Kaliskujwi namakakchanaw kintalakapastaknikan la Cristo
«[Kakgalhiw talakapastakni TNM] xtachuna nCristo.» (EFES. 4:13)
1, 2. ¿Tuku lakaskinaw putum tiku skujniyaw Jehová? Kalichuwinanti akgtum liʼakxilhtit.
AKXNI anaw tamawayaw kmercado, Durazno o atanu, ¿tuku akxilhniyaw? Xlikana pi akxilhaw komo ni tapalaxla. Pero tuku tlakg akxilhaw wa pi komo aku puxkanit chu tlantiya wakan. Katsiyaw pi tlakg xatlan tawakat wa nema xakatlata.
Akxni likgalhtawakgayaw Biblia, kaputsaw tastakyaw nema nakinkamakgtayayan nakatsiyaw tuku tlan chu tuku nitlan
2 Akxni lakgapasaw Jehová chu tamunuyaw, na makakchamputunaw kintalakapastaknikan la Cristo. Pero akxni lichuwinanaw pi xaʼakchan kgalhiyaw kintalakapastaknikan ni wa kilhchanima lhuwata kata nakgalhiyaw. Wata kilhchanima pi kgalhiputunaw lakwan tayat chu tlakg tlan xʼamigo Jehová wamputunaw. Apóstol Pablo kawanilh kstalaninanin Cristo xalak Éfeso pi tlan xakchan kgalhikgolh xtalakapastaknikan la Cristo. Chu komo xlakaskinkgo pi chuna xwankgolh xtalakaskin pi makxtum xlakgolh chu chuntiya xlakgapaskgolh Jesús (Efes. 4:13).
3. ¿La tatalakxtumi congregación xalak Éfeso, lhuwa congregaciones xala uku?
3 Akxni Pablo katsokgnanilh congregación xalak Éfeso, xʼanan lhuwa kstalaninanin Cristo tiku xaʼakchan xtalakapastaknikan xwanit chu lhuwata kata kskujnimakgolh Dios. Pero na xwilakgo kstalaninanin Cristo tiku tlakg xlimatliwakglhatkan xwanit la xtalalinkgo Dios. Nachuna kmakgapitsi congregaciones xala uku. Lhuwa natalan makgasa skujnanimakgo Jehová. Pero amakgapitsi nina makakchankgo xtalakapastaknikan la Cristo. Akgtum liʼakxilhtit, lhuwa mil natalan tiku tamunukgo kata kata, xliskujatkan xlakata xaʼakchan nakgalhikgo xtalakapastaknikan. ¿Chu wix? ¿Makakchipinita mintalakapastakni la Cristo? (Col. 2:6, 7.)
LA LIMASIYAYAW PI MAKAKCHANITAW KINTALAKAPASTAKNIKAN LA CRISTO
4, 5. 1) ¿Tuku xlakata tlan wanaw pi putum kstalaninanin Cristo tiku xaʼakchan kgalhikgo xtalakapastaknikan, ni xlakxtumkan? 2) ¿Tuku akxtum katlawa kstalaninanin Cristo tiku xaʼakchan kgalhikgo xtalakapastaknikan? (Kaʼakxilhti xapulana dibujo.)
4 Ni paks xakatla tawakat lakxtum. Anankgo nema tlakg laklanka o tlakg laktsu, pero wi tuku masiya pi lakkatlata. Kstalaninanin Cristo tiku xaʼakchan kgalhikgo xtalakapastaknikan nachuna. Ni putum xlakxtumkan. Tanu tanu xkatakan, chuna la kamakgastakka o tuku lakgatikgo, pero wi tuku lakxtum kgalhikgo nema litasiya pi tlantiya lakapastaknankgo. ¿Tuku uma?
«¿Tuku talakaskin nakliskuja xlakata tlakg tlan naklin kilatamat chuna la Jesús?»
5 Kstalaninanin Cristo tiku xaʼakchan kgalhikgo xtalakapastaknikan, kuenta tlawakgo xliʼakxilhtit Jesús (1 Ped. 2:21). Jesús wa pi kilipaxkitkan Jehová xliputum kinakujkan, kilatamatkan chu kintalakapastaknikan. Na wa pi kilipaxkitkan amakgapitsin chuna la akstu kinkapaxkikanan (Mat. 22:37-39). Tiku makakchankgo xtalakapastaknikan la Cristo liskujkgo xlakata nakgalhakgaxmatkgo umakgolh limapakgsin. Chuna la latamakgo limasiyakgo pi tuku tlakg xlakaskinka akxilhkgo wa pi xʼamigo Jehová nawankgo chu nakapaxkikgo amakgapitsin.
Natalan tiku linkgoya kata tlan nalimasiyakgo pi taktujukgo chuna la Jesús akxni kamakgtayakgo natalan tiku lakgkgawasanku tiku la uku tlakg lakgayakgolh taskujut (Kaʼakxilhti párrafo 6)
6, 7. 1) ¿Tuku tayat kgalhikgo tiku makakchankgo xtalakapastaknikan la Cristo? 2) ¿Tuku akstu nakinkakgalhskinkanan?
6 Tiku makakchankgo xtalakapastaknikan la Cristo, ni kajwatiya paxkinankgo, wi atanu tuku akxtum kgalhikgo (Gál. 5:22, 23). Tlan likatsikgo, ni lakapala sitsikgo chu kgalhkgalhinankgo. Ni akglakgwa tuku tlawakgo akxni kgalhikgo taʼakglhuwit chu akxni wi tuku nitlan kakitaxtuniyacha tayanikgo chu ni lakpuwankgo pi nialhla tuku katitatlawalh. Akxni likgalhtawakgakgo Biblia, putsakgo tastakyaw nema nakamakgtaya nakatsikgo tuku tlan chu tuku nitlan, chu limaklakaskinkgo uma xlakata nalaksakkgo tuku natlawakgo. Ni laktlankajwa, katsikgo pi tlakg tlan kakitaxtuniyacha akxni kapulalin xtastakyaw chu xlimapakgsin Jehová.a (Kalikgalhtawakga nota.) Nachuna, xatapaxuwan lichuwinankgo Dios chu tlawakgo putum tuku talakaskin xlakata makxtum natawila congregación.
7 Maski lhuwa o nina lhuwa kata skujnanimaw Jehová, akstu kakinkakgalhskinkan: «¿Tuku talakaskin naktlawa xlakata tlakg natasiya pi chuna kkgalhiputun kintayat la Jesús?». Kaʼakxilhwi pulaktutu tuku nakinkamakgtayayan namakakchanaw kintalakapastaknikan la Cristo.
XATLAN XLIKGALHTAWAKGANANIN BIBLIA KALITAXTUW
8. ¿Tuku xlakata katsiyaw pi Jesús liwana xlakgapasa chu xʼakgatekgsa tuku wan xTachuwin Dios?
8 Jesucristo liwana xlakgapasa chu xʼakgatekgsa xTachuwin Dios. Akgtum liʼakxilhtit, akxni kajku 12 kata xkgalhi, tamakgxtakgli ktemplo, xkalitachuwinama makgalhtawakgananin xlakata tuku xwan xTachuwin Dios. Putum tiku xkgaxmatnikgo kaks xlilakawankgo (Luc. 2:46, 47). Chu alistalh lu liwana maklakaskilh xTachuwin Dios, asta xtalamakgasitsin nialh xkatsikgo tuku nakgalhtinankgo (Mat. 22:41-46).
9. 1) Komo xaʼakchan kgalhiputunaw kintalakapastaknikan, ¿la nalakkaxwiliyaw kintakgalhtawakgakan? 2) Akxni likgalhtawakgayaw Biblia, ¿tuku kilitlawatkan?
9 Komo makakchamputunaw kintalakapastaknikan la Cristo, kilitlawatkan chuna la xtlawa. Ni kililakpuwanatkan pi kajwatiya kilikatsitkan xapulana tamasiy xalak Biblia. Talakaskin tlakg nalakputsananiyaw akxni likgalhtawakgayaw Biblia, xlakata katsiyaw pi xapalha «liwat [...] kaj xmanwa liwayankgoy wanti aya stakkgonit» (Heb. 5:14, Hua Xasasti Talaccaxlan, 1999). Talakaskin liwana nakatsiniyaw tuku wan Biblia (Efes. 4:13). Xlakata namakgantaxtiyaw uma, talakaskin nalakkaxwiliyaw tukuya kilhtamaku nakgalhtawakgayaw chu chuna natlawayaw. Uma kilhchanima pi nalikgalhtawakgayaw Biblia chali chali, kiakstukan nakgalhtawakgayaw chu nakatalikgalhtawakgayaw kifamiliajkan akgatunu semana. Akxni likgalhtawakgayaw Biblia, talakaskin nakatsiniyaw la lakpuwan chu la makgkatsi Jehová, chu kilimaklakaskinatkan uma xlakata nalaksakaw tuku natlawayaw. Komo chuna natlawayaw, natatliwakglha la talalinaw Jehová.
10. ¿La limasiyakgo tiku makakchankgo xtalakapastaknikan la Cristo pi paxkikgo xlimapakgsin chu xtastakyaw Dios?
10 Tiku makakchankgo xtalakapastaknikan la Cristo, ni kajwatiya katsikgo tuku wan Biblia, na paxkikgo xlimapakgsin chu xtastakyaw Dios. ¿La limasiyakgo? Liskujkgo xlakata linkgo xlatamatkan la Dios lakgati, maski natalakaskin nalakgpalikgo la linkgo xlatamatkan, xtalakpuwankan chu xtalismaninkan. Xlakan tlawakgo la Jesús chu lilhakganankgo xasasti tayat, uma kilhchanima tuku xaʼakgstitum chu ni makgxtakgkgo Dios (kalikgalhtawakga Efesios 4:22-24). Kalakapastakwi pi Dios kalipulalilh xʼespíritu santo lakchixkuwin tiku tsokgkgolh Biblia. Wa xlakata akxni chatum kstalanina Cristo likgalhtawakga, espíritu santo makgtaya tlakg nakgalhi takatsin, chu tlakg napaxkinan. Na makgtaya tlakg tlan xʼamigo Jehová nawan.
KAMAKGTAYANAW MAKXTUM NATAWILA CONGREGACIÓN
11. Akxni Jesús xlama kKatiyatni ¿la xwankgonit tiku xlamakgo ama kilhtamaku?
11 Akxni Jesús latamalh kKatiyatni, ni xkgalhi talakgalhin. Pero xnatlatni, xnatalan chu amakgapitsi latamanin tiku xkatachuwinan putum makglakgalhinanin xwankgonit. Asta xdiscípulos milh kilhtamaku tlankajwa kamakgkatsika chu xakstu xkapaxkikan. Akgtum liʼakxilhtit, tsisni akxni Jesús xʼama niy tsukukgolh litaʼakglhuwikgo tiku tlakg xlakaskinka xwanit (Luc. 22:24). Maski chuna, Jesús xkalipawan pi xʼamakgo kgalhikgo xaʼakchan xtalakapastaknikan chu xʼamakgo makgtayanankgo makxtum xtawi congregación. Wa xlakata, watiya uma tsisni skinilh Jehová pi xkamakgtayalh xdiscípulos makxtum xtawilakgolh chuna la Jehová chu Jesús makxtum xwilakgo. Wanilh: «Lakimpi [...] watiya ntipatu nawankgoy, lantla chu nkin mana watiya ntipatu» (Juan 17:21, 22).
12, 13. 1) ¿Tuku kililakpuwanatkan putum akinin? 2) ¿La katsinilh chatum tala namakgtayanan makxtum natawila congregación?
12 Tiku xaʼakchan kgalhikgo xtalakapastaknikan makgtayanankgo makxtum natawila congregación (kalikgalhtawakga Efesios 4:1-6, 15, 16). Putum akinin kililakpuwanatkan akxtum nakataskujaw kinatalankan chu xatapaxuwan. Xlakata tlan chuna natlawayaw talakaskin natatutsuwiyaw. Akgtum liʼakxilhtit, komo chatum tala tlawa tuku nitlan o wi tuku kinkatlawaniyan, ¿tuku natlawayaw? ¿Nialh tachuwinanaw? ¿O lakkaxtlawayaw uma? Komo makakchanaw kintalakapastaknikan la Cristo nalakkaxtlawayaw chu ni lanka katitlawaw uma taʼakglhuwit.
13 Kalilakpuwaw tuku titaxtulh chatum tala tiku wanikan Uwe. Xla lu ksitsi akxni natalan xtlawakgo tuku nitlan. Pero milh kilhtamaku, likgalhtawakgalh xlatamat David chu limaklakaskilh Biblia chu libro Perspicacia. ¿Tuku xlakata laksakli nalikgalhtawakga xlakata David? Xlakata David na katakgalhilh taʼakglhuwit amakgapitsi kskujnin Dios. La mapakgsina Saúl, tiku xmakgniputun. Kʼatanu kilhtamaku, makgapitsi israelitas xʼaktalamakgniputunkgo. Chu akgtum kilhtamaku, asta xpuskat likgalhkgamanalh (1 Sam. 19:9-11; 30:1-6; 2 Sam. 6:14-22). Maski chuna, David chuntiya paxkilh Jehová chu lipawa. Nachuna, xkalakgalhaman amakgapitsin. Xlakata tuku likgalhtawakgalh, Uwe akxilhli pi xtalakaskin chuna xtlawalh la David chu xlakgpalilh la xakxilha tuku nitlan xtlawakgo natalan. Na akgatekgsli pi xtalakaskin xtapatinalh chu xmakgtayanalh makxtum natawila congregación. ¿Ni xlikana pi putum chuna kilitlawatkan?
KAKATALALIW TIKU NI MAKGATSANKGANANIKGO JEHOVÁ
14. ¿Tiku xkatalalin Jesús?
14 Jesucristo tlan kalikatsinilh putum latamanin. Tlan xkamamakgkatsini tiku akxtum xtatawilakgo, lakchixkuwin, lakpuskatin, tiku kajku kamanan o tiku xlinkgoya kata. Maski chuna, ni kaj katiwa tiku xkatalalin. Makgtum kawanilh xʼapóstoles: «Wixin nti lu[...] kiʼamigos nti kkapaxkiyan [komo TNM] tlawayatit wa ntu nkit kkalimapakgsiyan» (Juan 15:14). Jesús kajwatiya xʼamigos xkatlawa tiku ni xmakgxtakgkgo chu xpaxkikgo chu kskujnanikgo Jehová. Lu xlakaskinka pi akinin kajwatiya nalaksakaw nakatalalinaw tiku xlikana paxkikgo Jehová. ¿Tuku xlakata?
Kajwatiya kalaksakwi nakatalalinaw tiku xlikana paxkikgo Jehová
15. ¿Tuku xlakata tlan kitaxtu pi lakgkgawasan chu laktsuman nakatalalinkgo tiku xaʼakchan kgalhikgo xtalakapastaknikan?
15 Tawakat katlankgo akxni kamatsitsiwi Chichini. Xtapaxkit natalan xtachuna la akxni Chichini matsitsiwinan xlakata kinkamakgtayayan namakakchanaw kintalakapastaknikan la Cristo. Akgtum liʼakxilhtit, komo kgawasaku o tsumatku wix, ¿katsiyata tuku natlawaya kmilatamat? Komo laksakputuna tuku tlan, miʼamigo kakatlawa natalan tiku lhuwata kata skujnanimakgo Jehová chu makgtayanankgo makxtum natawila congregación. Xlakan tanu tanu taʼakglhuwit titaxtukgonit chu tlan namakgtayakgoyan tlakg tlan nalipina milatamat. Komo akxtum katalaya, namakgtayakgoyan nalaksaka tuku tlan chu xaʼakchan nakgalhiya mintalakapastakni (kalikgalhtawakga Hebreos 5:14).
16. ¿La makgtayakgolh natalan tiku linkgoya kata chatum tala akxni tsumatku xwanit?
16 Chatum xtatayana Jehová tiku wanikan Helga lakapastaka pi akxni xaʼawatiya kata nema xʼan kʼescuela, atsinu ni putum xcompañeros xlichuwinankgo tuku xtlawaputunkgo. Lhuwa tiku xwankgo pi xʼamputunkgo kʼuniversidad chu xkgalhtawakgaputunkgo akgtum tlan carrera. Pero Helga putsalh xtastakyaw makgapitsi natalan xalak xcongregación tiku xmakakchankgo xtalakapastaknikan la Cristo. Lhuwa natalan tlakg xkgalhikgoya kata nixawa Helga. Xla wan pi lu makgtayakgolh chu makgpuwantinikgolh naskujnani Dios xaputum kilhtamaku. Xlakata xtastakyawkan, precursora litaxtulh akgkitsis kata. Titaxtunita lhuwa kilhtamaku, pero Helga lipaxuwa xlakata akglhuwa kata skujnanilh Jehová akxni tsumatku xwanit.
17, 18. Komo lakaskinaw pi Jehová tlakg kakinkamaklakaskin, ¿tuku kilitlawatkan?
17 Komo tlawayaw la Jesús, xaʼakchan nakikgalhiyaw kintalakapastaknikan. Nachuna, tlakg tlan xʼamigo Jehová nawanaw chu tlakg naskujnaniputunaw. Chuna tlakg tlan nakinkalimaklakaskinan Jehová. Jesús kawanilh xtamakgalhtawakgen: «Nkamakgaxkgakganalh mixkgakganatkan kxlakatin nchixkuwin lakimpi nauʼkxilhkgoy wa ntu xatlan mintatlawkan, chu nalimaxkikgoy nkakni mintlatkan nti wi nkaʼakgapun» (Mat. 5:16).
18 Chuna la katsiw, tiku makakchankgo xtalakapastaknikan la Cristo lu tlan makgtayanankgo kcongregación. Nachuna, pulaktum tuku litalakgapaskgo wa pi tlan limaklakaskinkgo xtalakapastaknikan. ¿La kinkamakgtayayan kintalakapastaknikan nalaksakaw tuku tlan natlawayaw? ¿La limasiyayaw pi lakgachixkuwiliyaw xtalakapastaknikan amakgapitsin? Nakatsiyaw kʼartículo nema aku mima.
a Akgtum liʼakxilhtit, max natalan tiku linkgoya kata nakaskinikan pi kamaxkikgolh tiku lakgkgawasanku makgapitsi xtaskujutkan nema kaliyawakanit chu kakamakgtayakgolh.