Guerra xalak Ucrania maliwaka tatsinksni kxlikalanka katiyatni

Kʼakgtum tamakxtumit nema tlawaka 19 xla mayo kata 2022, Consejo de Seguridad de la ONU, niku tamakxtumikgolh 75 latamanin tiku tlakg kgalhikgo limapakgsin, lichuwinanka pi «tatsinksni kxlikalanka katiyatni, nema tlakg taliwakanit xlakata ananit COVID-19 chu xlakata talakgpali kilhtamaku, tlakg nataliwakapara kxlikalanka katiyatni xlakata guerra nema lama kʼUcrania». Ni xlimakgas, revista The Economist lichuwinalh pi «guerra tlawama pi kkakilhtamaku, nema lakatsu wi kxlisputni, naʼanan akgtum lanka tatsinksni kxlikalanka katiyatni». Biblia xlichuwinanit pi kkinkilhtamakujkan xʼama anan tatsinksni la uma, pero na kinkamaxkinitan takgalhkgalhin chu kinkawaninitan tuku kilitlawatkan xlakata natayaniyaw.

Biblia lichuwinalh pi xʼama anan tatsinksni

•  Jesús lichuwinalh: «Nalatalatlawa laklanka kachikinin chu nalatalatlawa tamapakgsin, chu naʼanan tatsinksni» (Mateo 24:7).

•  Libro xla Apocalipsis kalichuwinan kgalhtati tiku kgewilakgo kawayu. Chatum tiku kgewi kawayu kilhchanima guerras. Chu stalani achatum tiku kilhchanima tatsinksni, na xlichuwinanit pi xʼama min kilhtamaku akxni ni xʼama akchan tuku wakan chu lu tapalaxla xʼamaka listanankan. «Chu kakxilhli tantum xatsitsakga kawayu. Tiku xkgewi xlin kxmakan akgtum pupulhkan. […] Kkgaxmatli akgtum tachuwin nema xwan: “Akgtum litro xla trigo xtapalh nawan okgxtum denario chu akgtutu litro xla cebada xtapalh nawan okgxtum denario”» (Apocalipsis 6:5, 6).

Uma tuku xlichuwinanit Biblia xlakata tatsinksni kgantaxtuma kʼuma kilhtamaku, nema Biblia limapakuwi «xaʼawatiya kilhtamaku» (2 Timoteo 3:1). Komo tlakg katsiputuna xlakata «xaʼawatiya kilhtamaku» chu xlakata umakgolh tiku kgewilakgo kawayu, kaʼakxilhti video En 1914 el mundo cambió de rumbo chu kalikgalhtawakga artículo «¿Qué representan los jinetes del Apocalipsis?».

La kinkamakgtayayan Biblia

•  Biblia kinkamaxkiyan tastakyaw nema nakinkamakgtayayan natayaniyaw tuku tuwa, chuna la akxni taliwaka kxtapalh liwat o akxni ni lu anan tuku wakan. Kaʼakxilhti makgapitsi kʼartículo «Cómo vivir con menos».

•  Biblia na kinkamaxkiyan takgalhkgalhin pi putum tlakg tlan nawan. Kinkamalaknuniyan pi nachin kilhtamaku akxni «lhuwa namakgalanankan kkatiyatni» chu niti katitsinksli (Salmo 72:16). Xlakata tlakg nakatsiya xpalakata uma takgalhkgalhin chu tuku xlakata tlan nalipawana, kalikgalhtawakga artículo «La esperanza real de un mañana mejor».