¿Tuku xlakata latamanin nila wilikgo takaksni? | ¿Tuku kinkawaniyan Biblia?

Nipara latamanin tiku kgalhikgo lhuwa limapakgsin kʼuma kakilhtamaku nipara organizaciones tlan wilikgonit takaksni. Lata sputli xLiʼakgtiy Guerra kxlikalanka Katiyatni, tlakg ananit tatalachipat. Max akgtiy mil millones latamanin lamakgolh kkachikinin niku anan tatalachipat.

¿Tuku xlakata latamanin nila wilikgo takaksni? ¿Tuku wan Biblia?

Pulaktutu tuku tlawa pi latamanin nila wilikgo takaksni

1. 1. Biblia wan pi kkinkilhtamakujkan latamanin «xʼakstukan nakapaxkikan, napaxkikgo tumin, nawankgo pi xlakaskinka litaxtukgo, ni nataktujukgo, [...] nakamakgxtakgkgo amakgapitsi latamanin, [...] nila wi tuku nakatalakkaxlakan, [...] ni namachokgokgo tuku tlawaputunkgo, xalakluku nawankgo, [...] laktsakatni nawankgo, lanka nakamakgkatsikan». Umakgolh tayat tlawa pi latamanin nipara naputsakgo takaksni (2 Timoteo 3:2-4).

2. 2. Nipara chatum lataman kgalhi liskgalala nema talakaskin xlakata nalakkaxtlawa taʼakglhuwit, nipara akxni akxtum kataskuja amakgapitsin xlakata nawilikgo takaksni. Putum maklakaskinaw xtamakgtay kiMalakatsukinakan, Jehová.a Biblia masiya pi «chixku ni lakgchan x’akstu napulalinkan» (Jeremías 10:23).

3. 3. Uma kakilhtamaku wi kxmakan chatum mapakgsina tiku lu tliwakga, lu nitlan likatsi chu «kaʼakgskgawima putum tiku lamakgolh kkatiyatni». Wa Satanás, tiku na lilakgapaskan Akgskgawini. Komo uma kakilhtamaku wi «kxmakan Akgskgawini», chuntiya anan tatalachipat chu guerras (Apocalipsis 12:9; 1 Juan 5:19).

¿Tiku nawili takaksni?

Biblia lakatanks masiya pi wa Dios tiku nawili takaksni, chu ni wa latamanin.

• «Liwana kkatsi tuku klakapastaknit mimpalakatakan. Klakaskin kakgalhitit takaksni ni wa talakgaputsit. Kkamaxkiputunan tuku tlan chu akgtum takgalhkgalhin» (Jeremías 29:11).

¿La namakgantaxti Dios uma tamalaknun? Biblia wan: «Dios tiku masta takaksni, nialh makgas namalakgsputu Satanás» (Romanos 16:20). Dios kgalhi akgtum tamapakgsin anta kʼakgapun chu nalimaklakaskin xlakata nawili takaksni unu kKatiyatni. Biblia limapakuwi «xTamapakgsin Dios», chu xMapakgsina wa Jesucristo (Lucas 4:43). Akxni Jesús namapakgsinan kKatiyatni, latamanin nakatsinikgo la tlan nakatalalinkgo amakgapitsin xlakata nakgalhikgo takaksni (Isaías 9:6, 7).

• Komo tlakg katsiputuna, kalikgalhtawakga artículo «¿Qué cosas logrará el Reino de Dios?».