¿Xlimakgtanut takanajla kpolítica?

Kxlikalanka katiyatni, lhuwa tiku wankgo pi kstalaninanin Cristo makgtanukgo kpolítica. Makgapitsi kamakgtayakgo candidatos chu makgapitsi partidos políticos xlakata namasiyakgo tuku kanajlakgo chu la linkgo xlatamatkan. Políticos maklakaskinkgo tuku lakpuwankgo latamanin chu la tatekgskgo xlakata tiku makgtapakgsikgo kʼakgtum takanajla nakamakgtayakgo. Chu min kilhtamaku xpulalinanin takanajla candidatos litaxtukgo xlakata mapakgsinanin nawankgo. Chu asta kmakgapitsin kachikinin, takanajla nema litalakgapasa wa tiku wankgo pi kstalaninanin Cristo litaxtukgo.

Pero ¿tuku lakpuwana wix? ¿Xlimakgtanutkan kstalaninanin Cristo kpolítica? ¿Tuku tlawalh Jesús? Xla wa: «Akit kkawilinin xaliʼakxilhtit, chuna la ktlawalh mimpalakatakan, nachuna wixin militlawatkan» (Juan 13:15). Kalichuwinaw tuku liʼakxilhtit kinkawilinin Jesús xlakata uma.

¿Makgtanulh Jesús kpolítica?

Ni. Jesús nikxni makgtanulh kpolítica.

Jesús ni maklakaskilh política xlakata nakgalhi limapakgsin. Akxni Akgskgawini malaknunilh «putum tamapakgsin xalak kakilhtamaku», Jesús ni kamapakgsiputulh putum mapakgsinanin xalak kakilhtamaku (Mateo 4:8-10).a Atanu kilhtamaku, latamanin akxilhkgolh pi Jesús tlan mapakgsina xlitaxtulh chu xafuerza xtlawaputunkgo pi xmakgtanulh kpolítica. Pero «Jesús, xlakata xkatsi pi xʼamakgolh minkgo chu xafuerza mapakgsina xʼamakgolh tlawakgo, amakgtum xʼakstu ampa kkasipijni» (Juan 6:15). Jesús ni tlawalh tuku latamanin xlakaskinkgo; nikxni makgtanulh kpolítica.

Jesús ni makgtanulh kpolítica. Akgtum liʼakxilhtit, judíos ni xkalakgaxokgonaniputunkgo mapakgsinanin xalak Roma. Nachuna, xlakpuwankgo pi mapakgsinanin xmalakatsalikgo tuku kskinkgo. Pero akxni kgalhskinkgolh Jesús tuku xlakpuwan xlakata uma, xla kawanilh: «Kaxokgonitit César tuku lakgchan César, pero kamaxkitit Dios tuku lakgchan Dios» (Marcos 12:13-17). Xla ni makgtanulh kpolítica, pero na liwana lichuwinalh pi xkaxokgonikgolh mapakgsinanin xalak Roma tuku kskinkgo. Xlikana, uma ni xkilhchanima pi xkamaxkikgolh mapakgsinanin tuku xlakgchan Dios. Ni xkalikakninanitkan xwanit mapakgsinanin, xlakata kajwatiya Dios xlakgchan xkakninanikgolh (Mateo 4:10; 22:37, 38).

Jesús kawanilh latamanin pi xtatayakgolh xTamapakgsin Dios, tamapakgsin xalak akgapun (Lucas 4:43). Jesús ni makgtanulh kpolítica xlakata xkatsi pi mapakgsinanin xalak kakilhtamaku nila xʼamakgo makgantaxtikgo tuku Dios lakaskin xpalakatakan latamanin, nema kajwatiya xTamapakgsin tlan namakgantaxti (Mateo 6:10). Xla na xkatsi pi Dios ni xʼama kamaklakaskin mapakgsinanin xalak kakilhtamaku, wata xTamapakgsin xʼama tawila xlakgxokgokan (Daniel 2:44).

¿Kstalaninanin Cristo xalak pulana siglo makgtanukgolh kpolítica?

Nichuna. Xtamakgalhtawakgen Jesús kgalhakgaxmatkgolh xlimapakgsin chu ni makgtanukgolh kkakilhtamaku (Juan 15:19). Stalanikgolh xliʼakxilhtit chu lakgmakgankgolh putum tuku xla política (Juan 17:16; 18:36). Xlakan wa lu liskujkgolh natlawakgo tuku xkalimapakgsinit: namasiyakgo chu nalichuwinankgo xalaktlan tamakatsinin xla xTamapakgsin Dios (Mateo 28:18-20; Hechos 10:42).

Xapulana kstalaninanin Cristo wa lu xlakaskinka xliʼakxilhkgo kxlatamatkan nakgalhakgaxmatkgo Dios. Pero na xkatsikgo pi xkalikgalhakgaxmatatkan xwanit mapakgsinanin (Hechos 5:29; 1 Pedro 2:13, 17). Wa xlakata xkgalhakgaxmatkgo limapakgsin chu xlakgaxokgonankgo (Romanos 13:1, 7). Xlikana pi ni xmakgtanukgo kpolítica, pero xlitamakgtayakgo limapakgsin nema xwilikgonit mapakgsinanin xlakata nitu xkatlawanika chu na xlitamakgtayakgo tuku xmastakgo mapakgsinanin (Hechos 25:10, 11; Filipenses 1:7).

Kstalaninanin Cristo xala uku ni makgtanukgo kpolítica

Biblia masiya pi Jesús chu xapulana kstalaninanin ni makgtanukgolh kpolítica. Wa xlakata xtatayananin Jehová, tiku stalanikgo xliʼakxilhtit Cristo, ni makgtanukgo kpolítica. Xtachuna la kstalaninanin Cristo xalak pulana siglo, wa liskujkgo tuku Jesús limapakgsinalh: lichuwinankgo «xatlan tamakatsinin xla Tamapakgsin» (Mateo 24:14).