2023: Chuntiya kakgalhiw takgalhkgalhin. ¿Tuku kinkawaniyan Biblia?

Xlakata aku tsukuma kata 2023, putum akinin lakaskinaw pi tlan nakinkakitaxtuniyan akinin chu kifamiliajkan. ¿Tuku xlakata kanajlayaw pi namin tuku tlan?

Biblia kinkamaxkiyan takgalhkgalhin

Biblia limin laktlan tamakatsinin. Wan pi tuku titaxtumaw uku, ni katimakgapalalh chu nialh makgas nasputa. Wan pi putum tuku tsokgwilikanit kBiblia «tsokgwilika xlakata nakinkamasiyanikanan, chu kgalhiyaw takgalhkgalhin xlakata xtachuwin Dios nema tatsokgnit kinkamaxkiyan litliwakga» (Romanos 15:4).

• Komo tlakg katsiputuna xlakata tuku malaknu Biblia, kalikgalhtawakga artículo «La esperanza real de un mañana mejor».

Takgalhkgalhin nema tlan nakinkamakgtayayan la uku

Takgalhkgalhin nema masta Biblia «xtachuna la tuku limachokgowilikan barco [nema] tliwakglh wili kilatamatkan» (Hebreos 6:19, nota). Uma takgalhkgalhin kinkamakgtayayan ni nataxlajwaniyaw; kinkamakgtayayan natayaniyaw taʼakglhuwit nema kgalhiyaw, nalakpuwanaw tuku tlan chu nakgalhiyaw xaxlikana tapaxuwan. Kaʼakxilhti makgapitsi liʼakxilhtit:

• Kaʼakxilhti pi takgalhkgalhin nema masta Biblia, makgtayalh chatum chixku tiku nila xmaʼakgxtakga nitlan talismamin. Kaʼakxilhti video «Kxkajnilh chuna la xaklin kilatamat».

• Kaʼakxilhti pi takgalhkgalhin nema masta Biblia kinkamakgtayayan akxni ni tiku lu paxkiyaw. Kaʼakxilhti video Takgoxamixat xlakata tiku lipuwamakgolh.

Akgtum takgalhkgalhin nema tatliwakglhtilhama

Lhuwa latamanin lakpuwankgo pi tuku nitlan titaxtumakgo natalakgpali, pero ni liwana katsikgo komo xlikana chuna nala. Pero takgalhkgalhin nema masta Biblia xlikana nakgantaxtu. ¿Tuku xlakata? Xlakata wa Jehová tiku malaknunit tuku wan Biblia,a xla chatum Dios «Tiku nila akgsaninan» (Tito 1:2). Kajwatiya xla kgalhi litliwakga xlakata namakgantaxti putum tuku malaknunit; xlakata wa «Tlawanit putum tuku xla lakaskinit» (Salmo 135:5, 6).

Wix tlan nalipawana takgalhkgalhin nema masta Biblia. Kamakgpuwantiniyan liwana nalakputsananiya xTachuwin Dios xlakata namatliwakglha mintakanajla (Hechos 17:11). ¿Katsiputuna la tatlawa akgtum takgalhtawakga xalak Biblia nema ni taxokgo? ¡Kalimatsuki uma, kkata 2023!