¿La kalikatsinikgo xtatayananin Jehová tiku nialh makgtapakgsikgo kxtakanajlakan?
Lu kliskujaw xlakata tlan nakkalikatsiniyaw, nakkapaxkiyaw chu nakkalimasiyaniyaw kakni putum latamanin. Komo chatum xtatayana Jehová tsuku taxlajwani chu nialh kakninani Jehová chuna la xapulana, ktsukuyaw makgpuwantiniyaw chu klimasiyaniyaw pi xlikana kpaxkiyaw, chu kmakgtayayaw xlakata namatliwakglha xtakanajla (Lucas 15:4-7).
Akxni wi tiku tlawa lanka talakgalhin, tamakxtukan kcongregación (1 Corintios 5:13). Pero xlakata lu kkapaxkiyaw kinatalankan, kliskujaw xlakata nakmakgtayayaw tiku tlawanit talakgalhin xlakata ni natamakxtukan kcongregación. Chu maski natamakxtukan, chuntiya klimasiyaniyaw tapaxkit chu kakni, chuna la wan Biblia pi kilitlawatkan (Marcos 12:31; 1 Pedro 2:17).
¿Tuku xlakata min kilhtamaku wi tiku tamakxtukan kcongregación?
Biblia liwana wan pi komo chatum kstalanina Cristo tlawa akgtum lanka talakgalhin chu ni talakgpali, talakaskin natamakxtukan kcongregación (1 Corintios 5:11-13). Wa Biblia kinkawaniyan tuku talakgalhin tlawa pi wi tiku natamakxtukan kcongregación. Makgapitsi lanka talakgalhin wa laʼakgskgawikan ktamakgaxtokgat, kgachikan, makgninankan, nitlan likatsinikan tiku xalak kifamiliajkan o kgalhanankan (1 Corintios 6:9, 10; Gálatas 5:19-21; 1 Timoteo 1:9, 10).
Akxni wi tiku tlawa umakgolh talakgalhin, ni tunkun tamakxtuyaw. Pulana, lakgkgolotsina xalak congregación tachuwinankgo chu makgtayakgo xlakata namakgxtakga xtalakgalhin (Romanos 2:4). Liwana tachuwinankgo, tlan likatsinikgo chu limasiyanikgo talakgalhaman (Gálatas 6:1). Uma tuku tlawakgo lakgkgolotsin tlan natlawa pi xla naʼakxilha pi nitlan tuku tlawama chu max nialh natlawa talakgalhin (2 Timoteo 2:24-26). Pero komo ni talakgpali maski makglhuwa stakyawakanit chu chuntiya tlawama tuku Biblia wan pi ni xlilatat, talakaskin natamakxtukan kcongregación. Lakgkgolotsin kajwatiya nakamakatsinikgo natalan xalak congregación pi xla nialh xtatayana Jehová litaxtu.
Lakgkgolotsin lu liskujkgo xlakata nakamakgtayakgo tiku tlawakgonit talakgalhin natalakgpalikgo. Tlan kalikatsinikgo, kalimasiyanikgo tapaxkit chu kakni.
¿Tuku xlakata xlakaskinka natamakxtukan tiku chuntiya tlawama talakgalhin? Pulaktum wa pi congregación skulunku natawila chu ni katikapasalh ni xatlan xtayat tiku tlawama talakgalhin (1 Corintios 5:6; 15:33; 1 Pedro 1:16). Nachuna, tiku tlawama talakgalhin tlan natsuku lilakpuwan pi nitlan tuku tlawama chu namakgxtakga xtalakgalhin (Hebreos 12:11).
¿La likatsinikgo xtatayananin Jehová tiku tamakxtukanit kcongregación?
Biblia wan pi kstalaninanin Cristo ni xlilat natalalinkgo tiku tamakxtukanit kcongregación chu nipara natawayankgo (1 Corintios 5:11). Wa xlakata, ni xʼamigo klitaxtuyaw tiku tamakxtukanit chu nipara klimaxtuyaw kilhtamaku xlakata wi tuku akxtum naktlawayaw. Pero uma ni wamputum pi nipara tsinu ktachuwinanaw. Ni, wata klimasiyaniyaw kakni. Tlan naʼan ktamakxtumit chu xtatayananin Jehová tlan nakpakgachipayaw akxni nachin.b Nachuna, tiku tamakxtukanit kcongregación tlan nakakgalhskin lakgkgolotsin tuku xlitlawat xlakata tlan namakgtapakgsipara kcongregación.
Tiku katamakxtukan kcongregación tlan ankgo ktamakxtumit.
¿Tuku kitaxtu komo tiku tamakxtukanit kcongregación kgalhi xfamilia chu xlakan chuntiya xtatayananin Jehová litaxtukgo? Maski nialh akxtum kakninanikgo Jehová, chuntiya akgtum familia litaxtukgo. Xlakata kwatiya chiki wilakgo, chuntiya tlan nalatalalinkgo chuna la xapulana.
Tiku tamakxtukanit kcongregación tlan nakaskinikgo lakgkgolotsin pi kalakgapaxialhnankgolh chu xlakan nalistakyawakgo Biblia chu namakgpuwantinikgo namakgxtakga xtalakgalhin chu nalakgtaspita Dios (Zacarías 1:3). Komo xla nialh natlawa tuku nitlan xtlawama chu limasiya pi lilatamaputun xlimapakgsin Biblia, tlan namakgtapakgsipara kcongregación. Putum natalan xalak congregación natapatikgo chu tlan namamakgkatsinikgo, chuna la natalan xalak Corinto tapatikgolh chatum chixku tiku xtlawama lanka talakgalhin chu makgxtakgli tuku nitlan xtlawama (2 Corintios 2:6-8).
¿La makgkatsikgo tiku xkatamakxtukanit kcongregación?
Kaʼakxilhti tuku wankgo makgapitsi xtatayananin Jehová tiku xkatamakxtukanit kcongregación chu lakgtaspitkgolh Dios.
«Akxni klakpuwa naktaspitpara kcongregación, xaklakpuwan pi lakgkgolotsin xʼamakgo kinkgalhskinkgo putum tuku ktlawalh kata nema ni xakmakgtapakgsi kcongregación. Pero ni chuna lalh, wata kiwanikgolh: “Kajwatiya kalilakgaputsa tuku natlawaya la uku”. Akxni chuna kiwanikgolh, skayaj kmakgkatsilh» (María, Estados Unidos).
«Akxni kakxilhli pi natalan lu xkinkgalhkgalhimakgolh, kmakgkatsilh pi xtapalh xaklitaxtu. Natalan xalak congregación kimakgtayakgolh nakmakgkatsi pi Jehová chu xlakan xkintapatikgonit. Lakgkgolotsin ankgalhin kimakgpuwantinikgolh. Kimakgoxomixikgolh chu kimakgtayakgolh nakmakgkatsi pi Jehová chuntiya kimpaxki chu xtapalh kiliʼakxilha» (Malcom, Sierra Leona).
«Lu tlan klimakgkatsi pi Jehová lu paxki xkachikin chu lu liskuja xlakata skulunku natawila. Maski amakgapitsin lakpuwankgo pi malakatsalikan akxni wi tiku tamakxtukan kcongregación, uma nichuna, wata lu xlakaskinka chu limasiya xtapaxkit Jehová. Lu kpaxtikatsini kinTlatkan xalak akgapun xlakata lu paxkinan chu tapatinan» (Sandi, Estados Unidos).
a Kalimapakuwiyaw lakgkgolotsin lakchixkuwin tiku kstalaninanin Cristo litaxtukgo tiku tliwakga kgalhikgo xtakanajlakan chu masiyakgo tuku wan Biblia. Na kakuentajtlawakgo xkachikin Jehová chu kamakgpuwantinikgo. Xlakan ni kaxokgonikan xlakata tuku tlawakgo (1 Pedro 5:1-3).
b Min kilhtamaku, tiku tamakxtukan kcongregación tsuku kawani amakgapitsin pi katlawakgolh tuku nitlan. Akxni wi tiku chuna tlawa, kstalaniyaw xtastakyaw Biblia niku wan: «Ni kawanitit “Tlen”» (2 Juan 9-11).