La tlan namaklakaskinaw grabaciones xla audio
1. Maski kgalhiyaw likgalhtawakga, ¿tuku atanu na kgalhiyaw?
1 Xlakata sitio xla Internet jw.org, lhuwa latamanin litamakgtayakgonit xlakata likgalhtawakgakgo lakwan tamakatsin chu xaxlikana (Ecl. 12:10). Pero ¿kgaxmatkgonita grabaciones xla audio? Lhuwa likgalhtawakga nema anan na wilakgolh xla audio. ¿La kinkamakgtayayan?
2. ¿La tlan namaklakaskinaw grabaciones xlakata nalitamakgtayayaw chu nachuna kifamiliajkan?
2 Kalimaklakaskinti wix chu mi familia. Kgaxmatkan grabación xlakata Biblia, revistas o atanu likgalhtawakga akxni paxialhnanaw o tlawayaw atanu taskujut wa tuku tlakg tlan limaklakaskinaw kinkilhtamakujkan (Efes. 5:15, 16). Nachuna, tuku tlan tlawayaw akxni kakninaniyaw Dios kfamilia wa nastalaniyaw takgalhtawakga akxni kgaxmatmaw grabación. Chu akxni kiakstukan kgalhtawakgayaw, grabaciones liwana kinkamakgtayayan tlakg liwana nakgalhtawakgayaw o komo katsinimaw xasasti tachuwin.
3. Latamanin tiku katatanokglhaw akxni lichuwinanaw Dios, ¿tiku tlan nalitamakgtayakgo grabaciones?
3 Akxni lichuwinanaw Dios. Lhuwa latamanin nema katekgsaw akxni lichuwinanaw Dios lakpuwankgo pi ni kgalhikgo kilhtamaku xlakata nakgalhtawakgakgo, pero max tlan nakgaxmatkgo akgtum grabación. Makgapitsi chuwinankgo atanu tachuwin chu max nakgaxmatputunkgo akgtum grabación kxtachuwinkan (Hech. 2:6-8). Makgapitsi latamanin lu xlakaskinka akxilhkgo nakgaxmatkgo. Akgtum liʼakxilhtit, latamanin xalak hmong lismanikgonit lata makgasa kalitachuwinankgo xkamanankan tuku lanit makgasa chu tlan lakapala lakapastakkgo tuku kgaxmatkgo. Lhuwa kachikin xalak África, lakgatikgo katsinikgo akxni kawanikan tuku lanita.
4. Akxni namaklakaskinaw grabaciones niku lichuwinanaw Dios, ¿tuku takgalhskinin tlan kiʼakstukan nakinkatlawanikanan?
4 Kalilakpuwanti niku lichuwinana Dios, ¿tlan xwa wi tiku xwilini akgtum grabación xlakata xkgaxmatli kxtachuwin? ¿Lakgapasa chatum tiku tlan xlitamakgtayalh akgtum grabación nema xmalakgachaniw kxcorreo electrónico? ¿Tlan xmaktiw akgtum grabación kdisco chu xmaxkiw, nachuna likgalhtawakga, tiku lakgatilh tuku litachuwinaw? Makatunu libro, folleto, tratado o revista nema malakgachayaw kcorreo electrónico, tlan wiliyaw kʼinforme xla akgatunu papaʼ. Grabaciones ni kaj watiya tlawaka xlakata nalimaklakaskinaw akxni kiʼakstukan kgalhtawakgayaw, nachuna tlan nalichanaw talhtsi xla xaxlikana (1 Cor. 3:6).