¿La xlilakaskinka akxilha Jesús xtukuwani Jehová?

1, 2. 1) ¿Tuku tlawalh Jesús katsisni akxni nina xmakgnikan? 2) ¿Tuku naʼakxilhaw kʼuma artículo?

JUEVES xwanit chu xtsiswanita. Aku xtsukunit 14 xla nisán kkata 33 chu nialh lhuwa kilhtamaku xtsankga xlakata Jesús kstamakganka, xlakputsananika, xmakgapatinanka chu xmakgnika. Xla xkatatamakxtuminit xʼapóstoles kʼakgtum cuarto kxlikilhmaktiy chiki. Xlakata xkatsi pi nialh makgas xʼamaka makgnikan, akxni aku xkatawayankgonit apóstoles wi tuku kawanilh nema lu kamatliwakglhli. Chu akxni nina xtaxtukgo niku xwayamakgo, Jesús tlawalh akgtum oración. Apóstol Juan tsokgwililh uma oración kxʼEvangelio chu tlan natekgsaw kJuan capítulo 17.

² Kʼuma artículo nalichuwinanaw tuku kinkamasiyaniyan uma oración. Nakatsiniyaw tuku xlilakgaputsama Jesús uma kilhtamaku chu tuku tlakg xlakaskinka liʼakxilhli akxni latamalh unu kKatiyatni.

«LIWANA KKAMASIYANINIT MINTUKUWANI»

3. ¿Tuku wa Jesús xlakata xtukuwani Jehová, chu tuku xwamputun? (Juan 17:​6, 26).

³ Kʼoración nema Jesús tlawalh, wanilh Jehová: «Liwana kkamasiyaninit mintukuwani». Uma liwana limasiya pi Jesús lu xlakaskinka xliʼakxilha namasiya xtukuwani Jehová xlakata makgtiy chuna wa (kalikgalhtawakga Juan 17:​6, 26). ¿Xwamputun uma pi Jesús kamasiyanilh xtamakgalhtawakgen pi Dios wanikan Jehová? Nichuna. Xlakata xtamakgalhtawakgen judíos xwankgonit, liwana xkatsikgo xtukuwani Dios xlakata uma tukuwani makglhuwa xmin kTatsokgni xaʼHebreo. Akxni Jesús wa pi xkamasiyaninit xtukuwani Jehová, xwamputun pi xkamasiyaninit la likatsi Jehová. Uma kilhchanima tuku lakpuwanit natlawa chu tuku tayat kgalhi. Ni xʼanan atanu tiku tlakg xlakgapasa Jehová nixawa Jesús. Wa xlakata ni xʼanan atanu tiku tlakg tlan xkamasiyanilh xlakata Jehová.

4, 5. 1) ¿Tuku tlawa pi xtukuwani chatum lataman xlakaskinka nalitaxtu kimpalakatakan? Kalichuwinanti akgtum liʼakxilhtit. 2) ¿Tuku kamakgtayalh apóstoles xlakaskinka xtsukukgolh liʼakxilhkgo xtukuwani Jehová?

⁴ Kalilakpuwanti pi kmincongregación wi chatum kgolotsin tiku makuchina litaxtu chu wanikan David. Max wix makgasata lakgapasa. Pero kalilakpuwanti pi akgtum kilhtamaku kaj lakapala nalipinkana kʼhospital. Chu lipinkana kʼhospital niku skujma uma tala chu xla kuchiyan. Max uma natlawa pi tlakg napaxkiya uma tala, chu akxni nakgaxpata xtukuwani, nalakapastaka tuku tlawanit mimpalakata. Chu David nialh kajwatiya katiliʼakxilhti la chatum kgolotsin xalak mincongregación, wata nalakapastaka pi wa doctor tiku kuchin. Xlakaskinka tsukuya liʼakxilha xtukuwani uma tala.

⁵ Xtachuna la uma, maski xtamakgalhtawakgen Jesús xkatsikgoya pi Dios wanikan Jehová, xlakan tlakg liwana lakgapaskgolh la likatsi. Wa xlakata xtukuwani Jehová tlakg xlakaskinka tsukulh litaxtu xpalakatakan. ¿Tuku kamakgtayalh xlakaskinka naliʼakxilhkgo uma tukuwani? Wa tuku tlawalh Jesús. Putum tuku Jesús tlawalh chu tuku wa, liwana xlimasiya la xlikatsi xTlat. Akxni xtamakgalhtawakgen akxilhkgolh la xmasiya Jesús chu la xkalikatsini latamanin, kamakgtayalh tlakg nalakgapaskgo Jehová (Juan 14:9; 17:3).

«XPALAKATA MINTUKUWANI […], NEMA KIMAXKINITA»

6. ¿Tuku xwamputun Jesús akxni wa pi Jehová xmaxkinit xtukuwani? (Juan 17:​11, 12).

⁶ Akxni Jesús xkapalakaskima xtamakgalhtawakgen kʼoración, wanilh Jehová: «Kakakuentajtlawa xpalakata mintukuwani nema kkamasiyaninit, nema kimaxkinita» (kalikgalhtawakga Juan 17:​11, 12). ¿Wamputun uma pi Jesús na tlan xlimapakuwika Jehová? Nichuna. Akxni Jesús lichuwinalh kxʼoración xtukuwani Jehová, wanilh xTlat: «Mintukuwani». Uma limasiya pi Jesús ni lakgpalilh xtukuwani chu ni tsukuka limapakuwikan «Jehová». ¿Pero tuku xwamputun akxni wa pi Jehová xmaxkinit xtukuwani? Pulana kalakapastakwi pi Jesús xchuwinan kxtukuwani Jehová. Milh kKatiyatni chu tlawalh lhuwa milagros kxtukuwani Jehová (Juan 5:43; 10:25). Nachuna, xtukuwani Jesús wamputun «Jehová lakgtaxtut». Uma kinkamasiyaniyan pi kxtukuwani Jesús min xtukuwani Jehová.

7. ¿Tuku xlakata Jesús tlan xchuwinan kxtukuwani xTlat? Kalichuwinanti akgtum liʼakxilhtit.

⁷ Xlakata tlakg naʼakgatekgsaw uma, kawiliw akgtum liʼakxilhtit. Chatum mapakgsina tlan nalaksaka chatum lataman xlakata napalakachuwinan chu maxki limapakgsin xlakata nachuwinan kxtukuwani. Lata ama kilhtamaku, tuku nawan uma chixku xtachuna la wa mapakgsina chuwinama. Xtachuna la uma, Jehová laksakli Jesús chu maxkilh lhuwa limapakgsin xlakata xchuwinalh kxtukuwani (Mat. 21:9; Luc. 13:35).

8. ¿Tuku wamputun pi Jesús “xlin” xtukuwani Jehová akxni nina xmin kKatiyatni? (Éxodo 23:​20, 21).

⁸ Biblia wan pi Jesús wa Tachuwin xlakata Jehová maklakaskinit xlakata nakamakatsini ángeles chu latamanin tuku xlitlawatkan (Juan 1:​1-3). Max Jesús wa ángel tiku Jehová malakgachalh xlakata xkapulalilh chu xkakuentajtlawalh israelitas akxni xlamakgo kdesierto. ¿Tuku xlakata xlikgalhakgaxmatatkan xwanit uma ángel? Jehová wa: «Xla lin kintukuwani» (kalikgalhtawakga Éxodo 23:​20, 21).a ¿Tuku wamputun pi Jesús «lin» xtukuwani Jehová? Uma wamputun pi Jesús chuwinan kxtukuwani Jehová. Wa tiku tlakg kgalhmakgtayanit Jehová chu limasiyanit pi xtukuwani xasanto.

«TLAT, KAMALANKI MINTUKUWANI»

9. ¿Tuku limasiya pi Jesús lu xlakaskinka xliʼakxilha xtukuwani Jehová?

⁹ Chuna la lichuwinawa, Jesús lu xlakaskinka xliʼakxilha xtukuwani Jehová asta maski nina xmin kKatiyatni. Chu akxni kilatamachi kKatiyatni, nachuna liʼakxilhli. Putum tuku tlawalh limasiyalh pi xtukuwani Jehová wa tuku tlakg xlakaskinka xliʼakxilha. Akxni xmasputumaja xtaskujut, Jesús wanilh Jehová: «Tlat, kamalanki mintukuwani». Jehová tunkun kgalhticha lata kʼakgapun chu wanilh: «Kmalankinit chu amakgtum nakmalankipara» (Juan 12:28).

10, 11. 1) ¿La malankilh Jesús xtukuwani Jehová? (Na kaʼakxilhti dibujo). 2) ¿Tuku xlakata talakaskin natamasantujli xtukuwani Jehová chu nalimasiyakan pi xaʼakgstitum tuku tlawa?

¹⁰ Jesús na malankilh xtukuwani xTlat. Pulaktum tuku tlawalh xlakata namalanki xtukuwani wa pi kalitachuwinalh amakgapitsin la likatsi Jehová chu putum tuku tlawanit. Pero ni kajwatiya uma tuku tlawalh. Xla xkatsi pi xtukuwani Jehová xlitamasantujlit xwanit, chu xtalakaskin xlimasiyaka pi putum tuku Jehová tlawa xaʼakgstitum. Jesús limasiyalh la xlilakaskinka xwanit uma akxni kamasiyanilh xtamakgalhtawakgen la xlitlawatkan xwanit xʼoracionkan. Xla wa: «KinTlatkan tiku wilapi kʼakgapun, katamasantujlilh mintukuwani» (Mat. 6:9).

¹¹ ¿Tuku xlakata xtalakaskin xtamasantujlilh xtukuwani Jehová chu xlimasiyaka pi xaʼakgstitum tuku tlawa? Xlakata kjardín xaʼEdén, Satanás limawakalh Jehová tuku ni xaxlikana akxni wa pi Jehová xaʼakgsanina chu pi ni xkamaxkima talakaskin Adán chu Eva xlipaxuwakgolh tuku tlan (Gén. 3:​1-5). Tuku wa Akgskgawini na maʼakgatekgsninalh pi tuku tlawa Jehová ni xaʼakgstitum. Umakgolh taʼakgsanin maxkajwilh xtukuwani Jehová. Chu kxkilhtamaku Job, Satanás wa pi putum tiku skujnanikgo Jehová chuna tlawakgo kaj xlakata wi tuku namakglhtinankgo. Uma akgsanina wa pi nipara chatum lataman xlikana paxki Jehová, chu namakgxtakga komo natitaxtu tuku tuwa (Job 1:​9-11; 2:4). Xtalakaskin xtitaxtulh kilhtamaku xlakata xlitasiyalh tiku xkilhwama tuku xaxlikana: Jehová o Satanás.

«KMAKAMASTA KILATAMAT»

12. ¿Tuku xatapaxuwan tlawalh Jesús xlakata xpaxki xtukuwani Jehová?

¹² Jesús lu xpaxki xTlat, chu wa xlakata xtlawa putum tuku xmatlani xlakata xmasantujlilh xtukuwani chu xlimasiyalh pi putum tuku Jehová tlawa xaʼakgstitum. Wa xlakata wa: «Kmakamasta kilatamat» (Juan 10:​17, 18). Chuna, Jesús xatapaxuwan nilh xpalakata xtukuwani Jehová.b Adán chu Eva, xapulana latamanin tiku ni xkgalhikgo talakgalhin, ni tatayakgolh Jehová chu wa kgalhakgaxmatkgolh Satanás. Pero Jesús xatapaxuwan milh kKatiyatni chu limasiyalh pi xpaxki Jehová xlakata ankgalhin kgalhakgaxmatli (Heb. 4:15; 5:​7-10). Xla nikxni makgxtakgli Jehová, asta maski xtokgowakaka kkgantum kiwi (Heb. 12:2). Chuna limasiyalh pi xpaxki Jehová chu xtukuwani.

13. ¿Tuku xlakata Jesús wa tiku tlakg tlan xlimasiyalh pi Satanás xaʼakgsanina? (Na kaʼakxilhti dibujo).

¹³ Putum tuku Jesús tlawalh liwana limasiyalh pi tiku xʼakgsaninama wa Satanás, chu ni wa Jehová (Juan 8:44). Jesús wa tiku tlakg lakgapasa Jehová nixawa atanu. Komo tuku Satanás xlimawakama Jehová xlikana xtiwa, Jesús xkatsilh. Pero xla ankgalhin kgalhmakgtayalh Jehová chu limasiyalh pi ni xlikana tuku xlimawakanit Satanás. Asta maski milh kilhtamaku tasiyalh pi Jehová xmakgxtakgnit, Jesús lakpuwa pi tlakg tlan xwa xmakgnika nixawa namakgxtakga xapaxkina xTlat (Mat. 27:46).c

«KMASPUTUNIT TASKUJUT NEMA KILAKGAYAWANITA»

14. ¿Tuku tasikulunalin maxkilh Jehová Jesús xlakata ni makgxtakgli?

¹⁴ Oración nema tlawalh Jesús xaʼawatiya katsisni akxni latamalh kKatiyatni, wanilh Jehová: «Kmasputunit taskujut nema kilakgayawanita». Xla liwana xkatsi pi Jehová xʼama sikulunatlawa komo ni xmakgxtakgli (Juan 17:​4, 5). Chu chuna lalh. Jehová ni mastalh talakaskin pi Jesús xtamakgxtakgli kputaknun (Hech. 2:​23, 24). Malakastakwanilh chu tlakg lhuwa limapakgsin maxkilh kʼakgapun (Filip. 2:​8, 9). Titaxtulh makgapitsi kata, Jesús Mapakgsina litaxtulh kxTamapakgsin Dios. ¿Tuku natlawa uma Tamapakgsin? Jesús lichuwinalh tuku ama tlawa akxni kinkamasiyanin pi kskiniw Jehová kʼoración: «Kamilh minTamapakgsin. Kalalh mintalakaskin chuna la kʼakgapun nachuna kalalh kkatiyatni» (Mat. 6:10).

15. ¿Tuku natlawa Jesús kkilhtamaku nema aku mima?

¹⁵ Nialh makgas, Jesús nakatalatlawa xtalamakgasitsin Dios chu nakamalakgsputu tiku lixkajni likatsikgo kʼArmagedón (Apoc. 16:​14, 16; 19:​11-16). Alistalh namakan Satanás niku “kxakapulhman”, uma wamputun pi nialhla tuku katitlawalh (Apoc. 20:​1-3). Alistalh natsuku Tamapakgsin xaʼAkgtum Mil Kata, nema nalimin takaksni kKatiyatni chu nakamakgtaya latamanin xlakata nialh nakgalhikgo talakgalhin. Nakamalakastakwani tiku nikgonita chu natlawa pi Katiyatni akgtum paraíso nawan. ¡Chuna nakgantaxtu xtalakaskin Jehová! (Apoc. 21:​1-4).

16. ¿La nawan latamat akxni nasputa Tamapakgsin xaʼAkgtum Mil Kata?

¹⁶ ¿La nawan latamat akxni nasputa Tamapakgsin xaʼAkgtum Mil Kata? Nialh katiʼanalh talakgalhin. Nialh talakaskin katiwa talakgmaxtut xlakata nialh katitalakaskilh pi latamanin naskinikgo Jehová pi kakamatsankgenanilh. Chu nialh katitalakaskilh pi 144,000 tiku sacerdotes nalitaxtukgo chu Jesús, sacerdote tiku tlakg kgalhi limapakgsin, nakamakgchuwinan xlakata tlan natalalinkgo Jehová. Chu linin, «xaʼawatiya kintalamakgasitsinkan», malakgsputukanita nawan. Kamalakastakwanikanita nawan putum tiku nikgonita. Putum tiku nalatamakgo kKatiyatni nialh katikgalhikgolh talakgalhin (1 Cor. 15:​25, 26).

17, 18. 1) ¿Tuku nala akxni nasputa Tamapakgsin xa’Akgtum Mil Kata? 2) ¿Tuku natlawa Jesús akxni nasputa xTamapakgsin? (1 Corintios 15:​24, 28; na kaʼakxilhti dibujo).

¹⁷ ¿Tuku atanu nala akxni nasputa Tamapakgsin xaʼAkgtum Mil Kata? Liwana natasiya pi xtukuwani Jehová xasanto chu nialh amakgtum wi tiku nawampara pi ni xaʼakgstitum tuku tlawa. Satanás wa kjardín xaʼEdén pi Jehová xaʼakgsanina chu pi nitlan mapakgsina chu ni kapaxki latamanin. Lata ama kilhtamaku, kskujnin Jehová makglhuwa masantujlikgonit xtukuwani. Akxni sputnita nawan Tamapakgsin xa’Akgtum Mil Kata, litasiyanit nawan pi ni xlikana tuku limawakakan. KinTlatkan xalak akgapun limasiyanit nawan pi xlikana kinkapaxkiyan.

¹⁸ Putum latamanin nakatsikgo pi tuku wa Satanás xlakata Jehová kaj taʼakgsanin. ¿Tuku natlawa Jesús akxni nasputa xTamapakgsin? ¿Natalalakatawaka Jehová chuna la tlawalh Satanás? ¡Nichuna! (Kalikgalhtawakga 1 Corintios 15:​24, 28). Jesús namaspitni Tamapakgsin xTlat chu xatapaxuwan natapakgsini. Chuna natlawa xlakata paxki Jehová.

19. ¿La xlilakaskinka akxilha Jesús xtukuwani Jehová?

¹⁹ Putum tuku lichuwinaw kinkamasiyaniyan tuku xlakata Jehová maxkilh xtukuwani xKgawasa xlakata xchuwinalh kxtukuwani. Chu Jesús liwana makgantaxtinit uma taskujut. Wa xlakata, ¿la xlilakaskinka liʼakxilha Jesús xtukuwani Jehová? Wa tuku tlakg xlakaskinka liʼakxilha. Xatapaxuwan nilh xpalakata uma tukuwani chu xatapaxuwan namaspitni Jehová Tamapakgsin akxni nasputa akgtum mil kata. ¿La tlan nastalaniyaw xliʼakxilhtit Jesús? Nalichuwinanaw uma kʼatanu artículo.