Kaks katayaw chu kalipawaw Jehová

1. Chuna la mapakgsina David, ¿tuku max xʼakstukan kakgalhskinkan makgapitsi kstalaninanin Cristo?

KIMPUTUMKAN ni kgalhiputunaw taʼakglhuwit chu tlan tawilaputunaw. Pero, maski ni lakaskinaw, min kilhtamaku tuwa tuku titaxtuyaw. Asta max makgapitsi kstalaninanin Cristo nachuna makgkatsikgo la mapakgsina David, tiku kgalhskilh Jehová: «¿Asta tuku kilhtamaku nakkgalhi talakgaputsit, taxlajwanit chu talipuwan kkinaku chali chali? ¿Asta tuku kilhtamaku kintalatlawana nakintlaja?» (Sal. 13:2).

2. ¿Tuku naʼakxilhaw kʼuma artículo?

² Maski nila tuku tlawayaw xlakata nialh nalakgaputsayaw, tlan wi tuku natlawayaw xlakata ni nakinkamakgatlajayan tuku lilakgaputsayaw. Kʼuma artículo pulana nalichuwinanaw makgapitsi tuku tlawa pi nalakgaputsayaw. Alistalh nalichuwinanaw pulakchaxan tastakyaw nema nakinkamakgtayakgoyan ni lu nalakgaputsayaw akxni nakgalhiyaw taʼakglhuwit.

¿TUKU NATLAWA PI NALAKGAPUTSAYAW?

3. ¿Tuku tlawa pi nalakgaputsayaw, chu tuku tlan natlawayaw?

³ Anan tuku natlawa pi nalakgaputsayaw chu max ni lhuwa tuku tlan natlawayaw. Akgtum liʼakxilhtit, nila tlawayaw pi liwat, lhakgat chu tuku maklakaskinaw kkinchikkan ni nataliwakatilha kxtapalh akgatunu kata. Na nila tlawayaw pi tiku kataskujaw o tiku kataʼanaw kʼescuela ni nakinkamatlawiputunkgoyan tuku ni xlilat o talakgxtumit xalimaxana. Chu na nila kamasputuyaw tiku lakatsalakgo limapakgsin anta niku lamaw. Anankgo putum umakgolh taʼakglhuwit xlakata kkakilhtamaku latamanin ni makgantaxtikgo xtastakyaw Biblia. Satanás, xdios uma kakilhtamaku, katsi pi makgapitsi latamanin namastakgo talakaskin pi «tuku lilakgaputsakan kʼuma kakilhtamaku» natlawa pi ni naskujnanikgo Jehová (Mat. 13:22; 1 Juan 5:19). Wa xlakata kakilhtamaku litsama taʼakglhuwit nema tlawa pi latamanin nitlan namakgkatsikgo.

4. ¿Tuku max namakgkatsiyaw akxni lu lakgaputsamaw?

⁴ Akxni lu lakgaputsamaw, max namakgkatsiyaw pi talakgaputsit kinkamakgatlajaman. Akgtum liʼakxilhtit, max nalilakgaputsayaw xlakata ni lhuwa tumin tlajamaw chu nila katitamawaw tuku namaklakaskinaw, o max natatatlawayaw chu nila katiskujwi, o asta max namakgatsankgayaw kintaskujutkan. Na lilakgaputsayaw xlakata ni makgatsankgananiputunaw Dios akxni nakinkamatlawiputunkanan tuku nitlan. Chu max na lilakgaputsayaw tuku natlawayaw akxni Satanás natlawa pi tiku tatayakgo natlawaniputunkgo tuku nitlan xkachikin Dios. Max nalakpuwanaw: «¿Nitlan xlakata klilakgaputsa putum umakgolh?».

5. ¿Tuku xkilhchanima Jesús akxni kawanilh kstalaninanin pi “nialh xlakgaputsakgolh”?

⁵ Jesús kawanilh kstalaninanin pi “nialh xlakgaputsakgolh” (Mat. 6:25). ¿Xwamputun pi nipara tsinu kililakgaputsatkan? Nichuna. Asta makgapitsi xlakskujnin Jehová tiku latamakgolh makgasa lakgaputsakgolh chu Jehová ni kalakgmakgalh xlakata uma (1 Rey. 19:4; Sal. 6:3).b Jesús xkinkamakgoxamiximan. Ni xlakaskin pi lu xlilakgaputsaw taʼakglhuwit nema kgalhiyaw kkilatamatkan xlakata ni xlaktlawalh chuna la skujnaniyaw Dios. Wa xlakata, ¿tuku tlan natlawayaw akxni lu nalakgaputsayaw? (Kaʼakxilhti recuadro «La natlawayaw»).

PULAKCHAXAN TUKU NAMAKGTAYAYAN NI LU NALAKGAPUTSAYA

6. Chuna la wan Filipenses 4:6, 7, ¿tuku nakinkamakgtayayan ni lu nalakgaputsayaw?

⁶ 1) Ankgalhin katlawa oración. Lu tlan namakgkatsiya komo natlawaniya oración Jehová xliputum minaku akxni natitaxtuya lhuwa taʼakglhuwit (1 Ped. 5:7). Jehová nakgalhti mioraciones chu namaxkiyan «takaksni nema latamanin nila akgatekgskgo» (kalikgalhtawakga Filipenses 4:6, 7). Jehová maklakaskin xlitliwakga xlakata nakinkamakgtayayan ni lu nalakgaputsayaw (Gál. 5:22).

7. ¿Tuku kilikatsitkan akxni natlawaniyaw oración Dios?

⁷ Akxni natlawaniya oración Jehová, kawani putum tuku wi kminaku. Liwana katachuwinanti: kawani tuku taʼakglhuwit kgalhiya chu la makgkatsiya. Komo tlan lakkaxtlawakan, kaskini liskgalala xlakata nakatsiya la natlawaya chu litliwakga xlakata namakgantaxtiya. Pero komo ni anan la nalakkaxtlawaya mintaʼakglhuwit, kaskini Jehová kamakgtayan xlakata ni lu nalakgaputsaya. Komo liwana natachuwinana, alistalh liwana naʼakxilha la Jehová kgalhtinyan. Komo ni tunkun nakgalhti mioración, ni katlakgwanti. Jehová ni kajwatiya lakaskin pi liwana natachuwinana, wata na lakaskin pi ankgalhin katlawa oración (Luc. 11:8-10).

8. ¿Tuku tlan nawanaw kkioracioneskan?

⁸ Akxni natlawaniya oración Jehová xlakata nawaniya tuku makgkatsiya, na xlakaskinka nalilakpuwana tuku tlan kgalhiya maski titaxtupat tuku tuwa chu kapaxtikatsini xlakata uma. Namin kilhtamaku akxni tuwa namakgkatsiya natekgsa tachuwin xlakata nawaniya putum tuku makgkatsipat. Pero kalakapastakti pi Jehová tlan nakgalhtiyan maski kaj nawaniya: «¡Katlawa litlan, kakimakgtaya!» (2 Crón. 18:31; Rom. 8:26).

9. ¿La tlan natekgsaw xaxlikana tamakgtay?

⁹ 2) Kalipawanti Jehová, ni miʼakstu kalipawanka. Kxkilhtamaku palakachuwina Isaías, judíos xpekuamakgo xlakata asirios xkatlawaniputunkgo tuku nitlan chu ni kskujnin xkalitaxtuniputunkgo, wa xlakata skinikgolh tamakgtay Egipto (Is. 30:1, 2). Jehová kawanilh pi uma tuku xlaksakkgonit nitlan xʼama kakitaxtuni (Is. 30:7, 12, 13). Jehová limaklakaskilh Isaías xlakata xwanilh xkachikin la xtekgsli xaxlikana tamakgtay. Isaías kawanilh kachikin pi “lakgtliwakgan xwankgolh komo kaks xtayakgolh chu xlipawankgolh” Jehová (Is. 30:15b).

10. Kalichuwinanti makgapitsi niku tlan nalimasiyayaw pi lipawanaw Jehová.

¹⁰ Kaʼakxilhwi makgapitsi niku tlan nalimasiyayaw pi lipawanaw Jehová. Kalilakpuwanti pi malaknunikana akgtum taskujut niku lu tlan naxokgonikana, pero namakglhtiyan lhuwa kilhtamaku chu nalaktlawa chuna la skujnaniya Dios. O max chatum tiku akxtum taskuja nalimasiyaniyan pi lakgatiyan, pero ni tamununit chu ni xtatayana Jehová litaxtu. O max chatum tiku xalak mifamilia tiku lu paxkiya nawaniyan: «Kalaksati: miDios o akit». Nila nawanaw pi uma ni tuwa, pero akxni chuna titaxtuyaw Jehová kinkamaxkiyan tapulalit nema maklakaskinaw (Mat. 6:33; 10:37; 1 Cor. 7:39). Pero ¿nalipawanaw chu nastalaniyaw xtapulalit?

11. ¿Tuku liʼakxilhtit tlan nalikgalhtawakgayaw xlakata ni lu nalakgaputsayaw akxni nitlan nakinkalikatsinikanan?

¹¹ 3) Wi tuku kakatsini xlakata tuku lalh makgasa. Anta kBiblia tekgsaw lhuwa xalaktlan chu ni xalaktlan liʼakxilhtit nema masiyakgo pi lu xlakaskinka ni lu nalakgaputsayaw chu nalipawanaw Jehová. Akxni nalikgalhtawakgaya xalaktlan liʼakxilhtit, kaʼakxilhti tuku kamakgtayalh xlakskujnin Dios ni lu xlakgaputsakgolh akxni lu nitlan xkalikatsinimaka. Akgtum liʼakxilhtit, apóstoles ni pekuankgolh akxni xanaPuxkun Jueces kawanikgolh pi nialh xlichuwinankgolh Dios. Wata ni pekuankgolh chu wankgolh: «Kilikgalhakgaxmatatkan Dios chuna la kimapakgsinakan nixawa lakchixkuwin» (Hech. 5:29). Ni pekuankgolh maski kamakgsnokgka. ¿Tuku xlakata? Xlakata xkatsikgo pi Jehová xkamakgtayama chu xlipaxuwa tuku xtlawamakgo. Wa xlakata chuntiya lichuwinankgolh xalaktlan tamakatsinin (Hech. 5:40-42). Nachuna, akxni Esteban xʼamaka makgnikan, ni lu lakgaputsalh chu xkgalhi takaksni, wa xlakata xlakan «xtasiya chuna la xlakan chatum ángel» (Hech. 6:12-15). ¿Tuku xlakata? Xlakata xkatsi pi xmakgapaxuwama Jehová.

12. Chuna la wan 1 Pedro 3:14 chu 4:14, ¿tuku xlakata tlan napaxuwayaw maski nakinkaputsastalanikanan?

¹² Apóstoles liwana xkatsikgo pi Jehová xkamakgtayama, xlakata xkamaxkinit litliwakga natlawakgo milagros (Hech. 5:12-16; 6:8). Maski la uku akinin nila tlawayaw milagros, Jehová maklakaskin xTachuwin xlakata nakinkawaniyan pi akxni patinanaw xlakata tlawayaw tuku xaʼakgstitum, xla paxuwa chu kinkamaxkiyan xʼespíritu santo (kalikgalhtawakga 1 Pedro 3:14; 4:14). Wa xlakata ni kalilakgaputsaw tuku natlawayaw komo nakinkaputsastalanikanan, wata kalilakpuwaw tuku tlan natlawayaw la uku xlakata tlakg nalipawanaw pi Jehová tlan nakinkamakgtayayan chu nakinkalakgmaxtuyan. Xtachuna la apóstoles, kililakapastakatkan tuku Jesús malaknulh: «Nakkamaxkiyan liskgalala chu nakkamakgtayayan xlakata nakatsiyatit tuku nawanatit chu tiku kasitsinikgoyan nila tuku katikalikgalhtikgon». Na kinkamalaknunin: «Xlakata natayaniyatit asta kxlisputni, namakglhtinanatit milatamatkan» (Luc. 21:12-19). Chu ni kapatsankgaw pi Jehová lakapastaka asta tuku ni lu xlakaskinka xpalakata kskujni tiku ni makgxtakgli chu nilh, chu namalakastakwani.

13. ¿La tlan nalitamakgtayayaw xliʼakxilhtitkan tiku lu lakgaputsakgolh chu ni lipawankgolh Jehová?

¹³ Na tlan wi tuku nakatsiniyaw xlakata tiku nitlan tuku tlawakgolh, tiku lu lakgaputsakgolh chu ni lipawankgolh Jehová. Komo nalikgalhtawakgayaw xliʼakxilhtitkan nakinkamakgtayayan ni natlawayaw tuku nitlan tlawakgolh. Akgtum liʼakxilhtit, xapulana, mapakgsina Asá xalak Judá lipawa Jehová akxni talalakatawakalh lhuwa soldados, chu Jehová makgtayalh xlakata natlajanan (2 Crón. 14:9-12). Pero ¿tuku lalh alistalh, akxni talalakatawakalh mapakgsina Baasá xalak Israel, tiku ni lhuwa ksoldados xkgalhi? Ni skinilh tamakgtay Jehová chuna la xtlawanit xapulana, wata kaxokgonilh sirios xlakata xmakgtayakgolh (2 Crón. 16:1-3). Chu akxni snun tatatlalh chu xʼama niy, ni skinilh tamakgtay Jehová (2 Crón. 16:12).

14. ¿Tuku tlan nakatsiniyaw xlakata tuku tlawalh Asá?

¹⁴ Xapulana, Asá xputsa Jehová akxni xkgalhi taʼakglhuwit. Pero titaxtulh kilhtamaku nialh skinilh tamakgtay Dios chu tsukulh tlawa tuku xla xlakpuwan. Max xlakpuwaw pi lu tlan xʼama kitaxtu Asá xlakata kaskinilh tamakgtay asirios xlakata xtatlawakgolh guerra Israel. Pero nichuna kitaxtulh. Jehová malakgachalh chatum palakachuwina xlakata nawani: «Xlakata lipawanti mapakgsina xalak Siria chu ni lipawanti miDios Jehová, kamakgatsala ksoldados mapakgsina xalak Siria» (2 Crón. 16:7). Akinin na kuentajkilitlawatkan xlakata ni lu nalipawanaw kintalakapastaknikan chu asta ni naputsayaw xtamakgtay Jehová kxTachuwin. Namin kilhtamaku natalakaskin lakapala wi tuku nalaksakaw, pero tlan nakinkakitaxtuniyan komo ni lu nalakgaputsayaw chu nalipawanaw Jehová.

15. ¿Tuku tlan natlawayaw akxni nalikgalhtawakgayaw Biblia?

¹⁵ 4) Kakatsini textos xalak Biblia. Akxni nalikgalhtawakgayaw akgtum texto nema masiya pi komo ni lu nalakgaputsayaw chu nalipawanaw Jehová nakinkamaxkiyan litliwakga, kakatsini makgapitsi textos nema lu xlakaskinka. Max lu namakgtayayan komo pixlanka nalikgalhtawakgaya o komo natsokgwiliya chu amakgtum nalikgalhtawakgaparaya. Jehová limapakgsilh Josué pi xlikgalhtawakgalh libro xla Limapakgsin chu xlilakpuwa kakuwani chu katsisni xlakata xkgalhilh liskgalala. Umakgolh tachuwin nema xmin kLimapakgsin na xʼama makgtaya xlakata ni xpekualh chu tlan xpulalilh xkachikin Dios (Jos. 1:8, 9). Anta kxTachuwin Dios, tekgsaw lhuwa tastakyaw nema tlan nakinkamakgtayayan ni lu nalakgaputsayaw chu ni lu napekuanaw maski lu tuwa tuku titaxtumaw (Sal. 27:1-3; Prov. 3:25, 26).

16. ¿La maklakaskin Jehová congregación xlakata nakinkamakgtayayan ni lu nalakgaputsayaw chu wa nalipawanaw?

¹⁶ 5) Kalimaxtu kilhtamaku akxtum nakatatawilaya natalan. Jehová kamaklakaskin natalan xlakata nakinkamakgtayakgoyan ni lu nalakgaputsayaw chu wa nalipawanaw. Ktamakxtumit, litamakgtayayaw tuku masiyakan anta, takgalhtin nema mastakan chu la katakgalhchuwinanaw kinatalankan (Heb. 10:24, 25). Na tlan nakinkamakgtayayan komo nawaniyaw tuku wi kkinakujkan chatum amigo xalak congregación. «Akgtum tlan tachuwin» nema nakinkawaniyan chatum xatlan amigo tlan nakinkamamakgkatsiniyan chu natlawa pi ni lu nalakgaputsayaw (Prov. 12:25).

17. Chuna la wan Hebreos 6:19, ¿la nakinkamakgtayayan takgalhkgalhin xlakata Tamapakgsin ni lu nalakgaputsayaw?

¹⁷ 6) Lu kalilakpuwanti takgalhkgalhin. Takgalhkgalhin nema kinkamaxkiyan xTamapakgsin Dios «tliwakglh wili kilatamatkan xtachuna la tuku limachokgowilikan barco tliwakglh wili»: kinkamakgtayayan ni lu nalakgaputsayaw maski nakgalhiyaw taʼakglhuwit (kalikgalhtawakga Hebreos 6:19). Kalilakpuwanti tuku Jehová malaknunit, pi kkilhtamaku nema aku mima nialh katikgalhiw nixatlan talakapastakni (Is. 65:17). Kalilakpuwanti pi anta wilapi kxasasti kakilhtamaku niku anan takaksni chu nialh anan tuku nitlan (Miq. 4:4). Atanu tuku na namakgtayayan nalakapastaka mintakgalhkgalhin wa nakalitachuwinana amakgapitsin. Wa xlakata katlawa putum tuku matlaniya xlakata nalichuwinana Dios chu nakamakgalhtawakgeya amakgapitsin. Komo chuna natlawaya “liwana nalipawana asta kxlisputni pi nakgantaxtu tuku kgalhkgalhipat” (Heb. 6:11).

18. ¿Tuku max natitaxtuyaw kkilhtamaku nema aku mima, chu tuku nakinkamakgtayayan xlakata natayaniyaw?

¹⁸ Chuna la natalakatsuwitilha xlisputni uma kakilhtamaku, tlakg natitaxtuyaw tuku tuwa, tlakg nakgalhiyaw taʼakglhuwit chu max tlakg nalakgaputsayaw. Texto xla kata 2021 kinkamalakapastakayan pi komo nalipawanaw Jehová chu ni kiʼakstukan nakinkalipawankanan, natayaniyaw taʼakglhuwit chu ni lu nalakgaputsayaw. Putum uma kata, kalimasiyaw xlakata tuku natlawayaw pi lipawanaw uma tuku Jehová malaknulh: «Lakgtliwakgan nawanatit komo kaks natayayatit chu nakilipawanatit» (Is. 30:15).