Tlakg kalipaxuwa akxni miʼakstu nalikgalhtawakgaya Biblia

TUKU XLAKATA XLAKASKINKA. Takgalhtawakga kinkamakgtayayan naʼakgatekgsaw la «xlitilanka, xlilhman, xlitalhman chu xlipulhman» tuku xaxlikana (Ef 3:18). Na kinkamakgtayayan xlakata nitu nalixkajwananaw chu ni nalitawilayaw kuenta kʼuma xalixkajni kakilhtamaku chu tliwakga nakgalhiyaw tachuwin nema «masta latamat» (Flp 2:15, 16). Akxni kiʼakstukan likgalhtawakgayaw xTachuwin Dios tlan nalaksakaw nalikgalhtawakgayaw tuku akinin maklakaskinaw. ¿Tuku tlan natlawayaw xlakata tlakg tlan nalitamakgtayayaw akxni likgalhtawakgayaw chu lakputsananiyaw Biblia?

LA NATLAWAYA

• Akxni kiʼakstukan kgalhtawakgayaw kalhtitwi textos chu katsokgwiliw tuku katsinimaw kBiblia nema maklakaskinaw, kxakapsnat o kformato electrónico.

• Akxni kgalhtawakgayaw kakgalhtiw umakgolh takgalhskinin: «tiku», «tuku»,«niku», «tuku kilhtamaku», «la» chu «tuku xlakata».

• Kakatsiw tuku lalh. Kamaklakaskiw tuku tlan liputsanankan nema kgalhiyaw, tlan naputsayaw akgatunu tema o akgatunu versículo xalak Biblia.

• Kalilakpuwaw tuku likgalhtawakgamaw xlakata nakatsiyaw la kinkamakgtayayan.

• Chali chali kalilatamaw tuku katsinimaw (Lu 6:47, 48).

AKXNI AKXILHNITATA VIDEO KIʼAKSTUKAN NAKGALHTAWAKGAYAW KINKAMAKGTAYAYAN TLIWAKGLH NACHIPAYAW XTACHUWIN DIOS, KAKGALHTI UMAKGOLH TAKGALHSKININ:

• ¿Tuku lakpuwankgo makgapitsi xlakata akstu kgalhtawakgakan?

• ¿Tuku xlakata xlakaskinka nalimatsukiyaw oración?

• ¿Tuku nakinkamakgtayayan tlakg naʼakgatekgsaw tuku likgalhtawakgamaw kBiblia?

• ¿Tuku tlan namaklakaskinaw xlakata natsokgwiliyaw tuku likgalhtawakgamaw?

• ¿Tuku xlakata lu xlakaskinka nalilakpuwanaw akxni nalikgalhtawakgayaw xTachuwin Dios?

• ¿La namaklakaskinaw tuku katsinimaw?