¿Natsuku Armagedón anta k’Israel? | ¿Tuku kinkawaniyan Biblia?

Biblia ni wan pi Armagedón natsuku ka’akgtum kachikin. Wata wan pi wa akgtum guerra nema nala kxlikalanka katiyatni niku Dios nakatalatlawa putum mapakgsinanin xalak katiyani.

• «Umakgolh tamakatsinin wa demonios mastakgo, chu putum mapakgsinanin kxliputum katiyatni kgaxmatkgo umakgolh tamakatsinin […] xlakata nakamamakxtumikgo putum mapakgsinanin kʼguerra nema natlawakan klanka xkilhtamaku Dios, Tiku kgalhi putum litliwakga […]. Chu kamamakxtumika putum mapakgsinanin anta niku kxahebreo wanikan Armagedón» (Apocalipsis 16:14, 16).

Tachuwin Armagedón minacha ktachuwin kxahebrea Har Meghiddóhn, nema wamputun «sipi xla Meguidó». Meguidó akgtum kachikin xwanit xalak Israel. Wa xlakata makgapitsi latamanin wankgo pi Armagedón nala anta kʼIsrael. Pero nipara Meguidó chu atanu kachikin xalak oeste xla Asia tlakg lanka xlakata tlan natastokgkgo putum mapakgsinanin kxlikalanka katiyatni chu ksoldados.

Libro xla Apocalipsis sokgwalika xlakata namasiya «simbolos», uma wamputun pi tuku wan anta kaj wi tuku kilhchanima (Apocalipsis 1:1). Wa xlakata Armagedón ni kilchanima akgtum kachikin, wata wamputun pi naʼanan akgtum lanka guerra kxilakalanka katiyatni niku nalatalachipa xTamapakgsin Dios chu putum mapakgsinanin xalak katiyatni (Apocalipsis 19:11-16, 19-21).