«Kakamaxkitit kakni la umakgolh lakchixkuwin»

LAKGKGOLOTSIN tiku Pulalinkgo xTatayananin Jehová, kʼakgchaxan comités lakkaxwilikgonit xtaskujutkan.a Lata kata 1992, laksakkgo lakgkgolotsin tiku lu katsinikgo tlawakgo xtaskujutkan xlakata nakamakgtayakgo comités. La uku, putum tiku makgtayakgo lakgkgolotsin tiku pulalinkgo xtatayananin Jehová ni xatalaksakni (Juan 10:16). Xlakan na tatamakxtumikgo comité nema kamakgtayakgo akgatunu semana akxni kgalhikgo xtamakxtumitkan, kawanikgo Lakgkgolotsin tiku Pulalinankgo tuku tamaklakaskin natatlawa chu kawanikgo la max tlan natatlawa. Lakgkgolotsin tiku Pulalinankgo wankgo komo chuna natatlawa o ni, chu tiku kamakgtayakgo liwana akxilhkgo pi natamakgantaxti. Tiku kamakgtayakgo xatapaxuwan tlawakgo putum taskujut nema kalakgayawakan. Nachuna, kataʼankgo Lakgkgolotsin tiku Pulalinankgo akxni tatlawa laklanka tamakxtumit niku tawilakgo xalak lakalhuwa países chu xaʼespeciales. Min kilhtamaku na kalakgapaxialhnankgo sucursales, chu litaxtukgo xpalakachuwinanin Lakgkgolotsin tiku Pulalinankgo.

Chatum tala tiku litaxtunit makgtayana lata kata 1992, wan pi akxni liwana tlawa xtaskujut, kamakgtaya Lakgkgolotsin tiku Pulalinankgo tlan liwana natlawakgo xtaskujutkan nema Dios kalakgayawanit. Atanu tala tiku na makgtayana litaxtu liwakaya 20 kata, wan pi nikxni xlakpuwan pi xʼama kgalhi ama lanka talakgalhaman.

Lakgkgolotsin tiku Pulalinankgo, kalakgayawakgonit lhuwa taskujut uma natalan tiku nikxni makgxtakgnankgo chu lakgkgolotsin lu paxtikatsinikgo taskujut nema tlawakgo. Wa xlakata kinkawanikanan «kakamaxkitit kakni la umakgolh lakchixkuwin» (Filip. 2:29, TNM).