Katlawatit chuna la tlawakgolh palakachuwinanin: Habacuc
1. ¿Tuku xlakata liwana akgatekgsaw tuku xmakgkatsi palakachuwina Habacuc?
1 Akxni akxilhaw la talhuwima tuku nitlan kkakilhtamaku, max nachuna namakgkatsiyaw la Habacuc, tiku kgalhskilh Jehová tuku xlakata xmasta talakaskin kaʼanalh tuku nitlan (Hab. 1:3; 2 Tim. 3:1, 13). Lilakapastakkan xtamakatsin Habacuc chu xlakata ni makgxtakgli Dios nakinkamakgtayayan natayaniyaw asta akxni nachin kilhtamaku akxni Dios nakamalakgaxokge latamanin (2 Ped. 3:7).
2. ¿La tlan ni namakgxtakgaw Dios chuna la Habacuc?
2 Ni kamakgxtakgnaw. Habacuc ni lilipuwa xlakata la xwi kakilhtamaku, wata skgalalh xwi chu kskujnanima Jehová (Hab. 2:1). Jehová liwana wanilh palakachuwina pi xTachuwin xʼama kgantaxtu akxni xlakkaxwilinit chu tiku ni xmakgxtakgkgo chuntiya xlatamakgolh (Hab. 2:2-4). ¿Tuku kinkamasiyaniyan akinin kstalaninanin Cristo tiku lamaw uma xaʼawatiya kilhtamaku? Pi tuku tlakg xlakaskinkan wa nakanajlayaw pi namin lisputni nixawa tukuya kilhtamaku namin. Kintakanajlakan natlawa pi skgalalh chu tlakg xlakaskinka naʼakxilhaw lichuwinankan Dios (Heb. 10:38, 39).
3. ¿Tuku xlakata chuntiyaku xatapaxuwan naskujnaniyaw Jehová?
3 Paxuwayaw xlakata skujnaniyaw Jehová. Nataliʼakxilha kintakanajlakan akxni Gog xla Magog naʼakgchipa xkachikin Jehová (Ezeq. 38:2, 10-12). Akxni anan guerra, lu tuwa tawila, asta tiku tlajanankgo. Latamanin makgatsankgakgo tuku kgalhikgo, ni anan lhuwa liwat chu max tlakg tuwa tawila latamat. ¿Tuku natlawayaw akxni natitaxtuyaw uma tuku tuwa? Habacuc xkatsi pi xʼama kgalhi taʼakglhuwit, wa xlakata liwana lakkaxwililh pi xatapaxuwan naskujnani Jehová (Hab. 3:16-19). «Xtapaxuwan Jehová» na nakinkamakgtayayan xlakata natayaniyaw talakgaputsit nema nakgalhiyaw (Neh. 8:10; Heb. 12:2).
4. ¿Tuku tlan lipaxuwayaw uku chu kilhtamaku nema aku mima?
4 Jehová chuntiyaku nakamasiyani tiku nakalakgmaxtu akxni nakatalakkaxlakan latamanin (Hab. 2:14). Tiku nalakastakwanankgo na nakatsinikgo xlakata Jehová. La uku liwana kalakkaxwiliw pi putum kilhtamaku nalichuwinanaw Dios chu tuku lu stlan tlawanit (Sal. 34:1; 71:17).