KILATAMATKAN LA KSTALANINANIN CRISTO
Kakalimaklakaskinti umakgolh videos xlakata namatsukiya akgtum takgalhtawakga xalak Biblia
Kgalhiyaw akgtati videos nema katlawakanit xlakata nalimatsukiyaw akgtum takgalhtawakga. ¿Tuku xlakata katlawaka, chu la nakalimaklakaskinaw akxni nalichuwinanaw Dios?
¿Tuku xlakata nalikgalhtawakgaya Biblia? (xatakgatsin). Uma video tlawaka xlakata latamanin tlakg nakatsiputunkgo xlakata Biblia, maski tanu tanu takanajla kgalhikgo. Kamaʼakgpuwantini naputsakgo kBiblia xatakgalhtin lu xlakaskinka takgalhskinin chu lichuwinan akgtum liʼakxilhtit nema limasiya pi tlan nakanajlaniyaw tuku wan Biblia. Xaʼawatiya, lichuwinan la tlan naskinkan akgtum takgalhtawakga xalak Biblia.
¿Tuku xlakata nalikgalhtawakgaya Biblia? (kaj aktsu). Uma video watiya lichuwinan tuku min kvideo nema xatakgatsin, pero xlakata ni lhuwa makgapala tlan maklakaskinkan akxni latamanin ni kgalhikgo kilhtamaku.
¿Tuku tatlawa kʼakgtum takgalhtawakga xalak Biblia? Tlawakanit xlakata latamanin nakatsiputunkgo la tlawakan akgtum takgalhtawakga xalak Biblia chu kgalhti makgapitsi takgalhskinin xlakata la limakgalhtawakgenanaw Biblia. Akgtum liʼakxilhtit, wan la tlan naskinkan akgtum takgalhtawakga.
Lu tlan pi nalimakgalhtawakgekana Biblia. Uma video kamasiyanikan tiku kalimakgalhtawakgemaka Biblia. Maski uma video min kpágina 2 xla libro Kalipaxuwa latamat, na tlan nakamasiyanikan tiku kalimakgalhtawakgemaka folleto Kalipaxuwa latamat. Uma video lichuwinan tsinu tuku nataʼakxilha kputuminika libro chu masiya la tlawakan takgalhtawakga.
Maski akgatunu video wi tuku xpalakata tlawaka, tlan namasiyayaw o namalakgachayaw akxni natalakaskin. Kaliskujwi xlakata nakatsiyaw tuku lichuwinankgo umakgolh videos chu liwana kakamaklakaskiw akxni nalichuwinanaw Dios.