¿Skgalalh wilaw xlakata akxni namin lisputni?
«Maski xmakgapalalh xatapaxuwan kakgalhkgalhi.» (HAB. 2:3)
1, 2. ¿Tuku kgalhkgalhikgonit putum kilhtamaku kskujnin Dios?
KSKUJNIN Jehová xatapaxuwan kgalhkgalhimakgolh la nakgantaxtu tuku wankanit pi nala. Akgtum liʼakxilhtit, Jeremías xlichuwinanit pi babilonios xʼamakgolh masputukgo Judá. Chu chuna kgantaxtulh kata 607 akxni nina xmin Cristo (Jer. 25:8-11). Isaías lichuwinalh pi Jehová xʼama kamakgtaya judíos xlakata xtaxtukgolh kBabilonia chu xtaspitparakgolh kxpaiskan. Lichuwinalh pi xpaxuwakgo tiku xkgalhkgalhimakgolh (Is. 30:18). Miqueas na liwana xkatsi pi xʼama kgantaxtu tuku xtalichuwinanit. Wa xlakata wa: «Skgalalh naktawila» (Miq. 7:7). Chu akglhuwa ciento kata, kskujnin Dios kgalhkgalhikgolh xlakata xlakachilh Mesías tiku xwankanit pi namin (Luc. 3:15; 1 Ped. 1:10-12).a
2 Akinin na chuna kgalhkgalhimaw nakgantaxtu tuku wankanit pi nala xlakata xTamapakgsin Dios. Wa Jesús mapakgsinan kʼuma tamapakgsin chu nialh makgas nakinkalakgmaxtuyan kʼuma xakalipekua kakilhtamaku. Akxni nachin xlisputni nakamasputu putum latamanin tiku nitlan likatsikgo, Jesús namasputu tuku kinkamapatiniyan (1 Juan 5:19). Lisputni kaj xalan nachin. Wa xlakata putum kilhtamaku skgalalh kilitawilatkan.
3. Komo makgasa kgalhkgalhimaw namin lisputni, ¿tuku takgalhskinin max natlawayaw?
3 Lu lakaskinaw pi kamilha ama kilhtamaku akxni nala xtalakaskin Dios kKatiyatni (Mat. 6:10). Pero komo makgasata kgalhkgalhimaw namin lisputni, max tlawayaw uma takgalhskinin, ¿chuntiya talakaskin skgalalh naktawila?
¿TUKU XLAKATA CHUNTIYA SKGALALH NATAWILAYAW?
4. ¿Tuku xlakata chuntiya skgalalh natawilayaw?
4 ¿Tuku xlakata chuntiya skgalalh natawilayaw? Xlakata lu xlakaskinka. Jesús kinkalimapakgsin skgalalh natawilayaw (Mat. 24:42; Luc. 21:34-36). Nachuna tiku pulalinkgo xkachikin Jehová kinkawanikgoyan pi skgalalh natawilayaw akxni namin lisputni chu putum kilhtamaku kalakapastakwi pi nakinkamaxkikanan akgtum Paraíso (kalikgalhtawakga 2 Pedro 3:11-13).
5. ¿Tuku na xlitlawat pi skgalalh kilitawilatkan xlakata lisputni?
5 Xapulana kstalaninanin Cristo skgalalh xlitawilatkan xwanit akxni xchilh xkilhtamaku Jehová. Pero la uku tlakg xlakaskinka nalimasiyayaw pi kgalhkgalhimaw lisputni. ¿Tuku xlakata? Wa tuku Jesús lichuwinalh pi xʼama kgantaxtu limasiya pi mapakgsinamaja lata kata 1914 chu lamaw kxaʼawatiya kilhtamaku. Akgtum liʼakxilhtit, kakilhtamaku tlakg lixkajni wi la uku chuna la tilichuwinalh Jesús chu tamakatsinin xla Tamapakgsin talichuwinamaja kxlikalanka Katiyatni (Mat. 24:3, 7-14). Jesús ni lichuwinalh la xlimakgas xʼama makgapala xaʼawatiya kilhtamaku. Wa xlakata skgalalh kilitawilatkan xlakata xlisputni kakilhtamaku kaj lakapala nachin.
6. ¿La likatsiyaw pi tlakg nitlan natawila kakilhtamaku?
6 Kakilhtamaku tlakg nitlan natawila. ¿La likatsiyaw? Biblia lichuwinan pi latamanin tlakg nitlan nalikatsikgo kxaʼawatiya kilhtamaku (2 Tim. 3:1, 13; Mat. 24:21; Apocalipsis [Revelación] 12:12). Maski kakilhtamaku lu nitlan la wi, katsiyaw pi tlakg nitlan natawila. Pero ¿wamputun pi talakaskin tlakg nitlan natawila kakilhtamaku xlakata namin lisputni?
7. ¿Tuku kinkamakgatekgsniyan Mateo 24:37-39 xlakata xaʼawatiya kilhtamaku?
7 Max makgapitsi lakpuwankgo pi pulana xliʼanat tatsinkstat, tajatat chu guerras kputum países chu alistalh namin «ntlanka tapatin» (Apoc. 7:14). Pero nichuna katilalh. Komo chuna xlalh, putum latamanin xkatsikgolh pi kgantaxtuma tuku wankanit pi nala. Asta latamanin tiku ni kanajlakgo tuku wan Biblia xʼakxilhkgolh. Kalakapastakwi pi Jesús lichuwinalh pi tlakg lhuwa latamanin ni xkatsikgolh pi kxaʼawatiya kilhtamaku lamaw. Jesús lichuwinalh pi kaj xalan xkalakgchilh lisputni latamanin,xlakata chuntiya xlinkgolh xlatamatkan la xlismanikgonit (kalikgalhtawakga Mateo 24:37-39). Akxni lilakpuwanaw tuku lichuwinalh Jesús, ¿tuku akgatekgsaw? Pi ni kililakpuwanatkan pi akxni amaja tsuku nawan lanka takatsanajwat kakilhtamaku tlakg lixkajnit natawila chu ni nalakpuwanaw pi putum latamanin naʼakxilhkgo pi lisputni chimaja (Luc. 17:20; 2 Ped. 3:3, 4).
Liwana katsiyaw pi uma xalixkajni kakilhtamaku nialh makgas namasputukan
8. ¿Tuku liwana katsiyaw kskujnin Dios?
8 Jesús lichuwinalh tuku xʼama la kxaʼawatiya kilhtamaku xlakata kajwatiya xkatsikgolh tiku skgalalh xtawilakgolh pi lisputni xʼamaja chin. Kskujnin Dios skgalalh wilaw (Mat. 24:27, 42). Wa xlakata, litsukulh kkata 1914 akxilhnitaw la kgantaxtutilhanit uma tuku xwankanit pi nala. Liwana katsiyaw pi kxlikgalhtsputni uma xalixkajni kakilhtamaku lamaw. Jehová lakkaxwilinita tuku kilhtamaku namasputu.
9. ¿Tuku xlakata skgalalh kilitawilatkan chu nakgalhkgalhiyaw xkilhtamaku Jehová?
9 Chuna la katsimaw, ¿tuku xlakata skgalalh kilitawilatkan xlakata xkilhtamaku Jehová? Xlakata kgalhakgaxmatputunaw Cristo. Chu na kanajlayaw pi kgantaxtuma tuku xwanit pi nala kxaʼawatiya kilhtamaku. Uma ni wamputun pi putum kanajlayaw tuku kgaxmataw, kanajlayaw xlakata Biblia chuna lichuwinanit chu la uku kgantaxtuma. Akinin skgalalh kilitawilatkan chu kilikgalhkgalhitkan pi lisputni mima.
¿MAKGAS NAKGALHKGALHIYAW?
10, 11. 1) ¿Tuku xlakata Jesús kawanilh kstalaninanin pi skgalalh xtawilakgolh? 2) ¿Tuku kilitlawatkan komo akxilhaw pi xkilhtamaku Jehová nina min? (Kaʼakxilhti xapulana dibujo.)
10 Lhuwa xtatayananin Jehová makgasata kgalhkgalhimakgolh lisputni. Pero maski makgasata skujnanimaw Dios chuntiya skgalalh kilitawilatkan chu nakgalhkgalhiyaw xkilhtamaku Jehová. Skgalalh kilitawilatkan akxni Jesús namasputu xkakilhtamaku Satanás. Kalakapastakwi pi Jesús kawanilh kstalaninanin pi skgalalh xtawilakgolh xlakata ni xkatsikgo tuku kilhtamaku xʼama min lisputni. Chu na kawanilh: «Kana wixin, skgalalh katawilatit, na katlawatit mioracionkan, xampi ni katsiyatit [...] nkilhtamaku. Xtachuna nchatum nchixku nti makgat titakilhanulh ntialh. Makgaxtakgli xchik; na chatunu makuintajlilh kskujnin xtaskujut; na wa limapakgsilh nkuintaj xtlawana malakcha, skgalalh natawilay. Pus chi skgalalh katawilatit, xampi ni katsiyatit akxni namin malana nti kxchik, max mpala kakgotanun, [itat tsisni, TNM] usu akxni ntasaj puyuj, usu tsisaj; lakimpi akxni xalan nataxtuyachi namin, ni xalhtatan ntikatakgsan. Na wa ntu kwan, limakxtum kkawaniyan: Skgalalh katawilatit» (Mar. 13:33-37).
Dios tlan natlawa pi mapakgsinanin kaj xalan natlawanikgo guerra ni xaxlikana takanajla
11 Akxni kstalaninanin Cristo akgatekgskgolh pi Jesús tsukulh mapakgsinan kata 1914, katsikgolh pi lisputni kaj xalan xchilh. Wa xlakata kgalhkgalhikgolh chu tlakg tsukukgolh lichuwinankgo Dios. Anta kMarcos 13, Jesús wa pi malana max tlakg xmakgapalalh nixawa la xlakpuwankgolh skujnin. Pero maski xlakan ni xkatsikgolh tuku kilhtamaku xʼama min, skgalalh xlitawilatkan xwanit. Uma kinkamasiyaniyan pi maski makgasata kgalhkgalhimaw, uma ni wamputun pi makgasku tsankga o ni katiʼakxilhwi akxni namin lisputni. Chuntiya skgalalh kilitawilatkan.
12. ¿Tuku kgalhskilh Habacuc Jehová chu tuku wanika akxni kgalhtika?
12 Kalichuwinaw tuku tlawalh palakachuwina Habacuc. Xla chuntiya lichuwinalh pi xʼamaka masputukan Jerusalén. Makgapitsi palakachuwinanin tiku xlatamakgonita akxni nina xlama Habacuc na watiya xlichuwinankgonit akglhuwa kata. Xakxilha pi latamanin tlakg nitlan xlikatsikgo nixawa xapulana. Wa xlakata skinilh tamakgtay Jehová. Kgalhskilh: «¿La xlimakgas Jehová naktasaskiniyan tamakgtay pero wix ni kgaxpata?». Maski Jehová ni wanilh tuku kilhtamaku xʼamaka masputukan Jerusalén limapakgsilh pi skgalalh xtawilalh chu wanilh: «Ni katimakgapalalh» (kalikgalhtawakga Habacuc 1:2b chu 2:3c).
13. 1) ¿Tuku max tlan xtilakpuwa Habacuc? 2) Komo chuna xtilakpuwa, ¿la xkitaxtunilh?
13 Kaj kalakpuwanti komo Habacuc nialh xtilichuwinalh Dios chu xlakpuwa: «Lhuwata kata kkgalhkgalhima namasputukan Jerusalén. Max lhuwa kilhtamaku tsankga, wa xlakata nialh naklichuwinan Dios. Atanu tiku kalichuwinankgolh». Komo chuna xtilakpuwa Habacuc, ¿la xkitaxtunilh? Nialh tlan xtalalilh Dios. Komo ni skgalalh xtawilalh, akxni xchilh lisputni xmakgatsankgalh xlatamat.
14. ¿La namakgkatsiyaw kxasasti kakilhtamaku?
14 Kalakpuwanti pi antiya wila kParaíso. Chu akxilhti pi putum kgantaxtulh tuku xwanit Jehová pi xlalh kxaʼawatiya kilhtamaku. Wa xlakata tlakg lipawana chu liwana katsiya pi putum namakgantaxti tuku wanit pi natlawa (kalikgalhtawakga Josué 23:14d). Wix lu paxtikatsiniya Jehová xlakata lu xkilhtamaku limilh xlisputni kakilhtamaku chu xlakata kawanilh kskujnin pi skgalalh xtawilakgolh (Hech. 1:17; 1 Ped. 4:7).
CHUNTIYA KALICHUWINAW DIOS
¿Lu lakgatiya lichuwinana xTamapakgsin Jehová? (Kaʼakxilhti párrafo 15)
15, 16. ¿Tuku xlakata xlakaskinka naʼakxilhaw nalichuwinanaw Dios?
15 Xkachikin Jehová chuntiya nakinkamalakapastakayan pi tuku tlakg xlakaskinka xliwanat kkilatamatkan, wa naskujnaniyaw Dios. Uma nakinkamakgtayayan chuntiya naskujnaniyaw kinTlatkan, pero tlakg nakinkamalakapastakayan pi tamakatsinin nema limaw lu xlakaskinka tunkun natlawayaw. Liwana katsiyaw pi tuku lichuwinalh Jesús xlakata xaʼawatiya kilhtamaku kgantaxtumaja chu nialh makgas nachin lisputni. Wa xlakata, akinin tlakg xlakaskinka akxilhaw naskujnaniyaw Jehová chu nalichuwinanaw xTamapakgsin (Mat. 6:33; Mar. 13:10).
16 Xkakilhtamaku Satanás nialh makgas namasputukan. Akxni lichuwinanaw Dios, kamakgtayayaw latamanin nalakgtaxtukgo. Kaʼakxilhwi akgtum liʼakxilhtit nema limasiya pi tlakg xlakaskinka xliwanat nakalakgmaxtukan latamanin. Kkata 1945, akgtum barco xalak Alemania tsankgalh kpupunu chu lhuwa tiku nikgolh. Akgtum tamakgaxtokgat tiku anta xʼankgo lakgtaxtukgolh chu alistalh xtatayananin Jehová litaxtukgolh. Tala puskat lakapastaka pi akxni xtsankgama barco kpupunu, chatum puskat xlakgtasama xmaletas chu xjoyas. Pero amakgapitsi tiku anta xʼankgo liwana xkatsikgo pi tlakg xlakaskinka xwanit nakalakgmaxtukan latamanin. La uku nachuna. Wa xlakata lu xlakaskinka nalinaw xtachuwin Dios, katsiyaw pi wa nakalakgmaxtu latamanin. Natlawayaw putum tuku natalakaskin xlakata lhuwa tiku nalakgtaxtukgo.
Kalimasiya tuku tlawaya pi wa tlakg xlakaskinka akxilha nalichuwinana Dios (Kaʼakxilhti párrafo 17)
17. ¿La katsiyaw pi lisputni kaj lakapala nachin?
17 Liwana tasiya pi kgantaxtuma tuku wanit Biblia chu kaj xalan nachin lisputni. Nialh makgas Organización de las Naciones Unidas chu mapakgsinanin tiku tatayakgo namasputuputunkgo ni xaxlikana takanajla (Apoc. 17:16). ¿Lhuwaku kilhtamaku tsankga xlakata chuna nala? Nialh makgas. Kalakapastakwi pi Dios natlawa pi mapakgsinanin namasputuputunkgo putum takanajla. Xla kgalhi litliwakga xlakata chuna natlawa chu akxni nalakaskin (Apoc. 17:17). Xkakilhtamaku Satanás nialh makgas namasputukan. Wa xlakata kakgaxmatwi xtastakyaw Jesús: «Wixin nti nkuintaj kakatlawakantit, mpi wa minakukan ni nalichuway ntaji tawayani, chu ntakgotni, chu ntakglhuwilajna xla yuma nkakilhtamaku, chu ni xalan lakapala nakalakgchinan yama nkilhtamaku» (Luc. 21:34, 35; Apoc. 16:15). Chuntiya skgalalh katawilaw chu chuntiya kaskujnaniw Jehová. Liwana kakatsiw pi nakalakgmaxtu tiku skgalalh wilakgolh chu kgalhkgalhimakgolh (Is. 64:4).
18. ¿Tuku takgalhskinin nakgalhtiyaw kʼatanu artículo?
18 Chuna la kgalhkgalhitilhamaw lisputni, katlawaw xtastakyaw Judas. Xla wa pi tlakg kamatliwakglhwi kintakanajlakan, makglhuwa natlawayaw oración chu kuenta natlawayaw pi chuntiya natalalinaw Dios chuna la kgalhkgalhitilhamaw kilhtamaku akxni nakinkamaskiwiyan latamat nema ni kgalhi xlisputni (Jud. 20, 21). ¿La nalimasiyayaw pi xlikana latamaputunaw kParaíso? Nalichuwinanaw kʼartículo nema aku mima.
a Natekgsa akgtum lista nema lichuwinan tuku xʼama kgantaxtu xlakata Mesías chu la kgantaxtulh, kpágina 200 xla libro, ¿Tuku xlikana masiyay Biblia?
b Habacuc 1:2: «¿La xlimakgas Jehová naktasaskiniyan tamakgtay pero wix ni kgaxpata? ¿La xlimakgas naktasaskiniyan xlakata anan tuku nitlan, pero wix nitu tlawaya?».
c Habacuc 2:3: «Xlakata tuku akxilhpat alistalhku nakgantaxtu, chu lu lakapalanit kxlisputni, chu ni katiʼakgsaninalh. Chu maski xmakgapalalh xatapaxuwan kakgalhkgalhi; xlakata xlikana namin. Ni katimakgapalalh».
d Josué 23:14: «Chu, ¡kaʼakxilhtit! uku ktiya xtiji putum katiyatni, chu wixin liwana katsiyatit xliputum minakujkan chu xliputum milatamatkan pi ni anan tachuwin xliputum xalakwan tachuwin wantuku kawaninitan Jehová miDioskan nema ni kgantaxtunit. Putum kgantaxtukgonit mimpalakatakan. Ni anan tachuwin nema ni kgantaxtunit».