiyaw likgalhtawakga kbraille chu grabaciones nema tlan nakamaxkiyaw. Kalimasiyani Biblia pi Dios malaknu pi nakamapaksa tiku ni lakawanankgo. Na tlan nakamasiyaniyaw video nema wanikan «No sé qué haría sin ella», nema wi ksitio xla Internet jw.org. Uma video lichuwinan tuku titaxtulh chatum tala chixku tiku ni lakawanan la makgtayanit Biblia kbraille. Komo liwana nakawaniyaw tuku xlakata kalakgapaxialhnamaw, max tlakg ni tuwa nakatekgsaw tiku ni lakawanankgo.

4. ¿Tuku kinkamasiyaniyan tuku titaxtulh tala puskat wanikan Janet?

⁴ Chatum tala puskat tiku ni lakawanan wanikan Janet alh niku wilakgolh tiku ni lakawankgo chu tsukulh tachuwinan chatum tsumat. Janet wanilh: «Akxni Jesús latamalh kKatiyatni, kamakuchilh latamanin tiku ni lakawanankgo xlakata nalimasiya tuku natlawa xpalakata tiku ni lakawanankgo kilhtamaku nema aku mima». Alistalh akxilhkgolh tuku wan Apocalipsis 21:3, 4, chu Janet litachuwinalh la xTamapakgsin Dios namakgantaxti uma tamalaknun. Uma tsumat, kaks tayalh tsinu, chu wa: «Xlimakgtumku chuna kiwani chatum tiku ni lakawanan. Atsinu ni putum latamanin tiku lakawanankgo lakpuwankgo pi tiku ni lakawanankgo kamalakgaxokgemaka xlakata tuku tlawakgonit o xlakata tuku tlawakgonit xnatlatnikan». Janet malakgachanilh akgtum link kcorreo electrónico xla libro ¿Tuku xlikana masiyay Biblia?, chu la uku makgtiy akgatunu semana akxtum likgalhtawakgakgo Biblia.

5. Maski nila kamakuchiyaw tiku ni lakawanankgo, ¿la tlakg tlan nalatamakgo komo nakalilakgaputsayaw?

⁵ Xlikana, akinin nila kamakuchiyaw tiku ni lakawanankgo chuna la tlawalh Jesús. Pero wi tuku tlan natlawayaw. Xdios uma kakilhtamaku kamalakgatsinit lhuwa latamanin, makgapitsi xlikana ni lakawanankgo. Tlan putum nakamakgtayayaw naʼakgatekgskgo tuku xaxlikana masiya xTachuwin Dios (2 Cor. 4:4). Jesús kamakuchilh chatiy tiku ni xlakawanankgo lakatsu kJericó xlakata kalakgkatsalh (Mat. 20:34). Komo akinin nachuna kalakgkatsanaw tiku ni lakawanankgo, tlan nakamakgtayayaw xlakata nalakgapaskgo Jehová, tiku nakamalakawanipara chu nakamaxki latamat nema ni kgalhi lisputni.